ອະດີດເອກອັກຄະລັດຖະທູດສະຫະລັດປະຈຳຊີເຣຍ ກ່າວວ່າ ມັນມີຈຳນວນສູງ ເປັນພິ ເສດ ຖ້າຫາກບໍ່ແມ່ນວ່າບໍ່ເຄີຍມີມາກ່ອນທີ່ພວກນັກການທູດຂອງກະຊວງການຕ່າງປະ ເທດຫຼາຍກວ່າ 50 ຄົນ ໄດ້ພາກັນລົງນາມໃນໂທລະເລກທາງການທູດພາຍໃນ ຕ້ອງຕິ ນະໂຍບາຍລັດຖະບານທ່ານໂອບາມາ.
ທ່ານ Robert Ford ໃຫ້ຄວາມເຫັນ ຕໍ່ວີໂອເອ ໃນວັນສຸກວານນີ້ ຫຼັງຈາກຮ່າງເອກກະ ສານໃນການສະແດງຄວາມບໍ່ພໍໃຈພາຍໃນຂອງກະຊວງດັ່ງກ່າວໄດ້ປາກົດໃຫ້ເຫັນຊຶ່ງຢູ່ໃນນັ້ນ ເຈົ້າໜ້າທີ່ 51 ຄົນ ໄດ້ຮຽກຮ້ອງໃຫ້ ທຳການໂຈມຕີທາງອາກາດ ຕໍ່ເປົ້າໝາຍ ຂອງອຳນາດການປົກຄອງຊີເຣຍ ໃນຖານະທີ່ເປັນພາກສ່ວນນຶ່ງໃນຄວາມພະຍາຍາມ ເພື່ອກົດດັນໃຫ້ ອຳນາດການປົກຄອງ ຂອງປະທານາທິບໍດີ Bashar al-Assad ເປີດ ການເຈລະຈາທາງດ້ານການເມືອງ.
ທ່ານ Ford ກ່າວວ່າ ໃນປະສົບພະການຂອງຂ້າພະເຈົ້າຢ້ອນຄືນໄປເມື່ອປີ 1985 ຢູ່ໃນ ກະຊວງການຕ່າງປະເທດ. ຂ້າພະເຈົ້າບໍ່ເຄີຍໄດ້ຍິນຊ່ອງທາງ ໃນການສະແດງຄວາມບໍ່ ພໍໃຈມາກ່ອນທີ່ມີ 10 ລາຍເຊັນ ຊຶ່ງໜ້ອຍກວ່າ 50 ລາຍເຊັນຫຼາຍ.
ທ່ານກ່າວວ່າ ການມີຈຳນວນລາຍເຊັນສູງ ແມ່ນຮ່ອງຮອຍທີ່ສະແດງໃຫ້ເຫັນວ່າ ພວກເຈົ້າໜ້າທີ່ໆຮັບຜິດຊອບໃນການຈັດຕັ້ງປະຕິບັດມາດຕະການໃນດ້ານນະໂຍບາຍທາງ ພາກພື້ນດິນ ຢູ່ໃນຊີເຣຍທີ່ຊຸກຍູ້ໃຫ້ມີການເຈລະຈາ ເພື່ອຫາທາງແກ້ໄຂທາງດ້ານການເມືອງແລະຮັບມືກັບວິກິດການອົບພະຍົບນັ້ນບໍ່ເຊື່ອວ່າພວກເຂົາເຈົ້າສາມາດບັນລຸເປົ້າ ໝາຍໄດ້ພາຍໃຕ້ນະໂຍບາຍໃນປັດຈຸບັນນີ້.
ພວກເຂົາເຈົ້າ ກຳລັງເຕືອນວ່າ ການດຳເນີນການ ໃນປັດຈຸບັນນີ້ ບໍ່ມີທາງທີ່ຈະສຳເລັດ ໄດ້ແລະດັ່ງນັ້ນຈຶ່ງຈຳເປັນຕ້ອງໄດ້ມີການປ່ຽນແປງ ນັ້ນຄືຄຳເວົ້າຂອງທ່ານ Ford ຜູ້ຊຶ່ງ ໃນປັດຈຸບັນນີ້ ເປັນນັກວິເຄາະປະຈຳສະຖາບັນ ພາກຕາເວັນອອກກາງ.
