ຍີ່ປຸ່ນສັນຍາວ່າ ຈະລົດປະລິມານນໍາເຂົ້ານໍ້າມັນຈາກອິຣ່ານ ເພື່ອສະໜັບສະໜຸນການລົງ
ໂທດຂອງສະຫະລັດທີ່ແນເປົ້າໝາຍເພື່ອກົດດັນໃຫ້ອິຣ່ານຍຸຕິໂຄງການນີວເຄລຍທີ່ເປັນ
ຫົວຂໍ້ຂັດແຍ້ງກັນນັ້ນ.
ທ່ານ Jun Azumi (ຈຸນ ອະຊູມີ) ລັດຖະມົນຕີການເງິນຂອງຍີ່ປຸ່ນ ກ່າວເມື່ອວັນພະຫັດ
ມື້ນີ້ວ່າຍີ່ປຸ່ນທີ່ກາງຕໍ່ນໍ້າມັນຈາກອິຣ່ານໃນປະລິມານ 10 ເປີເຊັນຂອງຕົນນັ້ນຈະເອົາບາດ
ກ້າວທີ່ໜັກແໜ້ນເພື່ອຕັດຈໍານວນນໍ້າມັນທີ່ນໍາເຂົ້າຈາກອິຣ່ານ ໂດຍກ່າວຕື່ມວ່າ ຍີ່ປຸ່ນຕັ້ງ
ໃຈທີ່ຈະລົດການນຳເຂົ້ານໍ້າມັນໃນປະລິມານ 10 ເປີເຊັນຈາກອິຣ່ານ ໃນລັກສະນະທີ່ວາງ
ແຜນໄວ້ໃຫ້ໄວທີ່ສຸດເທົ່າທີ່ຈະໄວໄດ້.
ທ່ານອະຊູມີກ່າວວ່າ ຍີ່ປຸ່ນໄດ້ລົດປະລິມານການນຳເຂົ້ານໍ້າມັນຈາກອິຣ່ານ ລົງໄປເທື່ອລະ
ໜ້ອຍແລ້ວ ໃນໄລຍະຫ້າປີຜ່ານມາ ຊຶ່ງທ່ານ ອະຊູມີ ກ່າວ ອີກວ່າ ລັດຖະບານໂຕກຽວ
ເຂົ້າໃຈດີເຖິງບັນຫານີວເຄລຍຂອງອິຣ່ານທີ່ໄດ້ສ້າງຄວາມເປັນຫ່ວງແກ່ນານາຊາດ ໂດຍ
ກ່າວວ່າ ການພັດທະນາໃດໆກໍຕາມທາງດ້ານນີວເຄລຍນັ້ນເປັນສິ່ງທີ່ທົ່ວທັງໂລກຈະເມີນ
ເສີຍບໍ່ໄດ້ ດັ່ງນັ້ນພວກເຮົາຈຶ່ງເຂົ້າໃຈດີໃນທ່າທີຂອງສະຫະລັດ.
ທ່ານ ອະຊູມີ ໄດ້ໃຫ້ຄວາມຄິດເຫັນດັ່ງກ່າວນີ້ ຫລັງຈາກໄດ້ພົບປະກັບທ່ານ Timothy
Geithner ລັດຖະມົນຕີການເງິນສະຫະລັດ ທີ່ໄດ້ສະແດງຄວາມຍິນດີໃນທັນທີກ່ຽວກັບ
ການເຄຶ່ອນໄຫວນີ້ ຊຶ່ງທ່ານ Geithner ກ່າວວ່າ ພວກເຮົາຂໍຍ້ອງຍໍສັນເສີນຍີ່ປຸ່ນຫລາຍ
ທີ່ສຸດ ທີ່ໄດ້ຢືນຢັດຢູ່ກັບສະຫະລັດ ແລະປະຊາຄົມໂລກ ໃນການສະໜັບສະໜຸນວັດຖຸ
ປະສົງຍຸທະສາດສໍາຄັນທີ່ສຸດນີ້.
ທ່ານ ໄກ້ທ໌ເນີ ພວມຢູ່ໃນລະຫວ່າງການເດີນທາງຢ້ຽມຢາມຈີນແລະຍີ່ປຸ່ນເປັນເວລາສາມ
ວັນ. ຊຶ່ງການຢ້ຽມຢາມຂອງທ່ານ ໄກ້ທ໌ເນີ ຄັ້ງນີ້ ກໍເພື່ອຄໍ້າປະກັນການສະໜັບສະໜຸນ
ຈາກນານາຊາດສໍາລັບການລົງໂທດຕ່າງໆຂອງສະຫະລັດ ທີ່ຫ້າມພວກທະນາຄານຕ່າງ
ປະເທດບໍ່ໃຫ້ປະກອບທຸລະກິດການເງິນກັບທະນາຄານກາງຂອງອິຣ່ານ ທີ່ກຳກັບນຳ
ການຊື້ນໍ້າມັນໂດຍສ່ວນໃຫຍ່ໃນອິຣ່ານ ຈາກພວກຕະຫລາດການເງິນສະຫະລັດນັ້ນ.
