ເສດຖະກິດຂອງສະຫະລັດໄດ້ສ້າງວຽກເຮັດງານທຳທັງໝົດ 292
ພັນວຽກ ໃນເດືອນທັນວາຜ່ານມານີ້ ອັນເປັນຮ່ອງຮອຍທີ່ສະແດງ
ໃຫ້ເຫັນວ່າເສດຖະກິດທີ່ໃຫຍ່ສຸດຂອງໂລກພວມເຕີບໂຕໃນບາດ
ກ້າວທີ່ໜັກແໜ້ນ ເຖິງແມ່ນວ່າ ເມື່ອໄວໆມານີ້ຕະຫລາດຮຸ້ນຂອງ
ໂລກໄດ້ເກີດຄວາມປັ່ນປ່ວນແລະກະແສລົມຕ້ານອື່ນໆ.
ລາຍງານຂອງກະຊວງແຮງງານທີ່ນຳອອກເຜີຍແຜ່ໃນວັນສຸກວານ
ນີ້ກ່າວວ່າ ອັດຕາຄົນຫວ່າງງານ ແມ່ນ 5 ເປີເຊັນ ຊຶ່ງຢູ່ໃນລະດັບນີ້
ມາໄດ້ 3 ເດືອນແລ້ວແລະເປັນລະດັບທີ່ຕ່ຳສຸດໃນຮອບ 7 ປີກວ່າ.
ວຽກເຮັດງານທຳ ທີ່ເພີ້ມຂຶ້ນນີ້ ແມ່ນຫລາຍກວ່າທີ່ພວກນັກເສດ
ຖະສາດສ່ວນໃຫຍ່ຄາດຄະເນໄວ້ ໂດຍທີ່ທຸລະກິດຕ່າງໆ ໃນດ້ານບໍລິການ ການກໍ່ສ້າງ
ການຮັກສາ ສຸຂະພາບແລະຮ້ານອາຫານ ໄດ້ວ່າຈ້າງພວກຄົນງານຫຼາຍສິບພັນຄົນ. ໃນ
ພາກ ສ່ວນບໍ່ແຮ່ ຊຶ່ງຮວມທັງອຸດສາຫະກຳນ້ຳມັນຍັງສືບຕໍ່ສູນເສຍວຽກງານຍ້ອນລາຄາ
ນ້ຳມັນຕົກຕ່ຳລົງ.
ໃນຂະນະທີ່ລາຍງານດັ່ງກ່າວ ແມ່ນດີກວ່າທີ່ພວກນັກເສດຖະສາດສ່ວນໃຫຍ່ທຳນາຍ
ໄວ້ກໍຈິງ ແຕ່ມັນກໍສະແດງໃຫ້ເຫັນວ່າ ມີ 7 ລ້ານ 9 ແສນຄົນ ຍັງບໍ່ມີວຽກການເຮັດເທື່ອ
ແລະອີກ 6 ລ້ານຄົນສາມາດຊອກຫາວຽກເຮັດໄດ້ ທີ່ບໍ່ເຕັມເວລາ.
ຂໍ້ມູນສະແດງໃຫ້ເຫັນວ່າ ເສດຖະກິດໄດ້ວ່າຈ້າງຜູ້ຄົນ ເຂົ້າເຮັດວຽກສະເລ່ຍແລ້ວ 221
ພັນຄົນຕໍ່ເດືອນ ໃນຮອບນຶ່ງປີທີ່ຜ່ານມານີ້. ທີ່ປຶກສາທາງດ້ານເສດຖະກິດ ຂອງທຳນຽບ
ຂາວ ທ່ານ Jason Furman ກ່າວວ່າ ເວລານີ້ເສດຖະກິດຕ້ອງການທີ່ຈະສ້າງວຽກເຮັດ
ງານທຳແຕ່ພຽງ 77,000 ວຽກຕໍ່ເດືອນເທົ່ານັ້ນກໍຈະສາມາດຮັກສາອັດຕາຄົນຫວ່າງງານ
ໃຫ້ຢູ່ໃນລະດັບທີ່ສະໝ່ຳສະເໝີໄດ້ ຍ້ອນວ່າ ສະມາຊິກຈຳນວນຫລວງຫຼາຍຂອງພວກທີ່
ເກີດໃນຍຸກສະໄໝເດັກນ້ອຍເກີດຫຼາຍຜິດປົກກະຕິ ຫຼັງສົງຄາມໂລກຄັ້ງທີສອງ ຫຼື baby
boom ພວມພາກັນອອກກິນເບ້ຍບຳນານແລະອອກຈາກກຳລັງແຮງງານໄປ.
