ພວກທະຫານເຮືອແລະທະຫານມາຣິນໃນກຸ່ມໂຈມຕີຂອງກໍ່າປັ່ນບັນທຸກເຮືອບິນ USS Ronald Reagan ໄດ້ສົ່ງເຮືອບິນເຮລີຄອບເຕີຫລາຍລໍາ ບັນທຸກເຄື່ອງຂອງໃຊ້ ສ່ວນຕົວແລະເຄື່ອງໃຊ້ເພື່ອຄວາມຢູ່ລອດ ໄປຊ່ອຍເຫລືອພວກຊາວຍີ່ປຸ່ນທີ່ຖືກພັດພາກຈາກບ້ານເຮືອນ ຍ້ອນໄພແຜ່ນດິນໄຫວແລະຄື້ນຟອງຍັກສຸນາມິ ເມື່ອວັນທີ 11 ຜ່ານມານັ້ນ.
ພັນຕີ Justin Harts ເຈົ້າໜ້າທີ່ຝ່າຍການຮ່ວມມືດ້ານຄວາມປອດໄພໃນສະໜາມລົບ ກ່າວຢູ່ໃນໜ້າ Facebook ຂອງກໍາປັ່ນວ່າ ຄໍາຮຽກຮ້ອງຂໍການບໍລິຈາກໄດ້ຮັບການຕອບສະໜອງຢ່າງຖ້ວມລົ້ນຈາກພວກລູກເຮືອໃນກໍ່ປັ່ນບັນທຸກເຮືອບິນແລະພວກເຮືອຕິດຕາມຕ່າງໆ. ນາງ Kimberly Schoenberg ໃນກໍາປັ່ນ Ronald Reagan ກ່າວວ່າ ພວກລູກເຮືອໄດ້ພາກັນຊື້ສິ່ງຂອງຕ່າງໆຈາກຮ້ານ ຂາຍເຄື່ອງໃນກໍາປັ່ນຈົນໝົດ ແລະບັນຈຸໃສ່ເຮືອບິນເຮລີຄອບເຕີ 12 ລໍາ ທີ່ເຕັມ ໄປດ້ວຍເຄື່ອງໃຊ້ທີ່ຈໍາເປັນເຊ່ນ ຜ້າເຊັດໜ້າເຊັດໂຕ ເຄື່ອງນຸ່ງຫົ່ມກັນໜາວ ຢາຖູແຂ້ວແລະສະບູ ເປັນຕົ້ນ.
ກໍາປັ່ນບັນທຸກເຮືອບິນ Ronald Reagan ແລະພວກເຮືອສະໜັບສະໜຸນ ກໍາລັງລອຍລໍາຢູ່ນອກຝັ່ງທະເລກໍ້າຕາເວັນອອກສຽງເໜືອຂອງເກາະ Honshu ຂອງຍີ່ປຸ່ນ ເພື່ອໃຫ້ການຊ່ອຍເຫລືອພວກຜູ້ຄົນ ທີ່ໄດ້ຮັບຜົນກະທົບຈາກໄພພິບັດແຜ່ນດິນໄຫວແລະຄື້ນຟອງຍັກສຸນາມິ ໃນວັນທີ 11 ນັ້ນ. ຝຸງເຮືອລົບຂອງສະຫະລັດເຫລົ່ານີ້ ກໍາລັງຈະມຸ້ງໜ້າໄປຍັງເກົາຫລີໃຕ້ເພື່ອເຂົ້າປະກອບສ່ວນໃນການຊ້ອມລົບທາງທະເລ ແຕ່ໄດ້ຫັນໄປຊ່ອຍເຫລືອກູ້ໄພທີ່ຍີ່ປຸ່ນ ຫລັງຈາກເກີດໄພແຜ່ນດິນໄຫວແລ້ວນັ້ນ.
