ສະຫະລັດ ແລະພັນທະມິດທີ່ສຳຄັນ 3 ປະເທດໃນຢູໂຣບ ປະກອບມີອັງກິດ ຝຣັ່ງ ແລະ ເຢຍຣະມັນ ກ່າວວ່າ ຕົນຕ້ອງການທີ່ຈະລຶບລ້າງຄວາມບໍ່ຊັດແຈ້ງໃດໆກໍຕາມ ກ່ຽວກັບ ວ່າມີການລົງທຶນ ແລະເຮັດທຸລະກິດແນວໃດແດ່ທີ່ໄດ້ຮັບອະນຸຍາດ ຫລັງຈາກໄດ້ມີການ ເຊັນຂໍ້ຕົກລົງນິວເຄລຍກັນແລ້ວ.
ພວກເຮົາຂໍຊຸກຍູ້ໃຫ້ບໍລິສັດທັງຫລາຍສອບຖາມໄດ້ກັບລັດຖະບານຂອງພວກເຮົາ ເພື່ອ ແກ້ໄຂບັນຫາຂ້ອງໃຈທີ່ຍັງມີຢູ່ແທນທີ່ຈະປະປ່ອຍໃຫ້ໂອກາດຫລຸດລອຍໄປ ຍ້ອນມີການ ເຂົ້າໃຈຜິດຫຼືຂາດຂໍ້ມູນພຽງພໍ ອີງຕາມຄຳຖະແຫຼງຂອງກະຊວງຕ່າງ ປະເທດໃນວັນ ພະຫັດວານນີ້.
ສະຫະລັດ ແລະສະຫະພາບຢູໂຣບ ໄດ້ຍົກເລີກການລົງໂທດເກືອບທັງໝົດຕໍ່ອີຣ່ານໃນ ເດືອນມັງກອນຜ່ານມາ ຫລັງຈາກເຕຫະຣ່ານໄດ້ຕົກລົງທີ່ຈະຫລຸດຜ່ອນ ໂຄງການນິວ ເຄລຍຂອງຕົນ.
ແຕ່ແນວໃດກໍຕາມ ການລົງໂທດບາງຢ່າງຍັງມີຜົນບັງຄັບຢູ່ ຮວມທັງການລົງໂທດທີ່ພົວ ພັນໃນດ້ານສິດທິມະນຸດແລະບັນຫາການກໍ່ການຮ້າຍ.
ພວກທຸລະກິດຈຳນວນນຶ່ງຍັງມີຄວາມບໍ່ແນໃຈ ກ່ຽວກັບວ່າມີຫຍັງແດ່ທີ່ໄດ້ຮັບອະນຸຍາດ ແລະບໍ່ໄດ້ຮັບອະນຸຍາດໃຫ້ເຮັດໄດ້ ແລະດ້ວຍເຫດນີ້ຈຶ່ງບໍ່ເຂົ້າໄປລົງ ທຶນແລະເຮັດການ ຄ້າກັບອີຣ່ານ.
ກະຊວງການຕ່າງປະເທດກ່າວວ່າ ຕົນພ້ອມແລ້ວທີ່ຈະສະໜອງຂໍ້ແນະນຳແລະໃຫ້ຄວາມ ກະຈ່າງແຈ້ງຢ່າງວ່ອງໄວ.
ມັນເປັນຜົນປະໂຫຍດຂອງເຮົາ ແລະຂອງປະຊາຄົມນາໆຊາດ ທີ່ຈະໃຫ້ການຄ້ຳປະກັນ ວ່າ ແຜນການປະຕິບັດງານຮ່ວມຮອບດ້ານຫຼື JCPOA ເຮັດວຽກໃຫ້ຜູ້ທີ່ເຂົ້າຮ່ວມທຸກໆ ຝ່າຍ ຮວມທັງໃຫ້ຜົນປະໂຫຍດແກ່ປະຊາຊົນຊາວອີຣ່ານ.
ສະຫະລັດກ່າວວ່າ ນີ້ແມ່ນຮວມທັງການນຳສະເໜີຄືນບັນດາທະນາຄານ ແລະທຸລະກິດ ຂອງຢູໂຣບໃນອີຣ່ານອີກ.
