ກໍາປັ່ນກອງທັບເຮືອສະຫະລັດລໍານຶ່ງໄດ້ຊ່ອຍກູ້ຊີວິດຊາວອີຣ່ານ 13 ຄົນທີ່ຖືກພວກໂຈນ
ສະລັດຈັບເປັນໂຕປະກັນໃນທະເລອາຣາເບຍ ໃນເວລາຫລາຍມື້ຫລັງຈາກອີຣ່ານເຕືອນ
ພວກກໍາປັ່ນຂອງສະຫະລັດ ບໍ່ໃຫ້ກັບຄືນໄປຍັງອ່າວເປີເຊຍນັ້ນ.
ກອງທັບເຮືອສະຫະລັດປະກາດໃຫ້ຮູ້ໃນວັນສຸກວານນີ້ວ່າ ຕົນພົບເຫັນເຮືອຂະໜາດເບົາ
ລໍານຶ່ງຂອງພວກໂຈນສະລັດ ແລ່ນຮຽງຂ້າງກັບເຮືອປະມົງ Al Molai ຂອງອີຣ່ານໃນວັນ
ພະຫັດມື້ກ່ອນນີ້ ຫລັງຈາກໄດ້ຮັບການຂໍຮ້ອງຄວາມຊ່ອຍເຫລືອຈາກເຮືອອີຣ່ານລໍາດັ່ງກ່າວ.
ກອງທັບເຮືອສະຫະລັດກ່າວວ່າ ພວກທະຫານທີມນຶ່ງຈາກເຮືອພິຄາດ USS Kidd ໄດ້
ເຂົ້າໄປໃນເຮືອຂອງອີຣ່ານລໍານີ້ ແລະໄດ້ຈັບກຸມພວກໂຈນສະລັດ 15 ຄົນໃນເຮືອທີ່ຈັບ
ຊາວປະມົງອີຣ່ານເປັນໂຕປະກັນຢູ່ນັ້ນ.
ກອງທັບເຮືອສະຫະລັດກ່າວວ່າ ເຮືອປະມົງອີຣ່ານລໍານີ້ ໄດ້ຖືກພວກໂຈນສະລັດຄອບ
ຄອງມາໄດ້ເດືອນປາຍແລ້ວ ແລະໄດ້ໃຊ້ເຮືອລໍາດັ່ງກ່າວເປັນກອງບັນຊາການໃຫຍ່ສໍາລັບ
ການປະຕິບັດງານຂອງພວກໂຈນສະລັດ ແລະກ່າວຕື່ມວ່າ ເຊື່ອກັນວ່າພວກໂຕປະກັນ
ເຫລົ່ານີ້ໄດ້ຖືກບັງຄັບໃຫ້ຊ່ອຍເຫລືອພວກໂຈນສະລັດມາ.
ໂຄສົກຍິງປະຈໍາກອງທັບເຮືອສະຫະລັດກ່າວຕໍ່ນັກຂ່າວວີໂອເອໃນວັນສຸກວານນີ້ວ່າ
ທີມທະຫານເຮືອຂອງສະຫະລັດຮູ້ຈັກເລື້ອງນີ້ມາກ່ອນ ກ່ອນການຊ່ອຍກູ້ຊີວິດພວກ
ໂຕປະກັນວ່າ ເຮືອປະມົງລໍານີ້ຕິດທຸງຊາດອີຣ່ານ. ຮ້ອຍໂທ Rebecca Rebarich
ກ່າວວ່າ ພວກກໍາປັ່ນຂອງສະຫະລັດແມ່ນຖືກບັງຄັບໃຫ້ຊ່ອຍກູ້ຊີວິດພວກເດີນທາງ
ທາງເຮືອຄົນໃດໆກໍຕາມທີ່ຕົກຢູ່ໃນສະພາບອັນຕະລາຍ ໂດຍບໍ່ຄໍານຶງເຖິງສັນຊາດ
ໃດໆ.
ຮ້ອຍໂທ Rebarich ກ່າວວ່າ ຫົວໜ້າເຮືອຂອງຊາວອີຣ່ານໄດ້ສະແດງຄວາມຮູ້ບຸນ
ຄຸນຢ່າງຈິງຈັງມາຍັງກອງທັບເຮືອສະຫະລັດ ໂດຍກ່າວວ່າ ທ່ານຢ້ານວ່າ ຖ້າບໍ່ມີ
ການຊ່ອຍເຫລືອຈາກສະຫະລັດນັ້ນ ພວກລູກເຮືອດັ່ງກ່າວຈະຖືກກັກເປັນໂຕປະກັນ
ຕື່ມອີກຫລາຍເດືອນກໍເປັນໄດ້.
ກອງທັບເຮືອສະຫະລັດກ່າວວ່າ ຕົນໄດ້ໃຫ້ອາຫານແລະໃຫ້ການຮັກສາພະຍາບານ
ແກ່ພວກໂຕປະກັນເຫລົ່ານັ້ນ.
