ພວກຫົວຕໍ່ສູ້ທີ່ເປັນເຄືອຂ່າຍຂອງກຸ່ມ al-Qaida ໃນຊີເຣຍ ໄດ້
ປ່ອຍ ຕົວນັກຂ່າວຊາວອາເມຣິກັນຄົນນຶ່ງ ທີ່ໄດ້ຖືກຈັບໄວ້ ເປັນ
ເວລາ 2 ປີ ມາແລ້ວນັ້ນ ພຽງບໍ່ພໍເທົ່າໃດມື້ ຫຼັງຈາກທີ່ກຸ່ມອິສລາມ
ອີກກຸ່ມນຶ່ງ ໄດ້ ຕັດຫົວ ນັກຂ່າວອາເມຣິກັນ James Foley.
ພວກລັກພາຕົວດັ່ງກ່າວ ໄດ້ມອບຕົວ ນັກຂ່າວ Peter Theo
Curtis ໃຫ້ແກ່ໜ່ວຍຮັກສາສັນຕິພາບຂອງສະຫະປະຊາຊາດ
ຢູ່ໃນເຂດພູພຽງ Golan Heights ເມື່ອວັນອາທິດວານນີ້ ແລະ
ຕໍ່ມາໜ່ວຍດັ່ງກ່າວກໍໄດ້ມອບຜູ້ກ່ຽວ ໃຫ້ແກ່ເຈົ້າໜ້າທີ່ສະຫະລັດ.
ປະເທດກາຕ້າໄດ້ຊ່ວຍຈັດແຈງ ໃຫ້ມີການປ່ອຍຕົວນັກຂ່າວ Curtis. ແຕ່ເງື່ອນໄຂອັນແທ້ຈິງກ່ຽວກັບການປ່ອຍຕົວຜູ້ກ່ຽວ ຍັງບໍ່ຈະແຈ້ງເທື່ອ.
ໂຄສົກທຳນຽບຂາວ ກ່າວວ່າ ປະທານາທິບໍດີ ບາຣັກ ໂອບາມາ ຮູ້ສຶກດີອົກອີໃຈ ແລະໂລ່ງອົກ ກັບເສລີພາບຂອງທ້າວ Curtis ແລະ ຈະສືບຕໍ່ໃຊ້ທຸກໆວິທີ ທີ່ເປັນໄປໄດ້ ເພື່ອໃຫ້ໄດ້ຮັບເສລີພາບ ຂອງພວກຕົວປະກັນ ທີ່ຍັງເຫຼືອຢູ່ໃນຊີເຣຍ.
ທ້າວ Curtis ທີ່ຂຽນລາຍງານໃນນາມ Theo Padnos ເຊັ່ນກັນນັ້ນ ແມ່ນມາຈາກນະຄອນ Boston ແລະ ໄດ້ຂຽນປຶ້ມຫຼາຍຫົວ ແລະ ຂຽນລາຍງານໃຫ້ແກ່ ວາລະສານຂອງອາເມຣິກັນຫຼາຍໆສະບັບ ມາແລ້ວ.
ກຸ່ມແນວໂຮມ Nusra ຊຶ່ງເປັນເຄືອຂ່າຍຂອງ ກຸ່ມ al-Qaida ໄດ້ລັກພາຕົວທ້າວ Curtis ຢູ່ໃນຊີເຣຍ ເມື່ອປີ 2012. ກຸ່ມດັ່ງກ່າວເປັນນຶ່ງ ຂອງກຸ່ມອິສລາມຫຼາຍໆກຸ່ມ ທີ່ກຳລັງຕໍ່ສູ້ເພື່ອໂຄ່ນລົ້ມ ລັດຖະບານຊີເຣຍ.
ການປົດປ່ອຍຂອງທ້າວ Curtis ມີມາພຽງ 2-3 ມື້ ຫຼັງຈາກ ພວກຫົວຕໍ່ສູ້ຮຸນແຮງຈັດ ຈາກກຸ່ມລັດອິສລາມ ໄດ້ຕັດຫົວ ນັກຂ່າວສະຫະລັດ James Foley ແລ້ວນຳເອົາພາບວີດີໂອການສັງຫານ ທີ່ສະຫຍອງຂວັນນັ້ນ ລົງເຜີຍແຜ່ທາງອິນເຕີເນັດ.
ວີດີໂອ: ເຈົ້າໜ້າທີ່ທະຫານສະຫະລັດ ຫາລື ຍຸທະສາດໄລຍະຍາວ ກ່ຽວກັບພວກ ISIS:
