ຜູ້ພິພາກສາ ລັດຖະບານກາງທີ່ນະຄອນ Los Angeles ໄດ້ລົງ
ຄວາມເຫັນ ວ່າ ການກັກຂັງຊົ່ວຄາວ ພວກເດັກນ້ອຍ ແລະ ແມ່
ຂອງເຂົາເຈົ້າ ທີ່ເຂົ້າເມືອງຜິດກົດໝາຍ ໂດຍລັດຖະບານ ທ່ານ
ໂອບາມາ ເປັນການລະເມີດຂໍ້ຕົກລົງ ຂອງສານທີ່ໄດ້ມີມາ ເກືອບ
20 ປີແລ້ວນັ້ນ.
ຜູ້ພິພາກສາ ທ່ານນາງ Dolly Gee ໄດ້ອອກຄຳສັ່ງໃຫ້ ກະຊວງ
ຮັກສາຄວາມປອດໄພພາຍໃນຂອງສະຫະລັດ ປ່ອຍຕົວພວກ
ຄອບຄົວດັ່ງກ່າວ ຈາກສູນກັກຂັງຊົ່ວຄ່າວ 3 ແຫ່ງ ໃນທັນທີ.
ໃນການລົງຄວາມເຫັນຂອງທ່ານນາງ ທີ່ໄດ້ມີຂຶ້ນ ໃນຕອນຄ່ຳ
ວັນສຸກມື້ກ່ອນນີ້ ທ່ານນາງ Gee ໄດ້ຂຽນຂໍ້ຄວາມລົງວ່າ ພວກເດັກນ້ອຍ ແລະ ແມ່
ຂອງເຂົາເຈົ້າ ຖືກກັກຂັງໄວ້ ຢູ່ໃນ “ສະພາບທີ່ເວົ້າທົ່ວໄປ ແມ່ນໜ້າເວດທະນາແທ້ໆ”
ແລະ ວ່າ ບັນດາເຈົ້າໜ້າທີ່ ບໍ່ໄດ້ນຳເອົາພວກເຂົາເຈົ້າໄປກັກໄວ້ຕາມທີ່ບົ່ງບອກໃນຂໍ້ຕົກລົງ
ປີ 1997.
ທ່ານນາງ Gee ໄດ້ຕຳນິຕິຕຽນລັດຖະບານ ຢ່າງແຮງ ທີ່ບໍ່ໄດ້ປະຕິບັດຕາມ ອັນທີ່ທ່ານນາງ
ກ່າວວ່າ ແມ່ນເປັນ ເງື່ອນໄຂຂອງຂໍ້ຕົກລົງປີ 1997 ທີ່ “ບໍ່ຈະແຈ້ງ” ແລະ ທ່ານໄດ້ລົງ
ຄວາມເຫັນວ່າ ຂໍ້ຕົກລົງດັ່ງກ່າວນັ້ນ ແມ່ນໃຊ້ກັບທັງສອງກໍລະນີຄື ພວກເດັກນ້ອຍທີ່ບໍ່ມີ
ຜູ້ປົກຄອງຕິດຕາມມາດ້ວຍ ແລະ ພວກເດັກນ້ອຍທີ່ມາພ້ອມກັບແມ່ຂອງພວກເຂົາເຈົ້າ.
ຜູ້ພິພາກສາດັ່ງກ່າວ ໄດ້ກຳນົດເວລາໃຫ້ ກະຊວງຮັກສາຄວາມປອດໄພພາຍໃນຂອງ
ສະຫະລັດ ຈົນຮອດ ວັນທີ 3 ສິງຫາສຳຫລັບຈັດການກັບພວກທີ່ຖືກກັກຕົວເຫຼົ່ານັ້ນ.
ນອກນັ້ນ ທ່ານນາງຍັງໄດ້ໃຫ້ເວລາ ກະຊວງຍຸດຕິທຳ 90 ມື້ ເພື່ອໃຫ້ຄຳຕອບວ່າ
ເປັນຫຍັງ ຕົນຈຶ່ງຈະບໍ່ຄວນປະຕິບັດຕາມການລົງຄວາມເຫັນຂອງທ່ານນາງ.
