ປະທານາທິບໍດີບາຣັກໂອບາມາ ໄດ້ເຕືອນເຈົ້າໜ້າທີ່ອີຣ່ານວ່າ ພວກເຂົາເຈົ້າຈະປະເຊີນກັບ
ການລົງໂທດຢ່າງໜັກທີ່ສຸດເທົ່າທີ່ເປັນໄປໄດ້ ໃນການສົມຮູ້ຮ່ວມຄິດວາງແຜນລອບສັງຫານ
ເອກອັກຄະລັດຖະທູດ Saudi Arabia ຕາມທີ່ມີການສົງໄສກັນນັ້ນ.
ທ່ານໂອບາມາໄດ້ກ່າວທີ່ກຸງວໍຊິງຕັນໃນວັນພະຫັດວານນີ້ວ່າ ພວກເຈົ້າໜ້າທີ່ໃນລະດັບສູງ
ສຸດຂອງລັດຖະບານອີຣ່ານ ຈະຕ້ອງເປັນຜູ້ຮັບຜິດຊອບ ໃນການວາງແຜນທີ່ແປກປະຫຼາດ ຊຶ່ງທ່ານເອີ້ນວ່າເປັນພາກສ່ວນນຶ່ງຂອງແບບຢ່າງໃນການປະພຶດທີ່ເປັນໄພອັນຕະລາຍແລະ
ບໍ່ມີການໄຕ່ຕອງ. ປະທານາທິບໍດີໂອບາມາເວົ້າວ່າສະຫະລັດຈະບໍ່ຍົກເວັ້ນທາງເລືອກໃດໆ
ທີ່ຕົນມີຢູ່ໃນການຮັບມືກັບອີຣ່ານນັ້ນ.
ຂະນະດຽວກັນກະຊວງການຕ່າງປະເທດສະຫະລັດໃຫ້ການຢືນຢັນວ່າ ເຈົ້າໜ້າທີ່ອະເມຣິ
ກັນໄດ້ຕິດຕໍ່ໂດຍກົງ ກັບລັດຖະບານອີຣ່ານ ກ່ຽວກັບການກ່າວຫາທີ່ວ່ານີ້. ສະຫະລັດບໍ່ມີ ຄວາມສຳພັນທາງດ້ານການທູດກັບອີຣ່ານນັບແຕ່ປີ 1980 ເປັນຕົ້ນມາ.
ອີຣ່ານໄດ້ປະຕິເສດຕໍ່ຂໍ້ກ່າວຫາເຫຼົ່ານີ້ ໂດຍທີ່ເຈົ້າໜ້າທີ່ຄົນນຶ່ງຂອງອີຣ່ານເອີ້ນເຫດການນີ້
ວ່າເປັນເລື່ອງໄຮ້ສາລະ.
ກ່ອນໜ້ານັ້ນ Saudi Arabia ໄດ້ກ່າວຫາອີຣ່ານວ່າ ຊອກສະແຫວງຫາ ອິດທິພົນນາໆ
ຊາດດ້ວຍການຄາດຕະກຳ ແລະຄວາມໂກລາຫົນວຸ້ນວາຍ. ລັດຖະມົນຕີການຕ່າງປະເທດ
Saudi Arabia ເຈົ້າຊາຍ Saud al-Faisal ກ່າວວ່າຣິຢາດພວມດຳເນີນງານເພື່ອເອົາ
ມາດຕະການຕອບໂຕ້. ທ່ານເວົ້າວ່າ ປະເທດຂອງທ່ານ ຈະບໍ່ຍອມກົ້ມຫົວຮັບເອົາການກົດ
ດັນຂອງອີຣ່ານແລະຈະຖືວ່າເຕຫະຣ່ານເປັນຜູ້ຮັບຜິດຊອບໃນການດຳເນີນການໃດໆກໍຕາມ
ຕໍ່ຜົນປະໂຫຍດຂອງ Saudi Arabia.
