ລິ້ງ ສຳຫລັບເຂົ້າຫາ

ວັນອັງຄານ, ໑໙ ມີນາ ໒໐໒໔

ສະຫະລັດ ກຳລັງຈັບຕາເບິ່ງ ອິດທິພົນຂອງຈີນ ຢູ່ທີ່ອົງການສະຫະປະຊາຊາດ


ທຸງຊາດຂອງປະເທດຕ່າງໆ ຢູ່ດ້ານນອກຂອງສຳນັກງານໃຫຍ່ ອົງການສະຫະປະຊາຊາດ ໃນລະຫວ່າງ ກອງປະຊຸດສະມັດຊາໃຫຍ່ ຄັ້ງທີ 74 ຂອງອົງການສະຫະປະຊາຊາດ, ວັນທີ 28 ກັນຍາ 2019.
ທຸງຊາດຂອງປະເທດຕ່າງໆ ຢູ່ດ້ານນອກຂອງສຳນັກງານໃຫຍ່ ອົງການສະຫະປະຊາຊາດ ໃນລະຫວ່າງ ກອງປະຊຸດສະມັດຊາໃຫຍ່ ຄັ້ງທີ 74 ຂອງອົງການສະຫະປະຊາຊາດ, ວັນທີ 28 ກັນຍາ 2019.

ເອກອັກຄະລັດຖະທູດສະຫະລັດປະຈຳອົງການສະຫະປະຊາຊາດ ໄດ້ໃຫ້ຄຳໝັ້ນໃຈຕໍ່ລັດຖະສະພາ ໃນວັນພຸດວານນີ້ວ່າ ທ່ານນາງກຳລັງເຮັດວຽກເພື່ອຕິດຕາມ ແລະຄວບຄຸມສິ່ງທີ່ທ່ານນາງເອີ້ນວ່າ “ອິດທິພົນຮ້າຍ” ຂອງຈີນ ຢູ່ອົງການຈັດ ຕັ້ງລະດັບໂລກດັ່ງກ່າວ.

ເອກອັກຄະລັດຖະທູດ ລິນດາ ທອມມັສ-ກຣີນຟີລດ໌ ໄດ້ກ່າວຕໍ່ ຄະນະກຳມະ ການຄວາມສຳພັນກັບຕ່າງປະເທດຂອງສະພາຕ່ຳ ວ່າ “ຈີນໄດ້ມີທ່າທີແບບກ້າວລ້າວແລະບີບບັງຄັບໃນການໃຊ້ອຳນາດຂອງຕົນຢູ່ອົງການສະຫະປະຊາຊາດ.”

ທ່ານນາງ ໄດ້ກ່າວວ່າ ປັກກິ່ງສົ່ງເສີມ “ວິທີທາງແບບຜະເດັດການ ແທນວິທີຫຼາຍຝ່າຍຮ່ວມກັນ.”

ທ່ານເອກອັກຄະລັດຖະທູດ ໄດ້ຊີ້ໃຫ້ເຫັນເຖິງການກຳລັງເອົາບາດກ້າວຫຼາຍຢ່າງ ທີ່ລວມທັງ ການໃຊ້ອິດທິພົນຂອງຕົນຢູ່ທີ່ສາມອົງການຈັດຕັ້ງດ້ານວິຊາການຂອງສະຫະປະຊາຊາດ ບ່ອນທີ່ຜູ້ຕາງໜ້າຂອງພວກເຂົາ ຮັບຜິດຊອບນັ້ນ ແລະການນຳໃຊ້ຢາວັກຊີນກັນໂຄວິດ-19 ໃນດ້ານການທູດ ຂອງປັກກິ່ງ ເພື່ອກົດດັນບັນດາປະເທດທີ່ທຸກຍາກຈຳນວນນຶ່ງ.

ທ່ານນາງເວົ້າວ່າ “ພວກເຮົາຈະລົງໂທດຢ່າງໜັກຕໍ່ຄວາມພະຍາຍາມທັງຫຼາຍເຫຼົ່ານັ້ນ.”

ທ່ານນາງໄດ້ຮຽກຮ້ອງຕໍ່ບັນດາສະມາຊິກສະພາໃຫ້ລົງທຶນໃນອົງການສະຫະປະຊາຊາດ ເພື່ອຟື້ນຟູອິດທິພົນຂອງສະຫະລັດຄືນຢູ່ທີ່ແຫ່ງນັ້ນ ຊຶ່ງໄດ້ຫລຸດນ້ອຍຖອຍລົງ ໃນລະຫວ່າງລັດຖະບານຂອງທ່ານທຣຳ.

ທ່ານນາງທອມມັສ-ກຣີນຟີລດ໌ ໄດ້ກ່າວອີກວ່າ “ຄູ່ປໍລະປັກແລະຄູ່ແຂ່ງທັງຫຼາຍຂອງພວກເຮົາ ກຳລັງລົງທຶນເຂົ້າໃນອົງການສະຫະປະຊາຊາດ. ພວກເຮົາບໍ່ສາມາດຄາດຫວັງທີ່ຈະແຂ່ງຂັນໄດ້ ເວັ້ນເສຍແຕ່ວ່າພວກເຮົາເຮັດ ຄືກັນ.”

ສະມາຊິກສະພາຫຼາຍກວ່າ 40 ທ່ານ ໄດ້ສອບຖາມນັກການທູດລຸ້ນເກົ່າໃນໄລ ຍະຫຼາຍກວ່າສີຊົ່ວໂມງ ໃນລະຫວ່າງການພິຈາລະນາຮັບຟັງຄຳໃຫ້ການກ່ຽວກັບບູລິມະສິດຕ່າງໆຂອງລັດຖະບານທ່ານໄບເດັນ ສຳລັບການພົວພັນກັບອົງ ການສະຫະປະຊາຊາດ. ຫຼາຍທ່ານໄດ້ສະແດງຄວາມເປັນຫ່ວງກ່ຽວກັບການກົດຂີ່ຂົ່ມເຫັງຕໍ່ພວກຊົນກຸ່ມນ້ອຍຊາວມຸສລິມວີເກີຢູ່ເຂດປົກຄອງຕົນເອງໃນແຂວງຊິນຈຽງ.

ບັນດາກຸ່ມປົກປ້ອງສິດທິມະນຸດ ກ່າວຫາຈີນໃນການສົ່ງພວກຊາວວີເກີຫຼາຍກວ່ານຶ່ງລ້ານຄົນໄປສູນຄຸມຂັງແຫ່ງຕ່າງໆ. ຈີນກ່າວວ່າ ສະຖານທີ່ທັງຫຼາຍນັ້ນ ແມ່ນ “ສູນກາງສິດສອນວິຊາຊີບ” ທີ່ມີຈຸດປະສົ່ງເພື່ອຢຸດຢັ້ງການເຜີຍແຜ່ສາສະໜາຫົວຮຸນແຮງ ແລະການໂຈມຕີກໍ່ການຮ້າຍ.

ອ່ານຂ່າວນີ້ຕື່ມ ເປັນພາສາອັງກິດ

XS
SM
MD
LG