ແຜນການຂອງກຸ່ມກໍ່ການຮ້າຍລັດອິສລາມທີ່ຈະລັກພາຕົວເຈົ້າໜ້າທີ່ຢູ່ນອກເຂດຕາເວັນອອກກາງ ແລະຈັບຕົວພວກເຂົາເຈົ້າໄວ້ເພື່ອເປັນສິ່ງໄດ້ປຽບໃນການຕໍ່ລອງນັ້ນ ໄດ້ກໍ່ໃຫ້ເກີດມີການໂຈມຕີຂອງສະຫະລັດ ໃນຕອນເຊົ້າວານນີ້ ທີ່ພາໃຫ້ຜູ້ນຶ່ງໃນຈຳນວນຜູ້ທີ່ຖືກກ່າວຫາວ່າ ເປັນຜູ້ວາງແຜນນັ້ນ ຖືກຂ້າຕາຍ.
ສູນກາງກອງບັນຊາການຂອງສະຫະລັດ ຫລື CENTCOM ໃນວັນຈັນວານນີ້ ໄດ້ຢືນຢັນການເສຍຊີວິດຂອງທ້າວ ອັບ-ອາລ-ຮາດີ ມາມູດ ອາລ-ຮາຈີ ອາລີ (Abd-al-Hadi Mahmud al-Haji Ali) ໃນລະຫວ່າງການປະຕິບັດງານຢູ່ ໃນພາກເໜືອຂອງຊີເຣຍ ໂດຍໄດ້ພັນລະນາເຖິງລາວວ່າ ເປັນເຈົ້າໜ້າທີ່ ທີ່ຮັບ ຜິດຊອບໃນການວາງແຜນການໂຈມຕີໃນເຂດຕາເວັນອອກກາງ ແລະໃນຢູ ໂຣບ.
ການຢືນຢັນການເສຍຊີວິດຂອງທ້າວອາລີ ມີຂຶ້ນບໍ່ເທົ່າໃດຊົ່ວໂມງ ຫຼັງຈາກ ເຈົ້າໜ້າທີ່ສະຫະລັດຄົນນຶ່ງ ໂດຍບໍ່ປະສົງອອກນາມ ທີ່ກ່າວຕໍ່ວີໂອເອ ເນື່ອງ ຈາກລັກສະນະທີ່ຫຼໍ່ແຫລມຂອງການປະຕິບັດງານນັ້ນ ກ່າວວ່າ ຊາກສົບຂອງ ຜູ້ນຳຂັ້ນສູງໄດ້ຖືກນຳອອກມາແລ້ວ ແລະກຳລັງຢູ່ໃນຂັ້ນຕອນການກວດດີແອນເອ (DNA) ເພື່ອລະບຸຕົວຕົນຂອງຜູ້ກ່ຽວ.
ນັກລົບປະກອບອາວຸດສອງຄົນ ກັບທ້າວອາລີ ຖືກຂ້າຕາຍ ໃນເວລາທີ່ມີການ ໂຈມຕີນັ້ນ, ອີງຕາມເຈົ້າຫນ້າທີ່ CENTCOM ທີ່ເວົ້າວ່າ ບໍ່ມີພົນລະເຮືອນຄົນໃດ ໄດ້ຮັບບາດເຈັບ ແລະວ່າກໍາລັງທະຫານຂອງສະຫະລັດທີ່ມີສ່ວນພົວພັນໃນ ການປະຕິບັດນັ້ນ ປາກົດຕົວໃຫ້ເຫັນວ່າ ບໍ່ໄດ້ຮັບບາດເຈັບແຕ່ຢ່າງໃດ.
