ລິ້ງ ສຳຫລັບເຂົ້າຫາ

ສະຫະລັດ ຊອກຫາທາງ ໃຫ້ພວກນັກສຶກສາ ຫົວກະທິ ທີ່ຮຽນຈົບແລ້ວ ຢູ່ຕໍ່ໄດ້ (ເບິ່ງວີດີໂອ)

  • ໄພສານ ວໍຣະຈັກ

ສະຫະລັດ ຊອກຫາທາງ ໃຫ້ພວກນັກສຶກສາ ຫົວກະທິ ທີ່ຮຽນຈົບແລ້ວ ຢູ່ຕໍ່ໄດ້ (ເບິ່ງວີດີໂອ)

ເວລາ​ນີ້ ລັດຖະສະພາສະຫະລັດພວມທຳການອະພິປາຍ ເລື່ອງການປັບປຸງລະບົບກວດຄົນ ເຂົ້າເມືອງຂອງປະເທດ ໃນຄວາມພະຍາຍາມເພື່ອຊັກຊວນໃຫ້ພວກນັກສຶກສາຕ່າງປະເທດ ທີ່ໄດ້ຮັບປລິນຍາບັດຊັ້ນສູງຂະແໜງສຳຄັນໆຕາມມະຫາວິທະຍາໄລແຫ່ງຕ່າງໆນັ້ນບໍ່ກັບຄືນ ປະເທດ ແລະເຮັດວຽກເຮັດການຢູ່​ໃນສະຫະລັດ ເພື່ອຊ່ວຍໃຫ້ອະເມຣິກາສືບຕໍ່ສາມາດທຳ ການແຂ່ງຂັນກັບໂລກໄດ້. ນາງ Meredith Buel ຜູ້ສື່ຂ່າວວີໂອເອ ມີລາຍງານກ່ຽວກັບ ເລື່ອງນີ້

ບາງຄົນເອີ້ນຄວາມ​ພະຍາຍາມນີ້ວ່າ ການຕ່າວປີ້ນ ການ​ໄຫລ​ໜີ​ຂອງສະໝອງຫົວກະທິ.
ພວກນັກສຶກສາຕ່າງປະເທດ ໄດ້ພາກັນຫຼັ່ງໄຫຼເຂົ້າມາຮຽນຕໍ່ຢູ່ຕາມມະຫາວິທະຍາໄລແຫ່ງ
ຕ່າງໆຂອງສະຫະລັດ ເພື່ອຮຽນເອົາປລິນຍາໂທ ແລະປລິນຍາເອກໃນດ້ານວິທະຍາສາດ
ເທັກໂນໂລຈີ ວິສະວະກຳແລະຄະນິດສາດ.

ແຕ່ຫຼາຍໆຄົນໃນຈຳນວນດັ່ງກ່າວ ເຊັ່ນທ້າວ Yifang Wei ຈາກ​ເມືອ​ຊີອານໃນພາກກາງ
ຂອງຈີນອາດຈະບໍ່ສາມາດໄດ້ຮັບວີຊ່າໃຫ້ເຮັດວຽກຢູ່ທີ່ສະຫະລັດໄດ້ຫຼັງຈາກຮຽນຈົບແລ້ວ.

ທ້າວ Yifang ເວົ້າວ່າ “ແມ່ນແລ້ວຂ້ອຍມີຄວາມວິຕົກຫຼາຍ ມີຄວາມກັງວົນເປັນທີ່
ສຸດ.”

ໃນປີ 2009 ພວກນັກສຶກສາຕ່າງປະເທດແມ່ນປະກອບເປັນຫຼາຍເຖິງສອງສ່ວນສາມຂອງ ພວກທີ່ໄດ້ຮັບປລິນຍາເອກໃນຂະ​ແໜງຟີສິກແລະວິສະວະກຳ ທີ່ສະຖາບັນການສຶກສາຂັ້ນ ສູງຕ່າງໆຂອງສະຫະລັດໄດ້ມອບໃຫ້ນັ້ນ.

ທ້າວ Xiao Qin ຈາກເຂດນະຄອນຫຼວງປັກກິ່ງ ເວລານີ້ກຳລັງຮຽນເອົາປລິນຍາເອກໃນ
ດ້ານ Computer Science ຈາກມະຫາວິທະຍາໄລ Georgetown ຢູ່ທີ່ກຸງວໍຊິງຕັນ.

ລາວເວົ້າວ່າ ລາວຢາກຈະເຮັດວຽກ ໃຫ້ກັບບໍລິສັດ Google, Yahoo ຫລື Microsoft.

ທ້າວ Xiao ເວົ້າວ່າ “ຈະແຈ້ງທີ່ສຸດພວກເຮົາ​ແມ່ນມັກຢາກຈະຢູ່ທີ່ນີ້ຕໍ່ຕື່ມອີກຫຼາຍໆ
ປີ ແຕ່ຖ້າພວກເຮົາຫາກບໍ່ສາມາດໄດ້ຮັບວີຊ່າຢູ່ຕໍ່ແລ້ວພວກເຮົາກໍຈຳເປັນຕ້ອງ
ໄດ້ຈາກໄປ.”

ສະຫະລັດມີ​ກົດໝາຍຈຳກັດຈຳນວນພວກນັກສຶກສາຕ່າງປະເທດທີ່ສາມາດຊອກເຮັດວຽກ
ເຮັດ​ການຢູ່ໃນສະຫະລັດ​ໄດ້ແລະພວກຕຳໜິຕິຕຽນເວົ້າວ່າ ນະໂຍບາຍຄົນເຂົ້າເມືອງທີ່ຈຳ
ກັດຮັດແຄບດັ່ງກ່າວ ສ້າງຄວາມເສຍຫາຍໃຫ້ແກ່ຄວາມສາມາດຂອງສະຫະລັດໃນການທີ່
ຈະຮັບເອົາພວກນັກສຶກສາທີ່ເກັ່ງໆເຫຼົ່ານີ້ໄວ້.

ທ່ານນາງ Zoe Lofgren ເປັນສະມາຊິກສະພາຕໍ່າສັງກັດພັກເດໂມແຄຣັທຈາກລັດຄາລີຟໍ
ເນຍ.

ສະມາຊິກສະພາຕໍ່າ Lofgren ເວົ້າວ່າ “ໃນຂະນະທີ່ຄັ້ງນຶ່ງພວກເຮົາເຄີຍຮ້ອງຂໍໃຫ້
ພວກທີ່ເກັ່ງທີ່ສຸດໃນໂລກເຂົ້າມາ ແລະມາຕັ້ງຖິ່ນຖານໃໝ່ຢູ່ທີ່ນີ້ ແຕ່ໃນເວລານີ້
ພວກເຮົາຊໍ້າພັດໄດ້ສົ່ງໃຫ້ພວກເຂົາເຈົ້າໜີໄປ. ຫຼັງ​ຈາກໄດ້​ໃຫ້ການສຶກສາ ແລະ
ຝຶກອົບຮົມ​ແກ່​ພວກນັກສຶກສາທີ່ເກັ່ງທີ່ສຸດຂອງ​ໂລກ ຢູ່ໃນມະຫາວິທະຍາໄລຂອງ
ພວກເຮົາ​ແລ້ວພວກເຮົາຊໍ້າພັດບໍ່ໃຫ້ການຕ້ອນຮັບພວກເຂົາເຈົ້າມາຊ່ອຍພັດທະ
ນາສ້າງສາໃຫ້ປະເທດນີ້ຈະເລີນຮຸ່ງເຮືອງຂຶ້ນຕື່ມ.”

ບັນດາບໍລິສັດຮາຍເທັກຕ່າງໆ​ໃນ​ສະຫະລັດ ​ແມ່ນໄປຮັບສະມັກເອົາພວກຄົນງານຢູ່ຕາມ
ມະຫາວິທະຍາໄລຊັ້ນນຳແຫ່ງຕ່າງໆຂອງປະເທດ.

ແຕ່ບາງບໍລິສັດ ເຊັ່ນ Texas Instruments ກ່າວວ່າ ມັນອາດຈະໃຊ້ເວລາ ດົນເຖິງ 10 ປີ ກ່ອນທີ່ພວກຄົນງານຕ່າງປະເທດຂອງເຂົາເຈົ້າຈະໄດ້ຮັບໃບອະນຸຍາດ ໃຫ້ຢູ່ໃນສະຫະລັດ
ຢ່າງເປັນການຖາວອນໄດ້.

ທ່ານນາງ Darla Whitaker ເປັນຮອງປະທານອະວຸໂສ ຂອງບໍລິສັດ Texas Instru-
ments.

ທ່ານນາງ Whitaker ເວົ້າວ່າ “​ສະພາບ​ການ​ແບບ​ນີ້​ຈະ​ປ່ອຍ​ໃຫ້​ມີ​ສືບ​ຕໍ່​ໄປ​ບໍ່​ໄດ້. ມັນ
ສ້າງຄວາມເສຍຫາຍໃຫ້ແກ່ບໍລິສັດແລະອຸສາຫະກຳຂອງພວກເຮົາແລະມັນໄດ້ສ້າງ
ພາລະທີ່ຍຸ່ງຍາກແລະຄວາມກົດດັນໃຫ້ແກ່ຄົນງານຂອງພວກເຮົາ.”

ໃນປັດຈຸບັນນີ້ ສະຫະລັດ​ແມ່ນຈຳກັດຈຳນວນພວກຄົນເຂົ້າເມືອງຈາກຕ່າງປະເທດເປັນແຕ່
ລະປະເທດໆໄປຊຶ່ງໝາຍຄວາມວ່າໂດຍທົ່ວໄປແລ້ວພວກນັກສຶກສາຈາກປະເທດໃຫຍ່ໆນັ້ນ
ຕ້ອງໄດ້ລໍຖ້າດົນທີ່ສຸດ.

ການສຶກສາສະບັບນຶ່ງເມື່ອໄວໆມານີ້ ໂດຍມູນນິທິແຫ່ງຊາດສຳລັບນະໂຍບາຍອະເມຣິກັນ
ແຈ້ງວ່າ ຊາວອິນເດຍທີ່ມີຄວາມສາມາດສູງນັ້ນອາດຈະຕ້ອງໄດ້ລໍຖ້າເຖິງ 70 ປີກ່ວາ​ຈະ​ໄດ້​
ຮັບສະຖານະ​ພາບ​ມີ​ສິດ​ອາ​ໄສ​ຢູ່ໃນສະຫະລັດໄດ້ຢ່າງເປັນການຖາວອນນັ້ນ.

ທ່ານ Vivek Wadhwa ໄດ້ທຳການຄົ້ນຄວ້າກ່ຽວກັບນັກວິສາວະກິດຕ່າງປະເທດທີ່​ເຂົ້າ
​ມາ​ຢູ່​ໃນ​ສະຫະລັດແລະສັງກັດຢູ່ໃນຄະນະອາຈານຂອງມະຫາວິທະຍາໄລ Harvard ແລະ
ມະຫາວິທະຍາໄລ Duke.

ທ່ານ Vivek ເວົ້າວ່າ “ພວກເຮົາເຮັດບໍ່ຖືກຕ້ອງກັບສະພາບການໂຕຈິງ. ພວກເຮົາຢູ່
ໃນເສດຖະກິດທີ່​ຮອບຮູ້ ຊຶ່ງທັງໝົດແມ່ນກ່ຽວກັບການແຂ່ງຂັນ. ຖ້າພວກເຮົາບໍ່ເອົາ ຜູ້ຄົນເຫຼົ່ານີ້ໄວ້ຖ້າພວກເຮົາບໍ່ແຂ່ງຂັນ ພວກເຮົາກໍຈະເປັນຜູ້ເສຍປຽບ. ພວກເຮົາກໍ ຈະກາຍເປັນປະເທດໂລກທີ 3 ແລະພວກເຂົາກໍຈະກາຍເປັນຄືກັນກັບພວກເຮົາ.”

ລັດຖະສະພາສະຫະລັດ ກຳລັງສຶກສາເບິ່ງຊ່ອງທາງຕ່າງໆ ເພື່ອປັບປ່ຽນນະໂຍບາຍຄົນ
ເຂົ້າເມືອງຂອງສະຫະລັດ.

ແຕ່ມາຮອດປັດຈຸບັນກໍຍັງບໍ່ທັນມີຄວາມເຫັນລົງຮອຍກັນເທື່ອກ່ຽວກັບວ່າຈະຕ່າວປີ້ນການ​
ໄຫລໜີ​ຂອງສະໝອງຫົວກະທິແບບໃດ ແລະປ່ອຍໃຫ້ພວກນັກສຶກສາທີ່ເກັ່ງໆ ເຊັ່ນທ້າວ
Yifang Wei ແລະ Xiao Qin ໃຫ້ຢູ່ໃນສະຫະລັດໄດ້ແບບໃດຫຼັງຈາກພວກເຂົາເຈົ້າຮຽນຈົບ
ຈາກມະຫາວິທະຍາໄລທີ່ມີຊື່ສຽງ​ເດ່​ນໆຂອງສະຫະລັດແລ້ວນັ້ນ.

XS
SM
MD
LG