ຜູ້ສະໝັກປະທານາທິບໍດີ ຂອງພັກເດໂມແຄຣັດ ທ່ານນາງ Hillary Clinton ໄດ້ເປີດເຜີຍປະຫວັດການເສຍພາສີທີ່ສະແດງໃຫ້ເຫັນວ່າ ທ່ານນາງໄດ້ເສຍພາສີໃຫ້ລັດຖະບານກາງໃນອັດຕາ 34.2 ເປີເຊັນ ໃນປີກາຍນີ້ ໃນຂະນະທີ່ຜູ້ສະໝັກປະທານາທິບໍດີຂອງພັກຣີພັບບລີກັນທ່ານ Donald Trump ພວມໄດ້ຮັບການກົດດັນຫຼາຍຂຶ້ນ ໃຫ້ເປີດເຜີຍປະຫວັດການເງິນຂອງທ່ານ.
ທ່ານນາງ Clinton ແລະຜູ້ສະໝັກເປັນຮອງປະທານາທິບໍດີຮ່ວມກັບທ່ານນາງ ທ່ານ Tim Kaine ໄດ້ເປີດເຜີຍການເສຍພາສີຂອງພວກທ່ານໃນວັນສຸກວານນີ້. ທ່ານ Kaine ໄດ້ເສຍພາສີໃນອັດຕາ 20.3 ເປີເຊັນ ໃນປີ 2015.
ຜູ້ຊ່ອຍໃນການໂຄສະນາຫາສຽງ ຍານາງ Jennifer Palmieri ກ່າວຢູ່ໃນຖະແຫຼງການສະບັບນຶ່ງວ່າ ທ່ານນາງ Clinton ແລະທ່ານ Kaine ຍັງສືບຕໍ່ກຳນົດມາດຕະຖານສຳລັບຄວາມໂປ່ງໃສທາງດ້ານການເງິນ ແລະໄດ້ຮຽກຮ້ອງໃຫ້ທ່ານ Trump ເປີດເຜີຍປະຫວັດໃນການເສຍພາສີຂອງທ່ານ ດັ່ງທີ່ຜູ້ສະໝັກປະທານາທິບໍດີຄົນອື່ນໆໄດ້ກະທຳ ໃນໄລຍະສີ່ທົດສະວັດຜ່ານມາ.
ທ່ານ Trump ກ່າວຊ້ຳແລ້ວຊ້ຳອີກວ່າ ການເງິນຂອງທ່ານກຳລັງຖືກກວດສອບແລະປະຕິເສດບໍ່ຍອມເປີດເຜີຍໃຫ້ຮູ້ຈົນກວ່າການກວດສອບຈະແລ້ວສຳເລັດ.
ແຕ່ເປັນເວລາຫຼາຍເດືອນມາແລ້ວທີ່ພວກນັກຊ່ຽວຊານໄດ້ຊີ້ໃຫ້ເຫັນວ່າ ບໍ່ມີຫຍັງທີ່ຈະຂັດ ຂວາງບໍ່ໃຫ້ບຸກຄົນໃດບຸກຄົນນຶ່ງເປີດເຜີຍປະຫວັດການເສຍພາສີຂອງຜູ້ກ່ຽວໄດ້ ໃນຂະນະ ທີ່ຖືກກວດສອບຢູ່ນັ້ນ.
ພວກນັກຊ່ຽວຊານຍັງຊີ້ໃຫ້ເຫັນວ່າ ພວກນັກພັດທະນາອະສັງຫາລິມະຊັບໄດ້ຊົມໃຊ້ການຜ່ອນຜັນພາສີຈຳນວນນຶ່ງ ທີ່ອາດຈະຍັງຜົນໃຫ້ ທ່ານ Trump ເສຍພາສີ ໃນອັດຕາທີ່ຕ່ຳ ກວ່າປະຊາຊົນທຳມະດາສາມັນ ຫຼືອາດເປັນໄປໄດ້ທີ່ຜູ້ກ່ຽວບໍ່ໄດ້ເສຍພາສີເລີຍ.
ທ່ານ Steven Rosenthal ຈາກສູນກາງ Urban-Brooking Tax Policy ກ່າວຕໍ່ອົງ ການຂ່າວເອພີວ່າ ຂ້າພະເຈົ້າຄິດວ່າ ທ່ານອາດຈະເສຍພາສີພຽງເລັກນ້ອຍຫຼືບໍ່ໄດ້ເສຍເລີຍກໍເປັນໄດ້. ອະສັງຫາລິມະຊັບແມ່ນມີຊື່ສຽງບໍ່ຄ່ອຍດີປານໃດໃນການນຳໃຊ້ການຫຼຸດ ຜ່ອນພາສີ.
ທ່ານ Daniel Shaviro ອາຈານສອນທີ່ສະຖາບັນກົດໝາຍຂອງມະຫາວິທະຍາໄລນິວ ຢອກ ກ່າວຕໍ່ວິທະຍຸ NPR ວ່າ ທະນາຍຄວາມຂອງທ່ານ Trump ອາດຈະແນະນຳບໍ່ໃຫ້ທ່ານເປີດເຜີຍປະຫວັດການເສຍພາສີຈົນເທົ່າການກວດສອບເສັດສິ້ນລົງ.
