ບັນດາເຈົ້າໜ້າທີ່ອະວຸໂສຈາກສະຫະລັດ ຍີ່ປຸ່ນ ແລະເກົາຫຼີໃຕ້ ຈະພົບປະກັນໃນອາທິດໜ້າຢູ່ໃນນະຄອນຫຼວງໂຕກຽວ ທ່າມກາງໄພຂົ່ມຂູ່ ທີ່ທະວີຂຶ້ນນັບມື້ຈາກເກົາຫຼີເໜືອ.
ໃນຂະນະດຽວກັນ ສະຫະລັດໄດ້ເນັ້ນຢ້ຳເຖິງຄວາມໝັ້ນໝາຍຂອງຕົນທີ່ເອີ້ນວ່າ “ອາຍຣອນແຄລດ (ironclad)” ຕໍ່ບັນດາພັນທະມິດຂອງຕົນ ຊຶ່ງກະຊວງການຕ່າງປະເທດໄດ້ປະຕິເສດທີ່ຈະກ່າວວ່າ ວໍຊິງຕັນຈະພິຈາລະນາການນຳເອົາອາ ວຸດນິວເຄລຍທາງຍຸດທະສາດ ໄປປະຈຳການຄືນນໃໝ່ ຢູ່ແຫຼມເກົາຫຼີຫຼືບໍ່ ແລະລັດຖະບານເກົາຫຼີໃຕ້ ໄດ້ຮ້ອງຂໍເຊັ່ນນັ້ນຫຼືບໍ່.
ຮອງລັດຖະມົນຕີການຕ່າງປະເທດ ທ່ານນາງເວັນດີ ເຊີແມນ (Wendy Sherman) ຈະເຂົ້າຮ່ວມໃນ “ກອງປະຊຸມສາມຝ່າຍກັບຮອງລັດຖະມົນຕີການຕ່າງປະເທດຂອງຍີ່ປຸ່ນ ທ່ານໂມຣີ ທາເກໂອະ (Mori Takeo) ແລະຮອງລັດຖະມົນຕີການຕ່າງປະເທດຄົນທີນຶ່ງຂອງເກົາຫຼີໃຕ້ ທ່ານໂຊ ຮຽນດົງ (Cho Hyundong)” ຢູ່ໃນນະຄອນຫຼວງໂຕກຽວ ອາທິດໜ້ານີ້ ອີງຕາມກະຊວງການຕ່າງປະເທດສະຫະລັດ.
ການເຈລະຈາຂອງທ່ານນາງເຊີແມນ ຈະກວມເອົາເລື້ອງຄວາມໝັ້ນຄົງຕ່າງໆໃນພາກພື້ນ ທີ່ລວມມີການຍິງລູກສອນໄຟຂອງເກົາຫຼີເໜືອ ແລະໄຕ້ຫວັນນຳດ້ວຍ. ລັດຖະມົນຕີການຕ່າງປະເທດສະຫະລັດ ທ່ານແອນໂທນີ ບລິງເກັນ ໄດ້ກ່າວໃນວັນຈັນຜ່ານມານີ້ ວ່າ ຈີນ ໄດ້ຕັດສິນໃຈທີ່ຈະນຳເອົາໄຕ້ຫວັນໄປຢູ່ພາຍໃຕ້ການຄວບຄຸມຂອງຕົນ ບາງທີອາດດ້ວຍການໃຊ້ກຳລັງ “ໃນຊ່ວງໄລຍະເວລາໄວທີ່ໄວຂຶ້ນ.”
“ໄຕ້ຫວັນເປັນສ່ວນໃຫຍ່ຂອງ” ຄວາມໝັ້ນຄົງໃນພາກພື້ນ ທີ່ທ່ານນາງເຊີແມນ ວາງແຜນທີ່ຈະປຶກສາກັບບັນດາພັນທະມິດໃນໂຕກຽວ, ເຈົ້າໜ້າທີ່ອະວຸໂສຂອງກະຊວງການຕ່າງປະເທດສະຫະລັດທ່ານນຶ່ງ ກ່າວເມື່ອວັນພະຫັດໃນລະຫວ່າງ ການປະຊຸມສະຫລຸບໂດຍຫຍໍ້ ທາງໂທລະສັບ. ເຈົ້າໜ້າທີ່ທ່ານນີ້ ກ່າວອີກວ່າ “ພວກເຮົາຄາດໝາຍວ່າ ບັນຫາຄວາມເຂົ້າໃຈທີ່ແຕກຕ່າງກັນ ຂ້າມຊ່ອງແຄບໄຕ້ຫວັນ ຈະຖືກແກ້ໄຂດ້ວຍວິທີທາງທີ່ສັນຕິ.”
