ລັດຖະມົນຕີປ້ອງກັນປະເທດສະຫະລັດ ທ່ານ Ash Carter ກຳລັງຢູ່ໃນປະເທດອັຟການິສຖານ ພຽງສາມວັນຫຼັງຈາກບັນດາຜູ້ນຳຂອງນາໆຊາດ ໄດ້ຕົກລົງໃຫ້ການສະໜັບສະ ໜູນຕໍ່ປະເທດດັ່ງກ່າວ ດ້ວຍທະຫານອົງການເນໂຕ້ປະ ມານ 12,000 ຄົນ ແລະໃຫ້ເງິນສະໜັບສະໜູນແກ່ກະຊວງປ້ອງກັນປະເທດ ແລະກຳລັງຮັກສາຄວາມປອດໄພ ອັຟການິສຖານ ໄປຈົນຮອດປີ 2020.
ທ່ານ Carter ໄດ້ພົບປະກັບ ປະທານາທິບໍດີ Ashraf Ghani ແລະຈະຫາລື ກັບນາຍພົນ Mick Nicholson ຜູ້ບັນຊາການກຳລັງສະຫະລັດ ແລະກຳລັງນາໆຊາດຢູ່ໃນອັຟການິສ ຖານ. ນອກນັ້ນ ທ່ານຍັງຈະຂອບໃຈກຳລັງທະຫານສະຫະລັດ ໃນຄວາມພະຍາຍາມຂອງເຂົາເຈົ້າ ເພື່ອສ້າງຄວາມທຸ່ນທ່ຽງໃຫ້ແກ່ ອັຟການິສຖານ ແລະປ້ອງກັນບໍ່ໃຫ້ປະເທດດັ່ງ ກ່າວ ອີກຄັ້ງນຶ່ງກາຍເປັນບ່ອນຫລົບລີ້ ຂອງພວກກໍ່ການຮ້າຍ ຜູ້ທີ່ປາດຖະໜາຢາກຈະສວຍໃຊ້ເປັນໂຈມຕີສະຫະລັດ.
ຊາວອັຟການິສຖານມີບັນຫາຢູ່ຫລາຍຢ່າງທີ່ຈະຕ້ອງໄດ້ຮັບການແກ້ໄຂ. ໃນຂະ ນະທີ່ຍັງບໍ່ໄດ້ຮັບໄຊຊະນະທາງທະຫານທີ່ສຳຄັນໃດໆໂດຍພວກທາລິບານເທື່ອ ກອງທັບແຫ່ງ ຊາດ ແລະກຳລັງຮັກສາຄວາມປອດໄພອັຟການິສຖານ ແມ່ນ ເຫັນວ່າ ມີການບາດເຈັບ ລົ້ມຕາຍເພີ້ມຂຶ້ນ ໂດຍສະເພາະ ຢູ່ໃນແຂວງ Helmand ບ່ອນທີ່ພວກທາລິບານໄດ້ຕັ້ງເປັນທີ່ໝັ້ນນັ້ນ.
ທ່ານ Anthony Cordesman ປະທານ ອົງການ Burk ຂອງສູນກາງຍຸດທະສາດ ແລະການຄົ້ນຄວ້ານາໆຊາດ ກ່າວຕໍ່ ວີໂອເອ ວ່າ “ກອງທັບອາກາດອັຟ ກາສິນຖານ ມີບັນຫາໃນການຂະຫຍາຍໂຕ ຕຳຫລວດອັຟການິສຖານປະຕິບັດງານບໍ່ດີແລະທ່ານກຳລັງມອງເຫັນເສດຖະກິດທີ່ພວມກ້າວເຂົ້າສູ່ວິກິດການ.”
ໃນອາທິດແລ້ວນີ້ ປະທານາທິບໍດີ Barack Obama ໄດ້ປະກາດວ່າ ທ່ານຈະ ຖອນທະ ຫານສະຫະລັດ ອອກຈາກອັຟການິສຖານຊ້າລົງ. ແທນທີ່ຈະຖອນໃຫ້ ເຫລືອຢູ່ 5,500 ຄົນ ໃນທ້າຍປີນີ້ ທະຫານສະຫະລັດ 8,400 ຄົນຈະເຮັດໜ້າ ທີ່ຕໍ່ໄປ ຢູ່ອັຟການິສຖານຈົນຮອດວັນສຸດທ້າຍຂອງການເປັນປະທານາທິບໍດີ ຂອງທ່ານ Obama ໃນເດືອນມັງກອນ ປີ 2017.
ອ່ານຂ່າວນີ້ເພີ້ມເປັນພາສາອັງກິດ
