ລິ້ງ ສຳຫລັບເຂົ້າຫາ

ສຫລ ສືບສວນ ຄວາມເປັນໄປໄດ້ ໃນການນຳໃຊ້ ອາວຸດ ເຄມີ ຢູ່ຊີເຣຍ (ວີດີໂອ)


ເຈົ້າ​ໜ້າ​ທີ່​ສະຫະລັດກ່າວ​ວ່າ ພວກ​ເຂົາ​ເຈົ້າໄດ້​ຮັບຮ່ອງຮອຍ
ທີ່ສະແດງໃຫ້ເຫັນວ່າ ມີການນຳ ໃຊ້ສານພິດ​ເຄມີ ໃນ​ເຂດ
​ພວກ​ຕໍ່ຕ້ານລັດຖະບານຢູ່ຊີ​ເຣຍ ​ໃນ​ເດືອນ​ນີ້.

​ໂຄສົກ​ຂອງ​ທຳນຽບຂາວ ທ່ານ Jay Carney ​ໄດ້​ກ່າວ​ໃນ
​ວັນ​ຈັນ​ວານ​ນີ້​ວ່າ ມີການ​ກ່າວ​ຫາ​ກ່ຽວກັບການ​ໂຈມ​ຕີ​ຕໍ່​ບ້ານ
​ Kafr Zita ທາງ​ພາກ​ຕາ​ເວັນ​ຕົກຂອງປະ​ເທດ ທີ່​ພົວພັນ​
ກັບ​ການ​ໃຊ້ສານອຸດສາຫະກຳ​ເຄມີ ຊຶ່ງ​ອາດ​ຈະ​ແມ່ນ Chlorine.

ທ່ານ Carney ກ່າວ​ວ່າ: “ພວກ​ເຮົາ​ກຳລັງ​ທຳ​ການກວດ​ສອບ
ກ່ຽວກັບການໂຈມຕີ ທີ່ມີການ ກ່າວຫາວ່າ ລັດຖະບານເປັນ​
ຜູ້​ຮັບຜິດຊອບ. ພວກເຮົາຖືວ່າການກ່າວຫາຕ່າງໆກ່ຽວກັບການນຳໃຊ້ອາວຸດ
ເຄມີຢູ່ໃນສະໜາມລົບຢ່າງຈິງຈັງ ​ແລະ​ພວກ​ເຮົາ​ກໍ​ກຳລັງ​ເຮັດ​ວຽກ ວິ​ເຄາະເບິ່ງ
ວ່າ​ ແມ່ນ​ຫຍັງ​ໄດ້​ເກີດ​ຂຶ້ນ​ແທ້. ພວກ​ເຮົາ​ຍັງ​ຈະ​ສືບ​ຕໍ່ປຶກສາ​ແລະ​ແບ່ງປັນ​ຂໍ້​ມູນ
ກັບ​ບັນດາປະເທດພາຄີທີ່ສຳຄັນໆ ຊຶ່ງ​ຮວມທັງ ​ແນ່ນອນ​ກໍຄື ອົງການ​ເກືອດ
ຫ້າມ ໃນການນຳໃຊ້ອາວຸດ​ເຄມີ ຫຼື OPCW.”


ອົງການ OPCW ໄດ້​ເຮັດວຽກ​ຮ່ວມກັບ​ອົງການ​ສະຫະ​ປະຊາ​ຊາ​ດ ທີ່ຈະ​ເຮັດ​ໃຫ້​ຊີ​ເຣຍ
ປອດ​ຈາກ​ການ​ມີ​ອາວຸດ​ເຄມີ​ນັ້ນ. ອົງການ OPCW ​ກ່າວໃນອາທິດ​ວ່າ ປະມານ 80 ສ່ວນ​ຮ້ອຍ ຂອງອາວຸດ​ເຄມີເຫຼົ່ານີ້ ແມ່ນ​ຖືກ​ຍົກ​ຍ້າ​ຍອອກ​ຈາກ​ຊີ​ເຣຍ​ ຫຼື​ບໍ່​ກໍໄດ້​ຖືກ​ທຳລາຍໄປແລ້ວ.

​ໂຄສົກ​ຂອງ​ກະຊວງ​ການ​ຕ່າງປະ​ເທດສະຫະລັດ ທ່ານ​ນາງ Jen Psaki ​ໄດ້​ກ່າວ​ໃນ​ວັນ​ຈັນ​ວານ​ນີ້​ວ່າ ສານ Chlorine ​ແມ່ນ​ບໍ່​ໄດ້​ຮວມຢູ່​ໃນ​ບັນຊີລາຍ​ຊື່​ຂອງສານ​ເຄມີ ທີ່​ທາງ​ການ​ຊີ​ເຣຍໄດ້ປະກາດໃຫ້ຮູ້ໃນ​ປີ​ກາຍ​ນີ້ ​ໃນ​ຕອນ​ທີ່​ຕົນ​ໄດ້​ຕົກລົງ​ທີ່​ຈະ​ທຳລາຍ​ອາ​ວຸດ​ເຄມີ ​ໃນ​ຄວາມ​ກົດ​ດັນ​ຂອງ​ນາໆ​ຊາດ​ນັ້ນ.
XS
SM
MD
LG