ສະຫະລັດ ໄດ້ປະນາມປາກິສຖານ ທີ່ຕັດສິນໃຈປ່ອຍໂຕຜູ້ຕ້ອງຫາທີ່ເປັນຜູ້ບົງການ ກ່ຽວກັບການໂຈມຕີ ທີ່ນະຄອນ Mumbai ໃນປີ 2008 ທີ່ໄດ້ສັງຫານ 166 ຄົນນັ້ນ.
ໂຄສົກ ກະຊວງຕ່າງປະເທດສະຫະລັດ ທ່ານ Jeff Rathke
ກ່າວໃນວັນສຸກວານນີ້ວ່າ ສະຫະລັດ “ມີຄວາມເປັນຫ່ວງທີ່ສຸດ”
ທີ່ສານໄດ້ຕັດສິນໃຫ້ປະກັນໂຕ ທ້າວ Zaki-ur-Rehman
Lakhvi ທີ່ໄດ້ຖືກປ່ອຍຈາກການກັກຂັງພຽງບໍ່ເທົ່າໃດຊົ່ວໂມງ
ກ່ອນໜ້ານີ້.
ທ້າວ Lakhvi ຜູ້ບັນຊາການສູງສຸດ ຂອງກຸ່ມຫົວຮຸນແຮງ
Lashkar-e-Taiba ທີ່ມີຖານປະຕິບັດງານຢູ່ໃນປາກິສຖານ ໄດ້ຕິດຄຸກມາແຕ່ເດືອນ
ກຸມພາ ປີ 2009 ເວລາລາວ ແລະອີກຫົກຄົນໄດ້ຖືກກ່າວຫາວ່າ ພົວພັນກັບການໂຈມ
ຕີເປັນເວລາ60 ຊົ່ວໂມງຢູ່ນະຄອນ Mumbai ເມືອງຫຼວງການຄ້າຂອງອິນເດຍ ໃນປີ
2008.
ທ້າວ Lakhvi ໄດ້ຖືກປະກັນໂຕເທຶ່ອທຳອິດ ໃນເດືອນທັນວາ ພຽງບໍ່ເທົ່າໃດມື້ຫລັງຈາກ
ຜູ້ກໍ່ການຮ້າຍໂຈມຕີໂຮງຮຽນໃນເມືອງ Peshawar ທີ່ເຮັດໃຫ້ 150 ຄົນເສຍຊີວິດທັງ
ໝົດເປັນເດັກນ້ອຍ. ລາວໄດ້ຖືກຕັດສິນໃຫ້ປະກັນໂຕໄວເກີນໄປ ຫລັງຈາກໄດ້ມີການ
ໂຈມຕີໂຮງຮຽນແລ້ວທີ່ເຮັດໃຫ້ນາໆຊາດມີຄວາມໂກດແຄ້ນ.
ຍ້ອນປະເຊີນໜ້າກັບການຕິຕຽນຢ່າງແຮງ ລັດຖະບານປາກິສຖານຈຶ່ງໄດ້ກັກຂັງ ທ້າວ
Lakhvi ໂດຍໃຊ້ກົດໝາຍຄວາມເປັນລະບຽບຂອງສາທາລະນະຊົນ ແລະແຕ່ນັ້ນມາໄດ້
ອອກຄຳສັ່ງດັ່ງກ່າວຫຼາຍຄັ້ງ ແຕ່ວ່າໄດ້ຖືກສານປາກິສຖານ ປະກາດໃຫ້ເປັນໂມຄະ.
