ທ່ານ Richard Holbrooke ທູດພິເສດຂອງສະຫະລັດວ່າ
ດ້ວຍກິດຈະການອັຟການິສຖານແລະປາກິສຖານ ຢູ່ໃນອາ
ການສາຫັດຫລັງຈາກຜ່າຕັດອອກມາທີ່ໂຮງໜໍແຫ່ງນຶ່ງໃນ
ນະຄອນຫລວງວໍຊິງຕັນ.
ພວກນາຍແພດໄດ້ທໍາການຜ່າຕັດທ່ານ Holbrooke ໃນວັນເສົາວານນີ້ ເພື່ອປົວແປງເສ້ນເລືອດໃຫຍ່ທີ່ແຕກ. ປະທານາທິບໍດີບາຣັກໂອບາມາ ໄດ້ອອກຖະແຫລງການສະບັບນຶ່ງ ໃນແລງວັນເສົາວານນີ້ ກ່າວວ່າ ທ່ານພ້ອມດ້ວຍສັດຕີໝາຍເລກນຶ່ງ ພາກັນໄຫວ້ວອນໃຫ້ທ່ານ Holbrooke ຊ່ວງເຊົາໂດຍໄວ. ປະທານາທິບໍດີ ໂອບາມາ ເອີ້ນທ່ານ Holbrooke ວ່າ ເປັນບຸກຄົນແກນນໍາໃນນະໂຍບາຍການ ຕ່າງປະເທດອະເມຣິກາ.
ນັກການທູດໄວ 69 ປີທ່ານນີ້ ເຄີຍຮັບໃຊ້ເປັນເອກອັກຄະລັດຖະທູດສະຫະລັດ ປະຈໍາສະຫະປະຊາຊາດ ແລະເຄີຍເປັນຫົວໜ້າໃນການຮ່າງສົນທິສັນຍາສັນຕິ ພາບທີ່ໄດ້ລົງນາມກັນໃນເມືອງ Dayton ລັດ Ohio ໃນປີ 1995 ທີ່ໄດ້ເຮັດໃຫ້ສົງຄາມໃນ Bosnia-Herzegovina ຍຸດຕິລົງນັ້ນ.
ທ່ານ Holbrooke ໄດ້ເຂົ້າໂຮງໝໍໃນວັນສຸກແລ້ວນີ້ ຫລັງຈາກຮູ້ສຶກບໍ່ສະບາຍໃນລະຫວ່າງການພົບປະຫາລືກັບທ່ານນາງ ຮິນລາຣີ ຄລິນຕັນ ລັດຖະມົນຕີການຕ່າງປະເທດສະຫະລັດ ທີ່ກະຊວງຕ່າງປະເທດໃນກຸງວໍຊິງຕັນ.