ເຈົ້າໜ້າທີ່ອະວຸໂສທ່ານນຶ່ງຂອງສະຫະລັດ ກ່າວວ່າ ບາງສ່ວນ ບໍ່ແມ່ນທັງໝົດ ຂອງພວກຫົວຮຸນແຮງ ທີ່ຍັງຕົກຄ້າງ ໄດ້ຖອນຕົວອອກໄປຈາກເຂດປອດທະຫານ ຢູ່ໃນແຂວງອິດລິບ ຂອງຊີເຣຍແລ້ວ 2 ມື້ ຫຼັງຈາກເສັ້ນຕາຍທີ່ສັ່ງໃຫ້ ຖອນກຳລັງຜ່ານໄປ.
ຜູ້ຕາງໜ້າພິເສດເຈມສ໌ ເຈັຟຟຣີ ກ່າວຕໍ່ພວກນັກຂ່າວໃນວັນພຸດວານນີ້ວ່າ “ຍັງມີຄຳຖາມບາງຢ່າງຢູ່ວ່າ ທຸກໆຄົນຈາກກຸ່ມຫົວຮຸນແຮງ ຮາຢັດ ຕາຫ໌ຣີກ ອາລ ແຊມ ທີ່ເອີ້ນຫຍໍ້ວ່າ HTS ນັ້ນ ໄດ້ຖອນອອກໄປໝົດແລ້ວຫຼືບໍ່. ແຕ່ປາກົດວ່າ ມີພວກກໍ່ການຮ້າຍຈຳນວນນຶ່ງ ໄດ້ຖອນອອກໄປຈາກເຂດດັ່ງກ່າວນັ້ນແລ້ວ.”
ກຸ່ມ HTS ທີ່ເປັນເຄືອຂ່າຍຂອງອາລກາອີດາ ເປັນກຸ່ມຫົວຮຸນແຮງທີ່ມີອິດທິພົນທີ່ສຸດ ໃນແຂວງອິດລິບຊຶ່ງເປັນເຂດສຳຄັນແຫ່ງສຸດທ້າຍຂອງຊີເຣຍ ທີ່ຍັງຄວບຄຸມໂດຍພວກຕໍ່ຕ້ານລັດຖະບານຢູ່.
ພ້ອມກັບການຖອນກຳລັງບາງສ່ວນຂອງພວກຫົວຮຸນແຮງອອກໄປນັ້ນທ່ານເຈັຟ ຟຣີ ກ່າວວ່າ ອາວຸດໜັກທັງໝົດ ໄດ້ຖືກຍົກຍ້າຍອອກໄປຈາກເຂດກັນຊົນແລ້ວ.
“ນີ້ແມ່ນບາດກ້າວທີ່ສຳຄັນ ຍ້ອນວ່າສິ່ງທີ່ໄດ້ເຮັດໄປແລ້ວນັ້ນ ແມ່ນເຮັດໃຫ້ບັນຫາຂັດແຍ້ງບໍ່ມີການເໜັງຕີ ບໍ່ພຽງແຕ່ຢູ່ທີ່ນັ້ນ ແຕ່ບັນຫາຂັດແຍ້ງຍັງບໍ່ມີການເໜັງຕີງຢູ່ໃນເກືອບວ່າທຸກໆແຫ່ງ.”
ແຂວງອິດລິບແມ່ນເຂດສຳຄັນແຫ່ງສຸດທ້າຍຂອງຊີເຣຍທີ່ຍັງຄວບຄຸມໂດຍພວກຕໍ່ຕ້ານລັດຖະບານ.
ພາຍໃຕ້ການຕົກລົງ ທີ່ໄກ່ເກ່ຍໂດຍຣັດເຊຍ ຊຶ່ງເປັນພັນທະມິດທີ່ສຳຄັນຂອງຊີເຣຍ ແລະເທີກີ ຊຶ່ງໃຫ້ການສະໜັບສະໜຸນພວກຕໍ່ຕ້ານລັດຖະບານນັ້ນ ກຳລັງຂອງທັງສອງຝ່າຍໄດ້ຕົກລົງທີ່ຈະຖອນກັບຄືນ ແລະສ້າງຕັ້ງເຂດປອດທະຫານຢູ່ໃນແຂວງອິດລິບ ຕາມເຂດຊາຍແດນ.
