ລິ້ງ ສຳຫລັບເຂົ້າຫາ

ສະຫະລັດຈັດການຝຶກອົບຮົມ ຕໍ່ຕ້ານເອດສ໌ແກ່ກອງທັບລາວ

  • ໄພສານ ວໍຣະຈັກ

ເຈົ້າໜ້າທີ່ລາວທີ່ເຂົ້າຮັບການຝຶກອົບຮົມ ກ່ຽວກັບເລື່ອງຫ້ອງວິໄຈແລະ ການກວດພວກທີ່ຕິດເຊື້ອ HIV ທີ່ບ້ານພັກໄມຕີຈິດນະຄອນຫຼວງວຽງ ຈັນ ແຕ່ວັນທີ 18 ຫາ 22 ກໍລະກົດ

ສະຖານທູດສະຫະລັດ ຮ່ວມກັບສູນກາງຕໍ່ຕ້ານເຊື້ອ HIV ແລະໂຣກເອດສ໌ ກະຊວງສາທາ
ລະນະສຸກແລະພະແນກແພດຂອງກອງທັບປະຊາຊົນລາວ ໄດ້ໃຫ້ການຝຶກອົບຮົມເປັນເວລາ
5 ມື້ກ່ຽວກັບເລື່ອງຫ້ອງວິໄຈແລະການກວດເຊື້ອ HIV ແລະໂຣກເອດສ໌ໃຫ້ແກ່ກອງທັບປະ
ຊາຊົນລາວແຕ່ວັນທີ 18 ຫາ 22 ກໍລະກົດ ທີ່ບ້ານພັກໄມຕີຈິດແລະສູນກາງວິໄຈແລະລະ
ບາດວິທະຍາ ແຫ່ງຊາດ ໃນເຂດນະຄອນຫຼວງວຽງຈັນ.

ການຝຶກອົບຮົມທີ່ວ່ານີ້ແມ່ນແນໃສ່ເພື່ອເສີມຂະຫຍາຍຄວາມສາມາດແລະຍົກລະດັບຄວາມ
ຮູ້ ກ່ຽວກັບເທັກນິກໃນການກວດຫາເຊື້ອ HIV ແລະໂຣກເອດສ໌ ຂອງກອງທັບປະຊາຊົນ
ລາວ. ພວກເຂົາເຈົ້າໄດ້ຮຽນຮູ້ ກ່ຽວກັບການນຳໃຊ້ອຸບປະກອນກວດຊະນິດໃໝ່ ເພື່ອຢາກ
ຮູ້ຈັກວ່າມີການຕິດເຊື້ອ HIV ຫຼືບໍ່. ຫຼັງຈາກໄດ້ຮັບການຝຶກອົບຮົມແລ້ວ ພວກທີ່ເຂົ້າຮ່ວມ
ທັງໝົດ ກໍຈະຄືນໄປຍັງກົມກອງຂອງພວກເຂົາເຈົ້າ ແລະທຳການກວດເບິ່ງພວກທີ່ຕິດເຊື້ອ
HIV ແລະໂຣກເອດສ໌ໃນໝູ່ພວກທະຫານເຂົ້າໃໝ່ ແລະທະຫານທີ່ກັບມາແຕ່ໄປສຶກສາຢູ່
ຕ່າງປະເທດ.

ການຝຶກອົບຮົມທີ່ວ່ານີ້ແມ່ນຈັດໃຫ້ມີຂຶ້ນໂດຍສູນກາງປ້ອງກັນເຊື້ອ HIV ແລະໂຣກເອດສ໌
ໂດຍມີຜູ້ເຂົ້າຮ່ວມ ຫຼາຍກວ່າ 12 ຄົນ ຈາກກົມກອງຕ່າງໆໃນເຂດນະຄອນຫຼວງວຽງຈັນ
ແຂວງຈຳປາສັກ ສະຫວັນນະເຂດ ຊຽງຂວາງ ແລະຫຼວງພະບາງ.

ໃນພິທີເປີດການອົບຮົມນັ້ນ ກໍມີພັນໂທ ດຣ. ຈັນທະພອນ ອຸດົມສຸກຫົວໜ້າແພດທະຫານ
ກະຊວງປ້ອງກັນປະເທດ ແລະ ດຣ. ຈັນສີ ພິມພະຈັນ ຜູ້ອຳນວຍການສູນກາງຕໍ່ຕ້ານເຊື້ອ
HIV ແລະໂຣກເອດສ໌ ກະຊວງສາທາລະນະສຸກ ໄປຮ່ວມ.

ໃນລະຫວ່າງການຝຶກອົບຮົມນັ້ນພວກເຂົ້າຮ່ວມໄດ້ຮຽນຮູ້ເລື່ອງທິດສະດີກ່ຽວກັບເຊື້ອ HIV
ແລະໂຣກເອດສ໌ແລະການຮຽນໃຊ້ການກວດຫາເຊື້ອ HIV ແບບໃໝ່. ນອກນັ້ນຍັງໄດ້ມີການ
ສົນທະນາຫາລືກັນ ກ່ຽວກັບການຈັດຕັ້ງປະຕິບັດແຜນການໃຫ້ບໍລິການ ພາຍໃນກົມກອງ
ຕ່າງໆ.

ໂຄງການປ້ອງກັນເຊື້ອ HIV ແລະໂຣກເອດສ໌ຮ່ວມກັນລະຫວ່າງສູນກາງຕໍ່ຕ້ານເຊື້ອ HIV
ແລະໂຣກເອດສ໌ແລະກອງທັບປະຊາຊົນລາວນີ້ແມ່ນເປັນພາກສ່ວນນຶ່ງຂອງການສືບຕໍ່ເປັນ
ພາຄີລະຫວ່າງ ສະຖານທູດສະຫະລັດ ກອງບັນຊາການກຳລັງສະຫະລັດໃນເຂດປາຊີຟິກ ກະຊວງສາທາລະນະສຸກລາວ ແລະພະແນກການແພດຂອງກອງທັບປະຊາຊົນລາວເພື່ອ
ຮັບມືກັບບັນຫາການແພດທີ່ຮີບດ່ວນຢູ່ໃນ ສປປ ລາວ.

ໃນສັບປະດາແລ້ວນີ້ ກໍໄດ້ມີການຝຶກອົບຮົມເປັນເວລາ 3 ມື້ ກ່ຽວກັບເລື່ອງນີ້ຈັດຂຶ້ນຢູ່ທີ່
ໂຮງແຮມດ່ານສະຫວັນ ແຂວງອຸດົມໄຊ ແຕ່ວັນທີ 12 ຫາ 14 ກໍລະກົດ.

ການຝຶກອົບຮົມທີ່ວ່ານີ້ແມ່ນແນໃສ່ເພື່ອສ້າງຄວາມຕື່ນໂຕແລະໃຫ້ຄວາມຮູ້ໃນການໃຫ້ຄຳ
ແນະນຳແລະເທັກນິກ ໃນການກວດຫາເຊື້ອ HIV ແລະໂຣກເອດສ໌ ໃຫ້ແກ່ກຸ່ມແກນນຳ
ພວກນາຍທະຫານຂອງກອງທັບປະຊາຊົນລາວ ເພື່ອວ່າພວກເຂົາເຈົ້າຈະສາມາດໃຫ້ບໍລິ
ການແກ່ກອງທັບປະຊາຊົນລາວໄດ້ ໂດຍສະເພາະແລ້ວແມ່ນພວກທະຫານທີ່ເຂົ້າໃໝ່.

ການຝຶກອົບຮົມທີ່ວ່ານີ້ແມ່ນຈັດຂຶ້ນໂດຍສູນກາງຕໍ່ຕ້ານເຊື້ອ HIV ແລະໂຣກເອດສ໌ໂດຍມີ
ຜູ້ເຂົ້າຮ່ວມຫຼາຍກວ່າ 20 ຄົນຈາກກົມກອງຕ່າງໆຂອງກອງທັບປະຊາຊົນລາວຈາກແຂວງ
ຜົ້ງສາລີ ຫົວພັນ ບໍ່ແກ້ວ ຫຼວງນໍ້າທາ ຫຼວງພະບາງ ອຸດົມໄຊ ຊຽງຂວາງແລະໄຊຍະບູລີ.

XS
SM
MD
LG