ທ່ານ Rand Paul ສັງກັດພັກ Republican ລູກຊາຍ
ຂອງທ່ານ Ron Paul ອະດີດຜູ້ສະໝັກແຂ່ງຂັນປະທາ
ນາທິບໍດີສະຫະລັດ ໄດ້ຊະນະທ່ານ Jack Conway ທີ່
ສັງກັດພັກ Democrat ໃນການແຂ່ງຂັນເອົາບ່ອນນັ່ງໃນ
ສະພາສູງ ທີ່ລັດ Kentucky. ທ່ານ Paul ກ່າວຕໍ່ພວກ
ສະໜັບສະໜຸນວ່າ ການເລືອກຕັ້ງຄັ້ງນີ້ແມ່ນໄດ້ສົ່ງສານ
ຫລືຂໍ້ຄວາມທີ່ແຈ້ງຂາວທີ່ສຸດ ມັນເປັນສານທີ່ດັງແລະຈະ
ແຈ້ງແລະເວົ້າອອກມາຢ່າງກົງໆວ່າ ພວກເຮົາໄດ້ກັບມາເອົາ
ລັດຖະບານຂອງພວກເຮົາຄືນແລ້ວ.
ໂດຍການໂຄສະນາຫາສຽງເລືອກຕັ້ງ ທີ່ອິງໃສ່ນະໂຍບາຍ
ເກັບພາສີຕໍ່າລົງ ແລະການມີລັດຖະບານທີ່ນ້ອຍລົງ ພວກ
ພັກ Republicanໄດ້ຮັບບອ່ນນັ່ງໃນສະພາຕໍ່າຫລາຍຂຶ້ນ ໃນທົ່ວປະເທດ.
ເຂົາເຈົ້າໃຫ້ຄໍາໝັ້ນສັນຍາວ່າ ຈະດໍາເນີນການຕັດຄ່າໃຊ້ຈ່າຍ
ລົງ ແລະຕ່າວປີ້ນແຜນການຮັກສາສຸຂະພາບຂອງປະທານາ
ທິບໍດີໂອບາມານັ້ນ.ພວກສະມາຊິກພັກ Republican ຍັງໄດ້ຮັບບ່ອນນັ່ງໃນສະພາສູງ
ຫລາຍຂຶ້ນເຊ່ນກັນ ຮວມທັງນຶ່ງບ່ອນນັ່ງໃນລັດ Illinois ບ່ອນທີ່ທ່ານ Mark Kirk
ຍາດເອົາບ່ອນນັ່ງເກົ່າຂອງປະທານາທິບໍດີບາຣັກ ໂອບາມາ ມາໄດ້ນັ້ນ.
ແຕ່ພວກສະມາຊິກຂອງພັກ Democrat ກໍໄດ້ຊະນະໃນການແຂ່ງຂັນທີ່ສູສີກັນຢູ່ຫລາຍ
ບ່ອນເຊ່ນກັນ. ທ່ານນາງ Barbara Boxer ຈາກລັດ California ຊຶ່ງເປັນສະມາຊິກ
ສະພາສູງມາ 3 ສະໄໝແລ້ວ ຄາດວ່າຈະໄດ້ຊະນະການເລືອກຕັ້ງຄືນອີກໃນການແຂ່ງຂັນ
ກັບທ່ານນາງ Carly Fiorina ສັງກັດພັກ Republican ອະດີດຫົວໜ້າບໍລິຫານບໍລິສັດ
ຄໍາພິວເຕີ້ Hewlett-Packard ແລະທ່ານ Jerry Brown ຈາກພັກ Democrat ກໍຈະ
ກັບຄືນມາດໍາລົງຕໍາແໜ່ງຜູ້ວ່າການລັດ Californiaຕື່ມອີກ ຫລັງຈາກເວລາເກືອບ 30 ປີ
ໂດຍໄດ້ຊະນະທ່ານນາງ Meg Whitman ຈາກພັກ Republican ຊຶ່ງເປັນອະດີດຫົວໜ້າ
ບໍລິຫານບໍລິສັດ eBay ນັ້ນ. ແຕ່ພວກ Republican ກໍໄດ້ຊະນະບ່ອນນັ່ງຜູ້ວ່າການລັດ
ຕື່ມອີກໃນຢ່າງນ້ອຍ 10 ລັດ ຊຶ່ງແຕ່ກ່ອນເປັນຂອງພັກ Democrat ຮວມທັງລັດ Penn- sylvania, Ohio ແລະ New Mexico.
ທີ່ລັດ Nevada ທ່ານ Harry Reid ຜູ້ນໍາພັກສຽງຂ້າງຫລາຍໃນສະພາສູງສະຫະລັດ ກໍ
ຄືພັກ Democrat ໄດ້ຊະນະທ່ານນາງ Sharron Angle ຈາກພັກ Republican ທີ່ໄດ້
ຮັບການສະໜັບສະໜຸນ ຈາກຂະບວນການ Tea Party ທີ່ນິຍົມແນວທາງເດີມ. ທ່ານ
Reid ຊຶ່ງເປັນອະດີດນັກມວຍສະໝັກຫລິ້ນ ກ່າວວ່າ ທ່ານໄດ້ປະເຊີນກັບການຕໍ່ສູ້ຢ່າງ ໜັກທີ່ສຸດບັ້ນນຶ່ງ ຊຶ່ງທ່ານ Reid ກ່າວດັ່ງນີ້ :
"ພວກເຂົາເຈົ້າເຄີຍໄດ້ເລ່ລ່ອນຢູ່ຕາມຖະນົນຫົນທາງ ຕາມເວທີຊົກມວຍ ແລະ
ໄດ້ເຂົ້າໄປຢູ່ໃນສະພາສູງສະຫະລັດ ແຕ່ຂ້າພະເຈົ້າກໍຕ້ອງຍອມ ຮັບວ່າ ການ
ແຂ່ງຂັນເລືອກຕັ້ງຄັ້ງນີ້ແມ່ນໜັກໜ່ວງທີ່ສຸດບັ້ນນຶ່ງ ແຕ່ມັນບໍ່ມີຫຍັງເລີຍ ຖ້າສົມ
ທຽບກັບການຕໍ່ສູ້ທີ່ພວກຄອບຄົວທັງຫລາຍ ກໍາລັງປະເຊີນຢູ່ໃນທົ່ວລັດເນວາດາ ຢູ່ໃນຂະນະນີ້."
ອັດຕາຄົນຫວ່າງງານໃນລັດ Nevada ແມ່ນຢູ່ໃນລະດັບສູງກວ່າ 14 ເປີເຊັນ ຊຶ່ງເປັນອັດ ຕາສູງທີ່ສຸດໃນປະເທດ.
ທີ່ລັດ Delaware ທ່ານນາງ Christine O'Donnell ສັງກັດຂະບວນການTea Party
ເສຍໄຊໃຫ້ແກ່ທ່ານ Chris Coons ຈາກພັກ Democrat ໃນການຍາດເອົາບ່ອນນັ່ງ ໃນສະພາສູງຂອງຮອງປະທານາທິບໍດີ Joe Biden.
ທ່ານ John Boehner ສະມາຊິກສະພາຕໍ່າ ສັງກັດພັກ Republican ຊຶ່ງຄາດວ່າຈະໄດ້
ຂຶ້ນເປັນຜູ້ນໍາພັກສຽງສ່ວນຫລາຍໃນສະພາຕໍ່າ ແທນທ່ານນາງ Nancy Pelosi ຈາກພັກ Democrat ນັ້ນ ກ່າວໃຫ້ຄໍາໜັ້ນສັນຍາຕໍ່ປະເທດຊາດດັ່ງນີ້:
"ເຖິງແມ່ນວ່າສຽງສ່ວນຫລາຍຊຸດໃໝ່ຂອງພວກເຮົາ ຈະຮັບໃຊ້ເປັນປາກເປັນ
ສຽງໃຫ້ພວກທ່ານ ຢູ່ໃນສະພາຕໍ່າຂອງປະຊາຊົນຂອງພວກເຮົາກໍຕາມ ແຕ່
ພວກເຮົາຕ້ອງຈົດຈໍາໄວ້ວ່າ ແມ່ນປະທານາທິບໍດີ ທີ່ເປັນຜູ້ກໍານົດແຜນການ
ປະຕິບັດງານ ສໍາລັບລັດຖະບານຂອງພວກເຮົາ. ປະຊາຊົນອາເມຣິກັນແມ່ນ
ໄດ້ສົ່ງສານທີ່ແຈ້ງຂາວໄປຍັງປະທານາທິບໍດີ ໃນຄໍ່າຄືນນີ້ ແລະສານຫລືຂໍ້ ຄວາມທີ່ສົ່ງໄປນັ້ນ ກໍຄື ຈົ່ງປ່ຽນເສ້ນທາງເສຍ."
ປະທານາທິບໍດີໂອບາມາ ໄດ້ໂທລະສັບຫາທ່ານ Boehner ໃນຕອນເຊົ້າມືດວັນພຸດມື້ນີ້
ສະແດງຄວາມຊົມເຊີຍທ່ານກ່ຽວກັບໄຊຊະນະຂອງພັກ Republican ແລະທ່ານໂອບາມາ
ໃຫ້ຄໍາໝັ້ນສັນຍາວ່າ ຈະພະຍາຍາມຊອກຫາທາງແກ້ໄຂບັນຫາທີ່ມີຜົນປະໂຫຍດຮ່ວມກັນ.
ພັກຂອງປະທານາທິບໍດີຄົນໃດກໍຕາມທີ່ພວມດໍາລົງຕໍາແໜ່ງໃນປັດຈຸບັນມັກຈະເສຍການ
ເລືອກຕັ້ງກາງສະໄໝໃຫ້ແກ່ພັກຄູ່ແຂ່ງ ແລະພາຍໃຕ້ ສະພາວະເສດຖະກິດທີ່ຝືດເຄືອງ
ຫລາຍນີ້ ພວກສະມາຊິກພັກ Democrat ກໍໄດ້ຄາດໄວ້ລ່ວງໜ້າແລ້ວວ່າ ຈະເສຍບ່ອນ ນັ່ງນັ້ນ.
ທ່ານ Marco Rubio ທີ່ຊະນະບ່ອນນັ່ງໃນສະພາສູງສະຫະລັດ ໃນລັດ Florida ໃນການແຂ່ງຂັນກັບຜູ້ສະໝັກອີກ 2 ຄົນນັ້ນ ເຕືອນເພື່ອນສະມາຊິກພັກ Republican ບໍ່ໃຫ້ພາກັນໝັ້ນໃຈເກີນໄປ ໂດຍທ່ານ Rubio ກ່າວດັ່ງນີ້:
"ແລະພວກເຮົາຈະພາກັນເຮັດຜິດພາດຢ່າງໃຫຍ່ຫລວງ ໃນຄໍ່າຄືນນີ້ ຖ້າພວກ
ເຮົາເຊື່ອວ່າ ຜົນການເລືອກຕັ້ງທີ່ປາກົດອອກນີ້ ໝາຍເຖິງ ການໂອບກອດເອົາ
ພັກຣີພັບລິກັນ. ຜົນການເລືອກຕັ້ງທີ່ອອກມານີ້ ແມ່ນເປັນໂອກາດຄັ້ງທີ່ສອງ
ໂອກາດຄັ້ງທີ່ສອງສໍາລັບພັກຣີພັບລິກັນທີ່ຈະເຮັດໃນອັນທີ່ພວກເຂົາເຈົ້າ ໄດ້ເວົ້າໄປວ່າ ຈະເຮັດແບບນັ້ນ ເມື່ອບໍ່ດົນຜ່ານມາ."
ທ່ານ Rubio ກ່າວວ່າ ປະເທດໄດ້ດໍາເນີນໄປໃນທິດທາງທີ່ຜິດ ແລະທັງສອງພັກການເມືອງ ຕ່າງກໍມີສ່ວນຮັບຜິດຊອບນໍາກັນ.
