ບັນດາເຈົ້າໜ້າທີ່ສືບລັບປາກິສຖານ ກ່າວວ່າ ການໂຈມຕີ
ທີ່ສົງໄສວ່າ ມາຈາກເຮືອບິນບໍ່ມີຄົນຂັບ ຂອງສະຫະລັດ
ໄດ້ສັງຫານຢ່າງນ້ອຍ 7 ຄົນ.
ການໂຈມຕີ ເມື່ອຕອນເຊົ້າວັນສຸກມື້ນີ້ ແມ່ນໄດ້ແນເປົ້າໝາຍ
ໃສ່ຄ້າຍພັກຂອງພວກຫົວຮຸນແຮງ Taliban ແລະພວກ Uzbek
ຢູ່ໃນເຂດ Waziristan ເໜືອ ທີ່ຫ່າງໄກສອກຫຼີກຂອງປາກິສຖານ.
ການໂຈມຕີມີຂຶ້ນ ໃນຂະນະທີ່ປາກິສຖານ ເພີ້ມການປະຕິບັດງານ
ໃນນະໂຍບາຍຕໍ່ຕ້ານການກໍ່ການຮ້າຍ ຫລັງຈາກການໂຈມຕີໂຮງ
ຮຽນທີ່ບໍລິຫານງານໂດຍທະຫານ ຢູ່ທີ່ເມືອງ Peshawar ເມື່ອວັນ
ທີ 16 ທັນວາຜ່ານມາ ໂດຍພວກ Taliban ຊຶ່ງໄດ້ສັງຫານເກືອບ 150 ຄົນ ສ່ວນໃຫຍ່ແລ້ວ
ແມ່ນເດັກນ້ອຍ.
ການໂຈມຕີໂດຍເຮືອບິນບໍ່ມີຄົນຂັບ ສ່ວນຫຼາຍແລ້ວ ບໍ່ເປັນທີ່ນິຍົມ ໃນປາກິສຖານ ຍ້ອນ ຫຼາຍໆຄົນພິຈາລະນາວ່າ ເປັນການລະເມີດຕໍ່ອະທິປະ ໄຕຂອງປະເທດ. ແຕ່ເຖິງ
ຢ່າງໃດ
ກໍຕາມ ສະຫະລັດຢຶນຢັດວ່າ ການໂຈມຕີເຫຼົ່ານີ້ ແມ່ນມີປະສິດທິພາບໃນການກຳຈັດ
ພວກຫົວຮຸນແຮງ ຢູ່ໃນບໍລິເວນທີ່ບໍ່ສາມາດເຂົ້າເຖິງໄດ້ ໂດຍກອງທະຫານປາກິສຖານ.
ນອກນັ້ນ ໃນວັນສຸກມື້ນີ້ ບັນດາເຈົ້າໜ້າທີ່ຍັງກ່າວວ່າ ກອງກຳລັງຮັກ ສາຄວາມປອດໄພ
ໄດ້ສັງຫານ ຜູ້ຖືກກ່າວຫາວ່າເປັນຜູ້ວາງແຜນໂຈມຕີໂຮງຮຽນຢູ່ທີ່ເມືອງ Peshawar.
ຫົວໜ້າຕຳຫລວດ ໃນເຂດຊົນເຜົ່າ Khyber ກ່າວວ່າ ກອງກຳລັງຮັກສາຄວາມປອດໄພ
ໄດ້ປະຕິບັດບຸກເຂົ້າກວດຄົ້ນແບບບໍ່ຮູ້ໂຕ ອິງຕາມຂໍ້ມູນລັບທີ່ໄດ້ຮັບມາ ໃນຕອນເດິກ
ຂອງວັນພະຫັດວານນີ້ ແລະ ໄດ້ຍິງຕໍ່ສູ້ກັບຜູ້ບັນຊາການຂອງພວກຫົວຮຸນແຮງທີ່ມີຊື່ວ່າ
Saddam ພ້ອມກັນກັບພັກພວກຂອງຜູ້ກ່ຽວ.
ທ້າວ Saddam ໄດ້ຖືກຂ້າຕາຍ ໃນລະຫວ່າງຍິງຕໍ່ສູ້ເປັນເວລາເກືອບຊົວໂມງໜຶ່ງ ໃນຂະນະທີ່ພັກພວກຂອງຜູ້ກ່ຽວ 6 ຄົນ ໄດ້ຮັບບາດເຈັບ ແລະ ຖືກຈັບກຸມ. ພວກເຂົາກຳລັງຖືກສອບສວນຢູ່.
ຕຳຫລວດກ່າວວ່າ ທ້າວ Saddam ໄດ້ຊ່ວຍໃນການວາງແຜນໂຈມຕີໂຮງຮຽນ ແລະ ຍັງມີສ່ວນກ່ຽວຂ້ອງໃນການໂຈມຕີ ບັນດາພະນັກງານແພດ ທີ່ພວມສັກຢາວັກຊີນປ້ອງກັນພະຍາດ polio ຢູ່ໃນເຂດຊົນເຜົ່ານັ້ນດ້ວຍ.
