ທີ່ອັຟການິສຖານ ຜູ້ຊາຍຄົນນຶ່ງທີ່ນຸ່ງເຄື່ອງແບບທະຫານອັຟການິສຖານ ໄດ້ຍິງແລະສັງຫານ ນາຍພົນສະຫະລັດຄັນນຶ່ງ ແລະເຮັດໃຫ້ທະຫານສະຫະລັດ ແລະ ທະຫານນາໆຊາດ ໄດ້ຮັບບາດເຈັບອີກຫລາຍເຖິງ 15 ຄົນ ຢູ່ນະຄອນຫລວງ Kabul ໃນວັນອັງຄານວານນີ້.
ບັນດາເຈົ້າໜ້າທີ່ສະຫະລັດ ໄດ້ລະບຸຊື່ສຽງນາຍທະຫານຄົນດັ່ງ
ກ່າວວ່າ ແມ່ນ ນາຍພົນຕີ Harold Greene ທີ່ໄດ້ຮັບໃຊ້ກອງທັບ
ມາໄດ້ 34 ປີແລ້ວ. ທ່ານເປັນນາຍທະຫານຊັ້ນສູງສຸດຂອງສະຫະ
ລັດ ທີ່ໄດ້ຖືກສັງຫານໃນຂະນະປະຕິບັດໜ້າທີ່ ນັບຕັ້ງແຕ່ສົງຄາມ
ໃນອັຟການິສຖານ ໄດ້ເລີ້ມຂື້ນໃນປີ 2001.
ນາຍພົນ Greene ແລະບຸກຄົນອຶ່ນໆ ຮວມທັງນາຍພົນເຢຍລະມັນຄົນນຶ່ງ ໄດ້ຖືກຍິງ ໃນລະຫວ່າງການຢ້ຽມຢາມຕາມປົກກະຕິ ທີ່ມະຫາວິທະຍາໄລປ້ອງກັນຊາດ Marshal Fahim ຊຶ່ງເປັນສູນກາງອົບໂຮມທະຫານ ໃນນະຄອນຫລວງ Kabul.
ກະຊວງປ້ອງກັນປະເທດອັຟການິສຖານ ກ່າວເຖິງມືປືນວ່າ ເປັນພວກກໍ່ການຮ້າຍໃນຊຸດ
ເຄື່ອງແບບທະຫານອັຟການິສຖານ. ຜູ້ກ່ຽວກໍໄດ້ຖືກຍິງຕາຍຄືກັນ.
ວີດີໂອ: ໂຄສົກທຳນຽບຫ້າແຈ ປະກາດຂ່າວການໂຈມຕີ ຕໍ່ສື່ມວນຊົນ, ວັນທີ 5 ສິງຫາ:
ບັນດາເຈົ້າໜ້າທີ່ ສະຫະລັດແລະອັຟການິສຖານ ເຊື່ອວ່າ ການໂຈມຕີຄັ້ງນີ້ເປັນການ
ກະທຳຂອງຄົນພາຍໃນ ກໍຄືທະຫານອັຟການິສຖານ ຫັນມາໂຈມຕີທະຫານສະຫລັດ
ແລະກຳລັງຂອງພັນທະມິດ.
ປະທານາທິບໍດິອັຟການິສຖານ ທ່ານ Hamid Karzai ໄດ້ປະນາມການຍິງສັງຫານດັ່ງ
ກ່າວ ແລະສະແດງຄວາມເສົ້າສະລົດໃຈ ນຳຜູ້ເຄາະຮ້າຍທຸກໆຄົນ.
ອົງການສະຫະປະຊາຊາດໃນອັຟການິສຖານ ກ່າວເຖິງເຫດຮ້າຍຄັ້ງນີ້ວ່າ ເປັນໂສກນາດຕະກຳ.
