ລິ້ງ ສຳຫລັບເຂົ້າຫາ

ອີຣ່ານ ທົດລອງ ລູກສອນໄຟ ເພື່ອຕອບໂຕ້ ຕໍ່ການຂົ່ມຂູ່ ຂອງສັດຕູ

  • ທອງປານ ເທບວົງສາ

ສູນຄວບຄຸມນີວເຄຼຍແຫ່ງນຶ່ງຂອງອິຣ່ານ

ອິຣ່ານກ່າວ​ວ່າ ຕົນ​ໄດ້​ທົດ​ລອງ​ຍິງ​ລູກ​ສອນ​ໄຟ​ຂີ​ປະ​ນາ​ວຸດ​ໄລຍະ​ກາງ​ໄດ້​ຢ່າງ​ສໍາ​ເລັດຜົນ ຊຶ່ງ​ບັນດາ​ນັກ​ຊ່ຽວຊານ​ກ່າວ​ວ່າ ​ເປັນ​ລູກ​ສອນ​ໄຟ​ທີ່ມີ​ຄວາມ​ສາມາດໄປ​ເຖິງອີສຣາ​ແອ​ລ​ໄດ້.

ສື່​ມວນ​ຊົນ​ທາງ​ການ​ອິຣ່ານ​ໄດ້​ອ້າງ​ເອົາ​ຄໍາ​ເວົ້າ​ຂອງ​ເຈົ້າໜ້າ​ທີ່​ລະດັບ​ສູງຄົນ ນຶ່ງ​ຂອງ​ໜ່ວຍ​ພິທັກ​ການ​ປະຕິວັດ​ຂອງ​ອິຣ່ານ ຫຼື IRGC ​ເມື່ອ​ວັນ​ອັງຄານ​ທີ່​ເວົ້າ​ວ່າ ການ​ຊ້ອມ​ລົບ​ທີ່​ໂຮມ​ທັງ ການ​ຍິງລູກ​ສອນ​ໄຟ ລຸ້ນ Shahab 3 ທີ່​ມີ​ລັດສະໝີ​ໄກ​ເຖິງ 1,300 ກິ​ໂລ​ແມັດ ລຸ້ນ Shahab 1 ​ແລະ 2 ທີ່ມີ​ລັດສະໝີ​ໃກ້​ກວ່າ​ແລະ​ລູກ​ສອນ​ໄຟຊະນິດ​ອື່ນໆ​ກໍ​ມີ​ການ​ຍິງທົດ​ລອງ​ໃນ​ລະ ຫວ່າງ​ສອງ​ມື້ຜ່ານ​ມານັ້ນ​ນໍາ.

ທ່ານ Hossein Salami ຮອງ​ຜູ້​ບັນຊາ​ການ​ໜ່ວຍ IRGC ກ່າວ​ວ່າ ການ​ຊ້ອມ​ລົບ​ກັນຫຼາຍບັ້ນ​ນີ້ ​ເປັນ​ການ​ຕອບ​ໂຕ້​ໂດຍ​ກົງ​ຕໍ່​ພວກສັດຕູ​ຂອງ​ອິຣ່ານ ທີ່​ເວົ້າ​ເຖິງ​ເລຶ່ອງ ທາງ​ເລືອກ​ທາງ​ທະຫານ ທີ່​ຍົກ​ຂຶ້ນມາ​ເຈລະຈາ​ກັນນັ້ນ.

​ກຸ່ມ​ປະ​ເທດ​ຕາ​ເວັນ​ຕົກ​ສົງໄສ​ວ່າ ​ອີຣ່ານຕ້ອງການ​ຈະ​ສ້າງ​ອາວຸດ​ນີວ​ເຄຼຍ ຊຶ່ງ​ບັນດາ​ເຈົ້າໜ້າ​ທີ່​ອິຣ່ານ ກໍ​ເຄີຍ​ໄດ້​ເວົ້າຂົ່ມຂູ່​ຜ່ານ​ມາວ່າ​ ຈະ​ລຶບ​ອີສຣາ​ແອ​ລອອກ​ຈາກ​ແຜນ​ທີ່​ໂລກ. ອີສຣາ​ແອ​ລ ກໍ​ໄດ້​ແຍ້ມ​ໃຫ້​ເຫັນ​ເຖິງການ​ໂຈມ​ຕີ​ ທີ່​ອາດມີ​ຂື້ນຖ້າ​ຫາກ​ຄວາມ​ພະຍາຍາມ​ດ້ານ​ການ​ທູດ​ແລະ​ການ​ລົງ ​ໂທດ​ຕ່າງໆ​ບໍ່​ປະສົບ​ຜົນ​ສໍາ​ເລັດ ​ເພື່ອ​ລົບ​ລ້າງ​ຄວາມ​ໄຝ່ຝັນໃນ​ການ​ຢາກ​ມີ ອາວຸດນີວ​ເຄຼຍຂອງ​ອິຣ່ານ.

ການ​ຫ້າມ​ຊື້​ນໍ້າມັນ​ຈາກ​ອິຣ່ານຂອງ​ສະຫະພາບ​ຢູ​ໂຣບ ທີ່ໝາຍ​ເຖິງ​ເພື່ອ​ກົດ ດັນ​ອິຣ່ານ ກ່ຽວ​ກັບ​ໂຄງການ​ນີວ​ເຄຼຍຂອງ​ຕົນ ​ເລີີ່​ມມີ​ຜົນ​ບັງຄັບ​ໃຊ້​ໄປ​ຕັ້ງ ​ແຕ່​ວັນ​ອາທິດ​ຜ່ານ​ມາ.

​ໃນ​ຂະນະ​ດຽວ​ກັນ ໜັງສືພິມ New York Times ລາຍ​ງານ​ວ່າ​ ສະຫະ ລັດ ​ໄດ້​ທໍາ​ການ​ເຄຶ່ອນ​ໄຫວ​ເສີມ​ກໍາລັງທະຫານຢ່າງ​ໃຫຍ່ ​ເຂົ້າ​ໄປ​ໃນ​ເຂດ​ອ່າວ​ເປີ​ເຊຍ ​ເພື່ອ​ສະກັດ​ກັ້ນບໍ່​ໃຫ້​ອິຣ່ານດຳ​ເນີນຄວາມ​ພະຍາຍ​າມທີ່​ເປັນ​ໄປ​ໄດ້​ເພື່ອ​ປິດ​ຊ່ອງ​ແຄບ Hormuz ນັ້ນ.

ການ​ຂົນ​ສົ່ງ​ນໍ້າມັນ​ທາງ​ທະ​ເລຂອງ​ໂລກ ສາມ​ສິບ​ຫ້າ​ເປີ​ເຊັນ ​ແມ່ນ​ຜ່ານ ຊ່ອງ​ແຄບ​ດັ່ງກ່າວໃນ​ປັດຈຸບັນ​ນີ້.

John Kirby ​ກັບຕັນກອງທັບ​ເຮືອ​ສະຫະລັດ ກ່າວ​ເມື່ອ​ວັນ​ອັງຄານ​ວານ​ນີ້​ວ່າ ສະຫະລັດ​ມີ​ເຮືອ​ກວດ​ທຸ່ນ​ລະ​ເບີດ​ແປ​ດລໍາ ​ປະ​ຈໍາ​ການ​ຢູ່​ອ່າວ​ເປີ​ເຊຍ ຊຶ່ງທ່ານ​ກ່າວ​ວ່າ ມີ​ຈໍານວນເພີ່ມ​ຂຶ້ນຈາກເມື່ອ​ບໍ່​ເທົ່າ​ໃດ​ເດືອນ​ຜ່ານ​ມາ. ທ່ານຮັບ​ຮູ້ວ່າ ເຮືອ​ປະຈັນບານ U.S.S Ponce ກໍ​ຢູ່​ໃນ​ອ່າວ​ເຊັ່ນ​ກັນ ​ແຕ່ ທ່ານ​ກ່າວ​ອີກ​ວ່າ ທ່ານ​ບໍ່​ເຫັນ​ຮ່ອງຮອຍ​ກິດຈະ​ກໍາທີ່​ຜິດ​ປົກກະຕິ​ໃດໆ​ຂອງ ອິຣ່ານຢູ່​ໃນ​ຂົງ​ເຂດ​ດັ່ງກ່າວ.

XS
SM
MD
LG