ລິ້ງ ສຳຫລັບເຂົ້າຫາ

logo-print

ເສດຖະກິດ ສຫລ ຈ້າງຄົນງານໃໝ່ ໃນເດືອນມິຖຸນາ 4.8 ລ້ານຄົນ ໃນຂະນະທີ່ ອັດຕາການຫວ່າງງານ ຫລຸດລົງເປັນ 11.1 ເປີເຊັນ


ທ້າວເກລນ ເບີແມນ (Glen Buhlmann), ຢູ່ລຸ່ມເບື້ອງຊ້າຍ, ພວມກອກເອກະສານສະໝັກວຽກ ໃນລະຫວ່າງ ການຍ່າງເຂົ້າມາເອງ ຫຼື ຂັບລົດເຂົ້າມາ ໃນງານຈັດຫາວຽກ ທີ່ນະຄອນຊີອາໂຕລ ສຳລັບບໍລິສັດຜະລິດເຄື່ອງນຸ່ງ ຂອງໜ່ວຍງານຄົ້ນຄວ້າເພື່ອຜະລິດສິນຄ້າໃໝ່ເຊັ່ນໜ້າກາກ ແລະເຄື່ອງປ້ອງກັນຕົວ.

ເສດຖະກິດຂອງສະຫະລັດໃນເດືອນມິຖຸນາຜ່ານມາ ໄດ້ມີີຄົນງານເຂົ້າເຮັດວຽກເພີ້ມຂຶ້ນ 4 ລ້ານ 8 ແສນຄົນ ໃນຂະນະທີ່ກຳລັງດີ້ນຮົນທີ່ຈະຟື້ນຕົວຄືນຈາກການຖືກບັງຄັບໃຫ້ປິດທຸລະກິດຍ້ອນໂຣກລະບາດໄວຣັສໂຄໂຣນາ ອີງຕາມທີ່ລັດຖະບານໄດ້ລາຍງານໃນວັນພະຫັດວານນີ້ ໃນຂະນະທີ່ລາຍງານໄດ້ກ່າວວ່າ ມີພວກຄົນງານອີກຈຳນວນ 1 ລ້ານ 4 ແສນຄົນຕົກງານແລະໄດ້ຍື່ນຄຳຮ້ອງຂໍເງິນຫວ່າງງານ ເມື່ອອາທິດແລ້ວນີ້.

ພະແນກສະຖິຕິດ້ານແຮງງານ ໄດ້ກ່າວວ່າ ອັດຕາການຫວ່າງງານຂອງປະເທດດີຂຶ້ນ ໂດຍຢູ່ໃນລະດັບ 11.1 ເປີເຊັນໃນເດືອນມິຖຸນາ ເມື່ອທຽບໃສ່ຕົວເລກທີ່ເປັນທາງການ ຂອງເດືອນເມສາ ຢູ່ທີ່ໃນລະດັບ 13.3 ເປີເຊັນ. ແຕ່ໃນເດືອນມິຖຸນາ ຕົວເລກທີ່ໄດ້ຖືກເກັບກຳມາ ໃນຕອນກາງເດືອນ ກ່ອນຈະມີກໍລະນີຕິດ ເຊື້ອໄວຣັສໂຄໂຣນາຮອບໃໝ່ ທີ່ຖີບໂຕສູງຂຶ້ນເປັນປະຫວັດການນັ້ນ ຍ້ອນການແຜ່ລະບາດໄປທົ່ວລັດຕ່າງໆຂອງສະຫະລັດທີ່ໄດ້ເລີ້ມເປີດເສດຖະກິດຂອງພວກເຂົາເຈົ້າຄືນໃໝ່ ເປັນຄັ້ງທຳອິດ.

ລາຍງານກ່ຽວກັບການຂະຫຍາຍຕົວຂອງວຽກເຮັດງານທຳແລະການຫວ່າງງານສະແດງໃຫ້ເຫັນວ່າ ເສດຖະກິດຂອງສະຫະລັດ ຊຶ່ງເປັນເສດຖະກິດໃຫຍ່ທີ່ສຸດຂອງໂລກ ແມ່ນມາຮອດທາງແຍກທີ່ສຳຄັນ ໂດຍມີບາງສ່ວນກຳລັງຟື້ນຕົວຄືນ ແລະບາງສ່ວນຍັງມີຄວາມບໍ່ແນ່ນອນ. ພວກທຸລະກິດບາງຢ່າງຄື ຮ້ານຄ້າ ຮ້ານອາຫານ ສະຖານອອກກຳລັງກາຍ ແລະຮ້ານເສີມສວຍທັງຫຼາຍ ໃນທົ່ວລັດທາງພາກໃຕ້ຂອງປະເທດແມ່ນຖືກບັງຄັບໃຫ້ປິດກິດຈະການອີກເທື່ອນຶ່ງ ຫຼືໃຫ້ເລື່ອນການເປີດກິດຈະການຕາມປົກກະຕິ ອອກໄປຕື່ມອີກ.

ຢູ່ທີ່ທຳນຽບຂາວ ປະທານາທິບໍດີ ດໍໂນລ ທຣຳ ກຳລັງປະເຊີນກັບການແຂ່ງຂັນເລືອກຕັ້ງທີ່ສຳຄັນໃນເດືອນພະຈິກຈະມາເຖິງນີ້ ໂດຍແຂ່ງກັບອະດີດຮອງປະທານາທິບໍດີໂຈ ໄບເດັນ ຊຶ່ງທ່ານທຣຳ ໄດ້ປະກາດອ້າງເຖິງການຂະຫຍາຍ ຕົວຂອງວຽກເຮັດງານທຳໃນເດືອນມິຖຸນາ.

ທ່ານທຣຳ ໄດ້ກ່າວວ່າ “ພວກຄົນງານໝັ້ນໃຈກ່ຽວກັບການຫາວຽກເຮັດງານທຳ. ຕະຫຼາດຮຸ້ນກຳລັງສູງຂຶ້ນ. ຕົວເລກທັງຫຼາຍເຫຼົ່ານີ້ ປະທານາທິບໍດີຄົນອື່ນຈະບໍ່ໄດ້ຮັບ.”

“ທຸກຢ່າງຈະກັບຄືນມາຄືເກົ່າໄວກວ່າທີ່ພວກເຮົາຄິດ” ນັ້ນຄືຄໍາເວົ້າຂອງທ່ານ ທຣໍາ ແລະທ່ານກ່າວຕື່ມວ່າ “ພວກເຮົາຈະມີໄຕມາດທີສາມທີ່ດີເລີດ. ປີໜ້າຈະເປັນປີທີ່ດີທີ່ເລີດ ສຳລັບວຽກເຮັດງານທຳ.”

ທ່ານໄດ້ສະຫລຸບວ່າ “ພວກເຮົາບໍ່ໄດ້ໝົດກຳລັງວັງຊາ ແລະປະເທດຂອງພວກເຮົາບໍ່ໄດ້ໝົດກຳລັງວັງຊາ” ກ່ອນຈະອອກໄປຈາກຫ້ອງປະຊຸມຖະແຫລງຂ່າວຂອງທຳນຽບຂາວ ໂດຍບໍ່ໄດ້ຕອບຄຳຖາມໃດໆຈາກບັນດານັກຂ່າວ.

ອ່ານຂ່າວນີ້ຕື່ມ ເປັນພາສາອັງກິດ

ທ່ານອາດຈະມັກເລື້ອງນີ້ຄືກັນ

XS
SM
MD
LG