ວິກິດການການເງິນຂອງປະເທດກຣີສໄດ້ຄອບງໍາໄປທົ່ວພາກພື້ນຢຸໂຣບ ເປັນເວລາຫລາຍ
ອາທິດ ແລະ ໄດ້ກໍ່ໃຫ້ເກີດການເດີນຂະບວນປະທ້ວງຢ່າງຮຸນແຮງເປັນບາງຄັ້ງ ແລະການ
ນັດຢຸດງານທີ່ໄດ້ມີເລື້ອຍໆ ເພື່ອປະທ້ວງການຕັດການໃຊ້ຈ່າຍຂອງລັດຖະບານ ແລະຂຶ້ນ
ພາສີ ທີ່ແນເປົ້າໝາຍໃສ່ເພື່ອຫລີກລ່ຽງການຜິດສັນຍາຊໍາລະໜີ້ຈໍານວນມະຫາສານຂອງ
ລັດຖະບານກຣີສນັ້ນ. ບັດນີ້ ມີຄວາມເປັນຫ່ວງຂຶ້ນຕາມມາວ່າ ວິກິດການໜີ້ສິນອາດຈະ
ລຸກລາມໄປເຖິງອິຕາລີ ແລະສະເປນໄດ້.
ສ່ວນສະຫະລັດກໍປາກົດວ່າ ກໍາລັງດິ້ນຮົນກັບບັນຫາທາງດ້ານການເງິນຂອງຕົນເອງເຊັ່ນ
ກັນ. ບັນຫາທ້າທາຍຫລ້າສຸດຂອງສະຫະລັດ ກໍຄືການເພີ່ມລະດັບໜີ້ສິນຂອງລັດຖະບານ
ຂຶ້ນ ເພື່ອຫລີີກລ່ຽງການຜິດສັນຍາຊໍາລະໜີ້.
ພວກອົງການຕ່າງໆທີ່ຈັດລະດັບຄວາມໜ້າເຊື່ອຖືດ້ານສິນເຊື່ອຫລືເຄຣດິດ ແມ່ນກໍາລັງຂົ່ມ
ຂູ່ທີ່ຈະລົດລະດັບເຄຣດິດຂອງສະຫະລັດລົງ ອັນເປັນຂ່າວຮ້າຍສໍາລັບພວກປະເທດແລະ
ທະນາຄານທັງຫລາຍໃນຢຸໂຣບ ທີ່ກໍາພັນທະບັດຂອງສະຫະລັດໄວ້ໃນມູນຄ່າຫລາຍກວ່າ
700 ພັນລ້ານໂດລາ ໂດຍມີທະນາຄານແຫ່ງຊາດຂອງອັງກິດ ຫລື Bank of England
ຢູ່ລະດັບໜ້າ ຕິດຕາມດ້ວຍສະວິດເຊີແລນດ໌ ແລະຝຣັ່ງ. ການລົດລະດັບຄວາມໜ້າເຊື່ອຖື
ລົງດັ່ງກ່າວນັ້ນ ກໍຈະພາໃຫ້ມູນຄ່າພັນທະບັດເຫລົ່ານັ້ນ ຕົກຕໍ່າລົງໄປນໍາ ຊື່ງອາດສາມາດ
ສ້າງຄວາມສັບສົນວຸ້ນວາຍອັນໃຫຍ່ຫລວງ ໃນຕະຫລາດການເງິນໂລກໄດ້.
ທ່ານ ອຽນ ເບກ (Iain Begg) ນັກຄົ້ນຄວ້າທີ່ໂຮງຮຽນການເສດຖະກິດທີ່ກຸງລອນດອນ
ຫລື London School of Economics ກ່າວວ່າ ບັນຫາຂອງພາກພື້ນຢຸໂຣບ ໂຮມທັງ
ບັນຫາຢູ່ໃນສະຫະລັດນັ້ນ ແມ່ນຈະສົ່ງຜົນກະທົບຢ່າງມະຫາສານ ຕໍ່ເສດຖະກິດໂລກ.
ທ່ານ Iain Begg ເວົ້າວ່າ:
“ມັນບໍ່ແມ່ນຜົນກະທົບຮອບທໍາອິດຈາກບັນຫາຂອງທັງສອງຝ່າຍທີ່ຈະຮ້າຍແຮງ ແຕ່ມັນ
ແມ່ນຜົນສະທ້ອນທີ່ຈະຕິດຕາມມາຕໍ່ຈາກເຫດການນັ້ນ ທີ່ພວກເຮົາອາດຈະເອີ້ນໄດ້ວ່າ
ຜົນກະທົບຄື້ນຟອງສຸນາມິ ທີ່ມາຈາກແຜ່ນດິນໄຫວຄັ້ງທໍາອິດ ທີ່ຈະຮ້າຍແຮງຢ່າງໃຫຍ່ ຂະໜາດທີ່ຂ້າພະເຈົ້າຄິດວ່າ ຈະເຮັດໃຫ້ການຟື້ນຕົວຄືນຂອງເສດຖະກິດເສຍຫລັກແລະ
ພາໃຫ້ໂລກຕົກຢູ່ໃນສະພາວະຖອຍຫລັງ ອີກເທື່ອໃໝ່ກໍເປັນໄປໄດ້.”
ທ່ານ ເບກ ກ່າວຕໍ່ໄປວ່າ ບໍ່ວ່າມັນຈະອອກມາເປັນແບບໃດກໍຕາມ ມັນຈະບໍ່ແມ່ນເລຶ່ອງ
ງ່າຍໆ ສໍາລັບທະວີບໃດນຶ່ງທີ່ຈະຟື້ນຕົວຄືນໄດ້. ທ່ານ ເບກ ກ່າວວ່າ:
“ຢູ່ທັງສອງຟາກຝັ່ງຂອງມະຫາສະມຸດອັດແລນຕິກນັ້ນ ພວກເຮົາເຫັນແບບແປກໆຂອງ
ເສດຖະກິດການເມືອງແບບດຽວກັນ ທີ່ພະຍາຍາມຈະຊອກຫາວ່າ ຜູ້ໃດເປັນຜູ້ຮັບຜິດ
ຊອບ ແມ່ນໃຜຄວນຈະເອົາມາດຕາການອັນຮຸນແຮງນັ້ນກ່ອນໝູ່ ແມ່ນໃຜຄວນຈະໄດ້ຮັບ
ຄວາມເຈັບປວດ ຈາກການແກ້ໄຂບັນຫາ ໂດຍທີ່ຮູ້ວ່າຜູ້ໃດຜູ້ນຶ່ງຕ້ອງເປັນຜູ້ໄດ້ຮັບຄວາມ ເຈັບປວດນັ້ນ.”
ອັນຕະລາຍທີ່ເກີດຂຶ້ນຈາກ ວິກິດການໜີີ້ສິນທີ່ຊໍ້າເຮື້ອຂອງພວກປະເທດທີ່ໃຊ້ເງິນຢູໂຣນັ້ນ ແມ່ນໄດ້ເນັ້ນຍໍ້າໃຫ້ເຫັນໃນອາທິດນີ້ ໃນຂະນະທີ່ພວກເຈົ້າໜ້າທີ່ລັດຖະບານແລະທະນາ
ຄານພານິດຕ່າງໆ ຍັງຄົງແຕກແຍກກັນຢູ່ ກ່ຽວກັບແຜນການກອບກູ້ໜີ້ສິນຂອງກຣີສ ທີ່
ພວກປະເທດເຫລົ່ານັ້ນໄດ້ສະເໜີຂຶ້ນມາແຂ່ງກັນນັ້ນ.
ການຕັດສິນໃຈແມ່ນເປັນກຸນແຈໄປສູ່ຄວາມສໍາເລັດ ໃນການປ້ອງກັນວິກິດການໜີ້ສິນຂອງ
ຂົງເຂດ ບໍ່ໃຫ້ລາມໄປປະເທດອື່ນໆ.
ທ່ານ ສະຕູອາຕ ເຟລມມິ່ງ ເວົ້າວ່າ “ໂຣກຕິດຕໍ່ແບບນີ້ ມັນຍາກຫລາຍທີ່ສຸດທີ່ຈະຄວບ ຄຸມໄດ້”
ທ່ານ ສະຕູອາຕ ເຟລມມິ່ງ (Stewart Fleming) ນັກຄົ້ນຄວ້າປະຈໍາອົງການ Chatham
House ກ່າວວ່າ ສະຫະພາບຢຸໂຣບ ຄວນຈະເຄຶ່ອນໄຫວຢ່າງຕັ້ງໜ້າແຂງຂັນຫລາຍກວ່ານີ້ ເພື່ອປ້ອງກັນວິກິດການການເງິນຂອງກຣີສ ບໍ່ໃຫ້ສ້າງຄວາມເສຍຫາຍໃຫ້ແກ່ເຂດໃຊ້ເງິນຢູໂຣ
ນັ້ນ. ທ່ານ ເຟລມມິ່ງ ກ່າວຕໍ່ໄປວ່າ
“ວິກິດການໜີ້ສິນທີ່ຮ້າຍແຮງນັ້ນ ແມ່ນຈະສ້າງຄວາມຫາຍະນະໃຫ້ແກ່ການເສດຖະກິດ
ຂອງພາກພື້ນຢຸໂຣບ ແລະເກືອບວ່າແນ່ນອນ ແມ່ນຈະນໍາໄປສູ່ການແຕກຫັກລົງຂອງຂົງ
ເຂດທີ່ໃຊ້ເງິນຕາດຽວກັນນີ້. ສະນັ້ນ ມັນຈຶ່ງເປັນການສໍາຄັນຫລາຍ ທີ່ວ່າພາກພື້ນຢຸໂຣບ
ຈະຕ້ອງຄວບຄຸມໜີ້ສິນຂອງຕົນໄວ້ໃຫ້ໄດ້.”
ບໍ່ວ່າຮູບການມັນຈະອອກມາແບບໃດກໍຕາມ ຢູ່ໃນສະຫະລັດແລະພາກພື້ນຢຸໂຣບ ແຕ່ສິ່ງນຶ່ງ
ທີ່ພວກນັກເສດຖະສາດສ່ວນຫລາຍເຫັນພ້ອມນໍາກັນນັ້ນ ກໍແມ່ນວ່າ ເວລາກໍາລັງຈະໝົດໄປ
ແລ້ວສໍາລັບການຄວບຄຸມໂຣກຕິດຕໍ່ທາງດ້ານການເງິນຂອງຍຸກສະໄໝໃໝ່ຂອງພວກເຮົານັ້ນ.
