ກ່ອນກອງປະຊຸມສຸດຍອດສາມຝ່າຍທີ່ຮວມມີ ເກົາຫຼີໃຕ້, ຍີ່ປຸ່ນ, ແລະຈີນ ໃນທ້າຍອາທິດນີ້ ຢູ່ທີ່ນະຄອນຫຼວງໂຊລ, ວໍຊິງຕັນກ່າວວ່າຕົນຄາດຫວັງວ່າກອງປະຊຸມດັ່ງກ່າວຈະເປັນໂອກາດໃຫ້ສອງປະເທດພັນທະມິດຂອງຕົນ ຈະຈັດການກັບສາຍພົວພັນຂອງພວກເຂົາກັບປັກກິ່ງ.
ໂຄສົກກະຊວງການຕ່າງປະເທດກ່າວວ່າ "ສະຫະລັດ ເຄົາລົບຄວາມສາມາດຂອງ ປະເທດຕ່າງໆໃນການຕັດສິນໃຈກ່ຽວກັບອະທິປະໄຕເພື່ອຜົນປະໂຫຍດສຸູງສຸດຂອງປະຊາຊົນຂອງພວກເຂົາ".
"ເຊັ່ນດຽວກັນກັບທີ່ສະຫະລັດ ດຳເນີນຂັ້ນຕອນໃນການຈັດການຄວາມສຳພັນຂອງ ພວກເຮົາກັບ ສາທາລະນະລັດ ປະຊາຊົນຈີນ ຫຼື PRC ຢ່າງມີຄວາມຮັບຜິດ ຊອບ, ເຊັ່ນດຽວກັບບັນດາຄູ່ຮ່ວມງານ ແລະພັນທະມິດຂອງພວກເຮົາ," ທ່ານ ໂຄສົກໄດ້ກ່າວຢູ່ໃນອີເມລທີ່ສົ່ງເຖິງວີໂອເອພາສາເກົາຫຼີ ໃນວັນທີ 15 ພຶດສະພາທີ່ຜ່ານມາ.
ກອງປະຊຸມສຸດຍອດຄັ້ງນີ້ ມີຂຶ້ນທ່າມກາງຄວາມເຄັ່ງຕຶງທີ່ເພີ່ມຂຶ້ນລະຫວ່າງວໍຊິງຕັນ ແລະປັກກິ່ງ ກ່ຽວກັບການຄ້າ ແລະຫຼັງຈາກຈີນໄດ້ຕົກລົງກັບ ຣັດເຊຍ ໃນການສ້າງການຮ່ວມມື "ຍຸກໃໝ່" ເພື່ອສ້າງ "ຄວາມເປັນລະບຽບຮຽບຮ້ອຍຂອງໂລກຫຼາຍຂົ້ວ" ໃນລະຫວ່າງການປະຊຸມສຸດຍອດໃນອາທິດທີ່ຜ່ານມາ.
ຄາດວ່າ 3 ປະເທດເອເຊຍຕາເວັນອອກດັ່ງກ່າວ ຈະຈັດກອງປະຊຸມສຸດຍອດຄັ້ງນີ້ ໃນລະຫວ່າງວັນທີ 26 ຫາວັນທີ 27 ພຶດສະພານີ້, ແຕ່ຍັງບໍ່ທັນໄດ້ມີການປະ ກາດວັນເວລາຢ່າງເປັນທາງການເທື່ອ. ມີການຄາດການວ່າ ນາຍົກລັດຖະມົນຕີ ຈີນທ່ານ ຫຼີ ຈຽງ ຈະເຂົ້າຮ່ວມແທນປະທານປະເທດຈີນ ທ່ານສີ ຈິ້ນຜິງ ທີ່ຈະພົບປະກັບປະທານາທິບໍດີ ເກົາຫຼີ ທ່ານ ຢຸນ ຊຸກ ໂຢລ ແລະ ນາຍົກລັດຖະມົນຕີ ຍີ່ປຸ່ນ ທ່ານ ຟູມີໂອະ ກິຊິດະ.
ກອງປະຊຸມສຸດຍອດຄັ້ງນີ້ຈະເປັນກອງປະຊຸມສຸດຍອດສາມຝ່າຍຄັ້ງທຳອິດນັບແຕ່ເດືອນທັນວາ 2019.
ຟໍຣັມສະແດງຄວາມຄິດເຫັນ