ສະມາຊິກສະພາສູງສັງກັດພັກເດໂມແຄຣັດໄດ້ເປີດເຜີຍ
ຮ່າງກົດໝາຍວ່າດ້ວຍພະລັງງານສະບັບນຶ່ງທີ່ຈະເພີ້ມ
ຄວາມຮັບຜິດຊອບໃຫ້ແກ່ບໍລິສັດນໍ້າມັນໃນກໍລະນີທີ່
ເກີດການຮົ່ວໄຫຼ ແຕ່ໄດ້ຍົກເລີກຂໍ້ກຳນົດບາງຢ່າງກ່ຽວກັບ
ການຄວບຄຸມດິນຟ້າອາກາດທີ່ຮວມຢູ່ໃນຮ່າງກົດໝາຍທີ່
ສະພາຕໍ່າສະຫະລັດໄດ້ຮັບຜ່ານໃນປີກາຍນີ້.
ຜູ້ນຳພັກເດໂມແຄຣັດໃນສະພາສູງສະຫະລັດ ທ່ານ
HARRY REID ໄດ້ປະກາດຮ່າງກົດໝາຍສະບັບປານີ
ປານອມກັນ ໃນວັນອັງຄານວານນີ້ ແລະກ່າວວ່າ
ທ່ານຫວັງວ່າຈະນຳສະເໜີຮ່າງກົດໝາຍດັ່ງກ່າວຢ່າງເປັນທາງການພາຍໃນອາທິດນີ້.
ຂໍ້ສະເໜີຢູ່ໃນຮ່າງກົດໝາຍນີ້ໄດ້ລົບລ້າງວົງເງິນທີ່ຈຳກັດໄວ້ຄື 75 ລ້ານໂດລາທີ່ທາງ
ບໍລິສັດຕ້ອງຮັບຜິດຊອບສໍາລັບຄວາມເສຍຫາຍທາງເສດຖະກິດ ໃນກໍລະນີທີ່ມີການ
ຮົ່ວໄຫຼຂອງນໍ້າມັນ ແລະບໍ່ໄດ້ວາງຂີດຈຳກັດກ່ຽວກັບການປ່ອຍແກັສເຮືອນແກ້ວ ແຕ່ຈະ
ໃຫ້ສິນນໍ້າໃຈໃນການຊື້ລົດທີ່ແລ່ນໂດຍເຊື້ອໄຟທາງເລືອກ ແລະໃນການເຮັດໃຫ້
ເຮືອນຊານປະຫຍັດການໃຊ້ພະລັງງານໄດ້ຫລາຍຂຶ້ນ.
ພວກຜູ້ຊ່ອຍຂອງພັກເດໂມແຄຣັດກ່າວວ່າ ສະມາຊິກສະພາສູງຍັງບໍ່ມີຄະແນນສຽງ
ພຽງພໍໃນການທີ່ຈະຮັບຜ່ານຮ່າງກົດໝາຍວ່າດ້ວຍການປ່ຽນແປງຂອງດິນຟ້າອາກາດ
ໃນຂອບເຂດກວ້າງຂວາງກ່ວານີ້.
