ລັດຖະມົນຕີການຕ່າງປະເທດສະຫະລັດ ທ່ານ John Kerry
ກ່າວຢໍ້າເຖິງການ ໃຫ້ຄວາມສະໜັບສະໜູນ ແກ່ຊາອຸດີ ອາຣາ
ເບຍ ທີ່ເປັນພັນທະມິດ ໃນຂະນະທີ່ທ່ານເສັດສິ້ນການຢ້ຽຢາມ
ປະເທດດັ່ງກ່າວ ໃນວັນອາທິດມື້ນີ້ ໂດຍກ່າວວ່າ ປະເທດທັງ
ສອງ ແມ່ນມີຄວາມສຳພັນຢ່າງແໜ້ນແຟ້ນ ແບບທີ່ບໍ່ເຄີຍມີ
ມາກ່ອນ.
ທ່ານ Kerry ກ່າວວ່າ “ບໍ່ມີຫຍັງປ່ຽນແປງ” ອັນເປັນຜົນເນື່ອງ
ມາຈາກຂໍ້ຕົກລົງ ທີ່ສະຫະລັດ ແລະຫ້າປະເທດມະຫາອຳນາດ
ໄດ້ເຊັນກັນກັບອີຣ່ານ ເພື່ອຫລຸດ ຜ່ອນໂຄງການນິວເຄລຍ
ໃນການແລກປ່ຽນ ກັບການຍົກເລີກການລົງໂທດທີ່ມີ ມູນຄ່າ
ຫລາຍພັນລ້ານໂດລາ.
ການໃຫ້ຄວາມເຫັນຂອງທ່ານ Kerry ແມ່ນຄ້າຍຄືກັນກັບຄວາມເຫັນທີ່ທ່ານໄດ້ກ່າວໃນວັນເສົາວານນີ້ ໃນຂະນະທ່ານພົບປະ ກັບເຈົ້າໜ້າທີ່ຂອງ ຊາອຸດີ ແລະບັນດາປະເທດໃນເຂດອ່າວເປີເຊຍ ທີ່ນະຄອນ Riyadh.
ການເຈລະຈາຫາລືນີ້ ມີຂື້ນລຸນຫລັງການເຄື່ອນໄຫວກ່ຽວກັບກິດຈະການຕ່າງໆທີ່ພົວພັນກັບອີຣ່ານ ຮວມທັງການຈັດຕັ້ງປະຕິບັດຂໍ້ຕົກລົງນິວເຄລຍ ການກັກຂັງເປັນເວລາສັ້ນໆຂອງອີຣ່ານ ແລະການປ່ອຍໂຕທະຫານເຮືອສະຫະລັດ 10 ຄົນ ແລະການເຈລະຈາແລກປ່ຽນ ທີ່ເປັນຜົນໃຫ້ຊາວອາເມຣິກັນສີ່ຄົນ ທີ່ຕິດຄຸກໃນອີ ຣ່ານຖືກປ່ອຍ. ຊາວອາເມຣິກັນຄົນທີຫ້າ ໄດ້ຖືກປ່ອຍໂຕໂດຍອີຣ່ານປະມານໃນເວລາດຽວກັນເມື່ອອາທິດແລ້ວນີ້.
ເຖິງແມ່ນວ່າໄດ້ມີການເຄື່ອນໄຫວເຫລົ່ານີ້ກໍຕາມ ລັດຖະມົນຕີການຕ່າງປະເທດ ຊາອຸດີ ທ່ານ Adel al-Jubeir ກ່າວວ່າ “ຂ້າພະເຈົ້າບໍ່ເຫັນວ່າ ຈະມີການເຂົ້າ ກັນໄດ້ແນວໃດ ລະຫວ່າງສະຫະລັດແລະອີຣ່ານ.”
