ເບິ່ງວີດີໂອລາຍງານການໄປຂຶ້ນສານຂອງນາຍ George Zimmerman:
ນັກອາສາສະມັກຍາມຕາມຄຸ້ມ ທີ່ໄດ້ຖືກຟ້ອງຮ້ອງໃນຂໍ້ຫາຍິງທ້າວ Trayvon Martin
ເດັກໄວລຸ້ນອາຍຸ 17 ປີ ເຖິງຕາຍນັ້ນ ໄດ້ຖືກປ່ອຍອອກຈາກຄຸກ ໃນລັດ Florida ແລ້ວ
ຫລັງຈາກໄດ້ຮັບອະນຸຍາດໃຫ້ປະກັນຕົວ.
ນາຍ George Zimmerman ໄດ້ກ້າວອອກມາຈາກຄຸກ ປະມານທ່ຽງຄືນຂອງ ວັນອາທິດ
ວານນີ້ ໂດຍຍ່າງຊື່ໆ ບໍ່ມອງໜ້າໃຜ ຜ່ານບັນດາພວກຕາກ້ອງ ໄປຍັງລົດທີ່ຈອດລໍຖ້າຢູ່.
ສະຖານທີ່ເກັບຕົວຂອງຜູ້ກ່ຽວນັ້ນແມ່ນໄດ້ເກັບໄວ້ເປັນຄວາມລັບ ໃນຄະນະທີ່ຜູ້ກ່ຽວລໍຖ້າ
ເວລາໄປຂຶ້ນສານນັ້ນ, ແຕ່ລາວຈະຕ້ອງໄດ້ໃສ່ເຄື່ອງ electronic ທີ່ຈະໄດ້ຕິດຕາມລາວໄປ
ທຸກຫົນທຸກແຫ່ງ ເພື່ອເບິ່ງການເຄື່ອນໄຫວຂອງລາວນັ້ນ.
ຜູ້ພິພາກສາສານໄດ້ໃຫ້ປະກັນໂຕ ນາຍ Zimmerman ເປັນຈໍານວນເງິນ 150,000
ໂດລາ ໃນວັນສຸກຜ່ານມານັ້ນ ແລະກ່າວວ່າ ລາວຕ້ອງຢູ່ໃນເຮືອນບໍ່ໃຫ້ອອກໄປໃສ
ໃນຍາມຄໍ່າຄືນ ແລະບໍ່ສາມາດຖືອາວຸດໄດ້.
ນາຍ Zimmerman ອາຍຸ 28 ໄດ້ຖືກກ່າວຫາໃນຖານຄາດຕະກໍາຍິງຄົນຕາຍ ໂດຍບໍ່
ເຈດຕະນາ ໃນການຄາດຕະກໍານາຍ Trayvon Martin ເມື່ອວັນທີ 26 ກຸມພາຜ່ານມາ.
ລາວໄດ້ກ່າວຍອມຮັບວ່າ ໄດ້ຍິງເດັກໜຸ່ມຄົນນັ້ນຕາຍແທ້, ແຕ່ ກ່າວວ່າເດັກໜຸ່ມຄົນນັ້ນ
ໄດ້ໂຈມຕີລາວ ແລະວ່າການຍິງດັ່ງກ່າວນັ້ນເປັນການປ້ອງກັນຕົວ.
ເບິ່ງວີດີໂອລາຍງານກ່ຽວກັນໜ່ວຍອາສາສະມັກຍາມຄຸ້ມຄອງຄຸ້ມໃນສະຫະລັດ:
ໝາຍເຫດ: ຂ່າວນີ້ ບໍ່ໄດ້ອ່ານອອກວິທະຍຸ ຈຶ່ງບໍ່ມີສຽງ