ສະຫະລັດແລະສະຫະພາບຢູໂຣບໄດ້ສະແດງຄວາມຫວັງໄປໃນແງ່ດີແບບລະມັດລະວັງໃນ
ມື້ວັນສຸກວານນີ້ ກ່ຽວກັບການສະເໜີຂອງອີຣ່ານ ທີ່ຈະໄຂການເຈລະຈາກ່ຽວກັບໂຄງການ
ນິວເຄລຍຂອງຕົນຄືນໃໝ່ກັບບັນດາປະເທດມະຫາອຳນາດຂອງໂລກ.
ໃນການຖະແຫຼງ ທີ່ກະຊວງການຕ່າງປະເທດສະຫະລັດໃນມື້ວານນີ້ ລັດຖະມົນຕີການຕ່າງ
ປະເທດສະຫະລັດ ທ່ານນາງ Hillary Clinton ແລະຜູ້ຮັບຜິດຊອບດ້ານນະໂຍບາຍການ
ຕ່າງປະເທດຂອງສະຫະພາບຢູໂຣບ ທ່ານນາງ Catherine Ashton ກ່າວວ່າ ຕົນພວມ
ຊັ່ງຊາຕີລາຄາເບິ່ງຈົດໝາຍຂອງອີຣ່ານເພື່ອ ຂໍເປີດການເຈລະຈາ ທີ່ຕົກຢູ່ໃນສະພາບບໍ່ໄປ
ບໍ່ມານັ້ນ ຄືນໃໝ່. ຈົດໝາຍຂອງທ່ານ Saeed Jalili ຫົວໜ້າເຈລະຈາໃນດ້ານນິວເຄລຍ
ຂອງອີຣ່ານສະບັບນີ້ ແມ່ນເປັນຄຳຕອບ ຕໍ່ຈົດໝາຍຂອງທ່ານນາງ Ashton ທີ່ສົ່ງໄປຫາ
ໃນເດືອນຕຸລາປີກາຍ.
ທ່ານນາງ Clinton ເອີ້ນການຕອບຂອງຝ່າຍອີຣ່ານວ່າ ເປັນບາດກ້າວທີ່ສຳຄັນ.
ກຸ່ມ P5+1 ແມ່ນປະກອບດ້ວຍ ສະມາຊິກຖາວອນ 5 ປະເທດ ໃນສະພາຄວາມໝັ້ນຄົງ
ຂອງອົງການສະຫະປະຊາຊາດ ຊຶ່ງມີ ສະຫະລັດ ອັງກິດ ຈີນ ຝຣັ່ງ ແລະຣັດເຊຍ ບວກ
ເຢຍຣະມັນ.
ທ່ານນາງ Ashton ຊຶ່ງເປັນຜູ້ຕາງໜ້າຂອງກຸ່ມ ໃນການຕິດຕໍ່ກັບອີຣ່ານນັ້ນ ກ່າວໃນມື້
ວັນສຸກວານນີ້ວ່າ ຈົດໝາຍຂອງອີຣ່ານໃຫ້ສັນຍານເຖິງຄວາມອາດສາມາດທີ່ເປັນໄປໄດ້
ທີ່ວ່າອີຣ່ານອາດພ້ອມແລ້ວທີ່ຈະເລີ່ມການເຈລະຈາຄືນໃໝ່.
ສະຫະລັດ ແລະສະພຫາບຢູໂຣບ ໄດ້ທຳການລົງໂທດໜັກຂຶ້ນຕໍ່ອີຣ່ານ ຍ້ອນມີຄວາມວິ
ຕົກກັງວົນວ່າ ອີຣ່ານກຳລັງພະຍາຍາຍາມທີ່ຈະສ້າງອາວຸດນິວເຄລຍ. ອີຣ່ານຢືນຢັດວ່າ
ໂຄງການນິວເຄລຍຂອງຕົນມີຈຸດປະສົງໃນທາງສັນຕິ.
ທ່ານນາງ Ashton ເວົ້າວ່າ ການລົງໂທດພວມໃຫ້ຜົນກະທົບ ແຕ່ປະຊາຄົມນາໆຊາດ
ຕ້ອງການແກ້ໄຂບັນຫານິວເຄລຍຂອງອີຣ່ານດ້ວຍການເຈລະຈາ.
ນອກນັ້ນແລ້ວ ໃນມື້ວານນີ້ ທຳນຽບຂາວກໍກ່າວວ່າ ທີ່ປຶກສາທາງດ້ານຄວາມໝັ້ນຄົງແຫ່ງ
ຊາດຂອງສະຫະລັດທ່ານ Tom Donilon ຈະເດີນທາງໄປອິສຣາແອລແຕ່ວັນທີ 18 ຫາ
ວັນທີ 20 ກຸມພານີ້ ເພື່ອປຶກສາຫາລືກ່ຽວກັບເລື່ອງອີຣ່ານ ຊີເຣຍແລະບັນຫາດ້ານຄວາມ
ໝັ້ນຄົງອື່ນໆຢູ່ໃນພູມີພາກ. ພວກຜູ້ນຳຂອງອິສຣາແອລໄດ້ເຕືອນຊໍ້າແລ້ວຊໍ້າອີກວ່າ ຕ້ອງ
ມີການປ້ອງກັນບໍ່ໃຫ້ອີຣ່ານໄດ້ຮັບອາວຸດນິວເຄລຍ.
