ຄະນະຜູ້ແທນ ເຈົ້າໜ້າທີ່ອະວຸໂສຂອງສະຫະລັດ ໄດ້ເດີນທາງໄປຢ້ຽມຢາມປະເທດເວເນຊູເອລາໃນວັນເສົາແລ້ວ ເພື່ອເຈລະຈາຫາລື ກັບສະມາຊິກ ຂອງລັດຖະບານປະທານາທິບໍດີນິໂກລັສ ມາດູໂຣ ໃນການຊອກຫາຊ່ອງທາງທີ່ເປັນໄປໄດ້ ເພື່ອຫຼຸດຜ່ອນການລົງໂທດຂອງ ສະຫະລັດ ຕໍ່ປະເທດທີ່ຜະລິດນ້ຳມັນສຳຄັນດັ່ງກ່າວ.
ທ່ານນາງ ເຈັນ ຊາກີ ໂຄສົກຂອງທຳນຽບຂາວກ່າວໃນວັນຈັນວານນີ້ວ່າ ຄະນະຜູ້ແທນຂອງ ສະຫະລັດ ໄດ້ປຶກສາຫາລືກ່ຽວກັບບັນຫາຕ່າງໆໃນຂອບເຂດທີ່ກວ້າງຂວາງ ຮວມທັງຄວາມໝັ້ນຄົງທາງດ້ານພະລັງງານ ຕະຫຼອດທັງສຸຂະພາບແລະຄວາມເປັນຢູ່ຂອງປະຊາຊົນ ອາເມຣິກັນ ທີ່ຖືກຈັບກຸມຄຸມຂັງ.
ທ່ານນາງກ່າວວ່າບັນຫາທັງສອງໄດ້ “ແຍກຈາກກັນ ແລະ ການໂອ້ລົມສົນທະນາ.”
ແຫຼ່ງຂ່າວທີ່ເຂົ້າຮ່ວມໃນການເຈລະຈາຫາລື ແຈ້ງໃຫ້ສື່ມວນຊົນຊາບ ກ່ຽວກັບ ການເຈລະຈາຫາລືນີ້ໄດ້ເຮັດວຽກຢູ່ຫຼັງສາກ ມາໄດ້ຫຼາຍເດືອນແລ້ວ ແຕ່ໄດ້ມີການເລັ່ງຂັດຄວາມຮີບດ່ວນຂຶ້ນຕື່ມ ຍ້ອນການລຸກເຂົ້າໄປໃນ ຢູເຄຣນ ຂອງ ຣັດເຊຍ.
ການຜະລິດນ້ຳມັນຂອງ ເວເນຊູເອລາ ໄດ້ຫຼຸດລົງ ໃນຮອບສອງທົດສະວັດທີ່ຜ່ານມານີ້ ຈາກ 3 ລ້ານຖັງໃນປີ 2002 ລົງມາເປັນ 800,000 ຖັງຕໍ່ມື້ ໃນຕົ້ນປີນີ້ ອີງຕາມອົງການໂອເປັກ. ແຕ່ແນວໃດກໍຕາມ ການສົ່ງອອກນ້ຳມັນດິບ ຂອງປະເທດດັ່ງກ່າວອາດຈະຊົດເຊີຍໃຫ້ແກ່ປະລິມານທີ່ຫຼຸດລົງຈາກການຫ້າມຊື້ນ້ຳມັນຂອງ ຣັດເຊຍ ໄດ້. ປະເທດເວເນຊູເອລາ ຍັງເປັນພັນທະມິດທີ່ເຂັ້ມແຂງສຸດຂອງປະທານາທິບໍດີ ຣັດເຊຍ ທ່ານ ວລາດີເມຍ ປູຕິນ ໃນຊີກໂລກຕາເວັນຕົກ.
ສະຫະລັດ ພາຍໃຕ້ລັດຖະບານຂອງອະດີດປະທານາທິບໍດີ ດໍໂນລ ທຣຳ ໄດ້ຕັດຄວາມສຳພັນທາດ້ານການທູດກັບເວເນຊູເອລາ ໃນປີ 2019 ຫຼັງຈາກ ສະຫະລັດ ຮັບຮູ້ຜູ້ນຳຝ່າຍຄ້ານ ທ່ານ ຮວານ ກວາອີໂດ ເປັນປະທານາທິບໍດີທີ່ຖືກຕ້ອງຊອບທຳຂອງ ເວເນຊູເອລາ ໂດຍກ່າວຫາລັດຖະບານ ມາດູໂຣ ວ່າສໍ້ໂກງຄະແນນສຽງໃນການເລືອກຕັ້ງປະທານາທິບໍດີ. ນອກນັ້ນແລ້ວ ລັດຖະບານທ່ານ ທຣຳ ຍັງໄດ້ຈຳກັດລາຍໄດ້ຈາກການຂາຍນ້ຳມັນໃນ ສະຫະລັດ ຂອງບໍລິສັດນ້ຳມັນແຫ່ງຊາດຂອງ ເວເນຊູເອລາ.
ໜັງສືພິມ ວອລສຕຣີດ ເຈີໂນ ລາຍງານວ່າ ໃນໄລຍະສອງສາມອາທິດທີ່ຜ່ານມານີ້ ພວກນັກລົງໂທດໄດ້ຮຽກຮ້ອງໃຫ້ລັດຖະບານທ່ານ ໄບເດັນ ຍົກເລີກການລົງໂທດຕໍ່ ເວເນຊູເອລາ ເພື່ອໃຫ້ປະເທດດັ່ງກ່າວສາມາດສົ່ງນ້ຳມັນດິບອອກສູ່ຕະຫລາດ ແລະ ນັ້ນຈະສາມາດອຸດຕັນຊ່ອງຫວ່າງທີ່ເກີດຂຶ້ນ ຖ້າປະເທດຕາເວັນຕົກຕັດສິນໃຈທີ່ຈະທຳການລົງໂທດ ເພື່ອບອຍຄອດນ້ຳມັນ ຣັດເຊຍ. ນອກນັ້ນ ບໍລິສັດ ເຊັບວຣອນ ຍັງໄດ້ວິ່ງເຕັ້ນຂໍໃຫ້ລັດຖະບານປັບປ່ຽນໃບອະນຸຍາດໃຫ້ຮັບເອົາແລະຄ້ານ້ຳມັນຂອງ ເວເນຊູເອລາ ໄດ້.
