ໃນການຕ່າວປີ້ນຢ່າງແຮງ, ປັດຈຸບັນນີ້ ອົງການສືບລັບຂອງສະຫະລັດກ່າວວ່າ ໃນບັນດາພະຍາດທີ່ລຶກລັບຫຼາຍຮ້ອຍຊະນິດທີ່ເປັນໄພຂົ່ມຂູ່ ແລະໃນບາງກໍລະນີ, ເຮັດໃຫ້ບຸກຄະລາກອນຂອງສະຫະລັດໃນທົ່ວໂລກໄຮ້ຄວາມສາມາດ ແມ່ນ ບໍ່ພົວພັນກັບການໃຊ້ອາວຸດໂດຍສັດຕູຂອງສະຫະລັດ.
ການປະເມີນຂ່າວກອງ ທີ່ຖືກເປີດເຜີຍໃນວັນພຸດ, ອີງຕາມສິ່ງທີ່ເຈົ້າຫນ້າທີ່ສືບລັບເວົ້າວ່າ ເປັນການສືບ ສວນທີ່ກວ້າງຂວາງແລະລະອຽດຖີ່ຖ້ວນໄດ້ສະຫຼຸບວ່າ "ບໍ່ຫນ້າຈະເປັນໄປໄດ້ຢ່າງຍິ່ງ" ທີ່ສັດຕູຕ່າງປະເທດ ຢູ່ເບື້ອງຫຼັງສິ່ງທີ່ເອີ້ນວ່າ ເຫດການສຸຂະພາບຜິດປົກກະຕິ (AHIs) ທີ່ເຮັດໃຫ້ຄົນງານສະຫະລັດ ໄດ້ຮັບຄວາມເດືອດຮ້ອນ ທັງຢູ່ຕ່າງປະເທດ ແລະຢູ່ໃນປະເທດ.
"ອາການທີ່ໄດ້ຖືກລາຍງານໂດຍບຸກຄະລາກອນສະຫະລັດ ອາດຈະເປັນຜົນມາຈາກປັດໄຈຕ່າງໆ ທີ່ບໍ່ກ່ຽວຂ້ອງກັບສັດຕູຕ່າງປະເທດ ເຊັ່ນ: ສະພາວະທີ່ເຄີຍເປັນມາກ່ອນແລ້ວ, ຄວາມເຈັບປ່ວຍທົ່ວໄປ ແລະປັດໄຈດ້ານສິ່ງແວດລ້ອມ," ການປະເມີນຂອງສະພາສືບລັບແຫ່ງຊາດກ່າວວ່າ.
"ຄວາມຫມັ້ນໃຈໃນຄໍາອະທິບາຍນີ້ແມ່ນໄດ້ຮັບການສະຫນັບສະຫນູນໂດຍຄວາມຈິງທີ່ວ່າພວກເຮົາໄດ້ກໍານົດປັດໄຈທາງການແພດ, ສິ່ງແວດລ້ອມ ແລະສັງຄົມ ທີ່ອະທິບາຍ AHIs ຈຳນວນຫຼາຍ ທີ່ລາຍງານໂດຍເຈົ້າຫນ້າທີ່ສະຫະລັດ," ບົດລາຍງານລະບຸຕື່ມ.
AHIs, ຊຶ່ງເອີ້ນກັນວ່າ ໂຣກ Havana Syndrome, ໄດ້ຖືກລາຍງານເປັນຄັ້ງທຳອິດ ໃນປີ 2016 ໃນບັນດານັກການທູດ ແລະພະນັກງານຄົນອື່ນໆ ທີ່ສະຖານ ທູດສະຫະລັດ ໃນນະຄອນຮາວານາ ປະເທດຄິວບາ.
