ລິ້ງ ສຳຫລັບເຂົ້າຫາ

ວັນເສົາ, ໒໐ ເມສາ ໒໐໒໔

ໜ່ວຍສືບລັບ ສຫລ ກ່າວຫາ ຣັດເຊຍ ທ່ານ Putin ວ່າ ຢາກຊ່ວຍ ທ່ານທຣຳ ໃຫ້ຊະນະ


ສ່ວນນຶ່ງຂອງເອກກະສານລັບ ທີ່ຫາກໍຖືກເປີດເຜີຍ ຊຶ່ງຊັ່ງຊາ ກ່ຽວກັບຄວາມພະຍາຍາມຂອງຣັດເຊຍ ທີ່ໄດ້ແຊກແຊງ ເຂົ້າໃນການເມືອງຂອງສະຫະລັດ. (6 ມັງກອນ 2016)
ສ່ວນນຶ່ງຂອງເອກກະສານລັບ ທີ່ຫາກໍຖືກເປີດເຜີຍ ຊຶ່ງຊັ່ງຊາ ກ່ຽວກັບຄວາມພະຍາຍາມຂອງຣັດເຊຍ ທີ່ໄດ້ແຊກແຊງ ເຂົ້າໃນການເມືອງຂອງສະຫະລັດ. (6 ມັງກອນ 2016)

ປະທານາທິບໍດີຣັດ​ເຊຍ ທ່ານ Vladimir Putin ​ເລີ້ມ​ແຜນການບ່ອນ​ທຳລາຍການ​ເລືອກ​ຕັ້ງ​ສະຫະລັດ ​ໃນ​ປີ 2016 ແລະ​ເຮັດ​ໃຫ້​ອະດີດ​ລັດຖະມົນຕີ​ການ​ຕ່າງປະ​ເທດ​ສະຫະລັດ ທ່ານນາງ Hillary Clinton ບໍ່​ເປັນ​ທີ່​ໜ້າ​ເຊື່ອ​ຖື ດ້ວຍ​ການ​ໃຊ້ “ອິດ​ທິພົນ​ໃນ​ການ​ປຸກລະ ດົມ” ​ແບບບໍ່​ເຄີຍ​ມີ​ມາ​ກ່ອນ ຊຶ່ງ​ໃນ​ທີ່​ສຸດ​ກໍ​ໄດ້​ຊ່ອຍ​ຕັດສິນ ​ເຮັດ​ໃຫ້ປະທານາທິບໍດີ​ທີ່​ຖືກ​ເລືອກ​ໃໝ່ ທ່ານ Donald Trump ມີ​ໂອກາດ ອີງ​ຕາມ​ລາຍ​ງານ​ລັບ​ທີ່​ຖືກ​ເປີດ​ເຜີຍ​ໂດຍ​ປະຊາ​ຄົມ​ສືບ​ລັບ​ຂອງ​ສະຫະລັດ.

“​ເປົ້າໝາຍ​ຂອງຣັດ​ເຊຍ ​ກໍ​ຄື​ ບ່ອນ​ທຳລາຍ​ຄວາມ​ເຊື່ອ​ໝັ້ນ ຂອງ​ປະຊາຊົນ ​ໃນ​ຂັ້ນຕອນ​ການ​ເລືອກຕັ້ງ​ ແບບ​ປະຊາທິປະ​ໄຕ​ຂອງ​ສະຫະລັດ ສົບ​ປະໝາດ ​ລັດຖະມົນຕີ​ການ​ຕ່າງ ປະ​ເທດ Clinton ​ແລະ​ສ້າງ​ຄວາມ​ເສຍ​ຫາຍ ໃຫ້​ແກ່​ໂອກາດ ​ທີ່​ທ່ານ​ນາງ ​ຈະ​ໄດ້​ຖືກຮັບ ເລືອກ” ອີງ​ຕາມລາຍ​ງານ​ທີ່​ນຳ​ອອກ​ເຜີຍ​ແຜ່​ໃນຕອນ​ແລງ​ວັນ​ສຸກ​ວານ​ນີ້​.

ລາຍ​ງານ​ກ່າວ​ຕໍ່​ໄປ​ວ່າ “ພວກ​ເຮົາ​ຍັງ​ໄດ້ຊັ່ງຊາ​ຕື່ມ​ວ່າ ທ່ານ Putin ​ແລະ​ລັດຖະບານຣັດ​ເຊຍ ​ໄດ້​ຕັ້ງ​ເປົ້າໝາຍໄວ້​ຢ່າງ​ຈະ​ແຈ້ງ ສຳລັບ​ທ່ານ Trump ປະ ທາ​ນາ​ທິບໍດີ​ທີ່​ຖືກ​ເລືອກ​ໃໝ່ ທ່ານ Putin ​ແລະ​ລັດຖະບານຣັດ​ເຊຍມີ​ຄວາມປາຖະໜາຈະ​ຊ່ອຍໃຫ້ທ່ານ Trump ມີ​ໂອກາດຈະ​ໄດ້​ຮັບ​ເລືອກ​ຫຼາຍຂຶ້ນ ​ເທົ່າທີ່​ຈະ​ຫຼາຍ​ໄດ້.”

ການ​ເປີດ​ເຜີຍ​ລາຍ​ງານ​ດັ່ງກ່າວໂດຍ​ອົງການ​ສືບ​ລັບທີ່​ສຳຄັນ​ສຸດ 3 ອົງການ​ຂອງສະຫະ ລັດ ມີ​ຂຶ້ນບໍ່​ເທົ່າ​ໃດ​ຊົ່ວ​ໂມງ​ ຫລັງ​ຈາກ ​ພວກ​ຫົວໜ້າ​ໜ່ວຍ​ສືບ​ລັບ ​ໄດ້​ລາຍງານ​ແບບ​ປິດ​ລັບ​ຕໍ່​ທ່ານ Trump ທີ່​ນະຄອນ​ນິວຢອກ. ປະທານາທິບໍດີບາຣັກ​ໂອ​ບາ​ມາທີ່​ກຳລັງ​ຈະ​ພົ້ນ ຈາກ​ຕຳແໜ່​ງຊຶ່ງ​ໄດ້​ສັ່ງ​ໃຫ້​ເຮັດ​ລາຍ​ງານ​ນີ້ໄດ້​ຖືກ​ແຈ້ງ​ໃຫ້​ຊາບ​ກ່ຽວ​ກັບ​ເອກ​ກະສາ​ນ​ເຫຼົ່າ ນີ້ໃນ​ວັນ​ພະຫັດ​ຜ່ານ​ມາ.

ຢູ່​ໃນ​ລາຍ​ງານ​ດັ່ງກ່າວ ທັງ​ອົງການ​ສືບ​ລັບ​ຊີ​ໄອ​ເອ​ແລະ​ອົງການ​ສັນຕິ​ບານ​ກາງ FBI ຂອງ​ສະຫະລັດ​ຕ່າງ​ກໍ​ກ່າວ​ວ່າ ຕົນ​ມີ “ຄວາມ​ເຊື່ອ​ໝັ້ນ​ເປັນ​ຢ່າງ​ສູງ” ກ່ຽວກັບ​ການ​ສະຫຼຸບ​ຂອງ​ລາຍ​ງານ​ນີ້. ສ່ວນ​ອົງການ​ສືບ​ລັບ​ທີ​ສາມ ຄື​ອົງການ​ຄວາມໝັ້ນຄົງ​ແຫ່ງ​ຊາດ ​ໃນ​ຂະນະ​ທີ່​ເຫັນ​ພ້ອມແຕ່​ກໍ​ກ່າວ​ວ່າ ຕົນ​ມີ​ຄວາມ​ເຊື່ອ​ໝັ້ນ​ໃນລະ​ດັບ “ປານ​ກາງ​” ​ເທົ່າ​ນັ້ນໃນ​ການ​ພົບ​ເຫັນ​ດັ່ງກ່າວ.

​ໃນ​ຕອນ​ແລງວັນ​ສຸກ​ວານ​ນີ້ ທ່ານ Trump ​ແທນ​ທີ່​ຈະ​ກ່າວໂຈມ​ຕີ​ທ່ານ Putin ​ແລະຣັດ​ເຊຍ ທີ່ໄດ້​ແຊກ​ແຊງ ​ເຂົ້າ​ໃນ​ການ​ເລືອກ​ຕັ້ງ ຂອງ​ສະຫະລັດ ກັບ​ສົ່ງ​ຂໍ້ຄວາມ ​ຜ່ານ​ທາງ Twitter ຖິ້ມ​ໂທດ​ໃສ່​ພັກ​ເດ​ໂມ​ແຄຣັດທີ່​ຖືກ​ໂຈມ​ຕີ. ຂໍ້ຄວາມຂອງ​ທ່ານ Trump ມີ​ເນື້ອ​ ໄນ​ວ່າ “ການ​ບໍ່​ເອົາ​ໃຈ​ໃສ່​ໂດຍ​ລວມ ຂອງ​ຄະນະ​ກຳມະການ​ແຫ່ງ​ຊາດພັກ​ເດ​ໂມ​ແຄຣັດ​ເປີດ​ໂອກາດໃຫ້​ມີ​ການ​ເຈາະ​ຂໍ້​ມູນ​ເກີດ​ຂຶ້ນ.” ທ່ານ​ກ່າວ​ຕໍ່​ໄປ​ວ່າ “ຄະນະ​ກຳມະການ​ແຫ່ງ​ຊາດ​ພັກຣີພັບ​ບລີ​ກັນ ​ມີ​ການປ້ອງ​ກັນ​ທີ່​ເຂັ້ມ​ແຂງ” ​ໂດຍ​ບໍ່​ໄດ້​ກ່າວອ້າງ​ອີງ​ເຖິງ​ການ​ແຊກ​ແຊງ​ຂອງຣັດ​ເຊຍ ​ເຂົ້າ​ໃນ​ການ​ເລືອກ​ຕັ້ງ ທີ່​ບັນດາ​ໜ່ວຍ​ສືບ​ລັບ​ຂອງ​ສະຫະລັດ​ກ່າວ​ວ່າ ທີ່ໄດ້​ແນ​ໃສ່​ເພື່ອ​ຊ່ອຍ​ທ່ານ​ໃຫ້​ຊະນະ​ນັ້ນ.

ອ່ານຂ່າວນີ້ຕື່ມເປັນພາສາອັງກິດ

XS
SM
MD
LG