ລັດຖະມົນຕີກະຊວງປ້ອງກັນປະເທດ ສະຫະລັດ ທ່ານ ມາກ ເອັສເປີ ເວົ້າວ່າ ການສິ້ນສຸດ ຂໍ້ຕົກລົງສອງຝ່າຍກັບ ຟີລິບປິນ ທີ່ປົກຄຸມການປະຈຳການຂອງ ກອງທັບ ສະຫະລັດ ຢູ່ທີ່ນັ້ນ “ຈະເປັນການເຄື່ອນໄຫວໃນທາງທີ່ຜິດ.”
ປະທານາທິບໍດີ ຟີລິບປິນ ທ່ານ ໂຣດຣິໂກ ດູເຕີເຕ ໄດ້ອອກແຈ້ງການຢ່າງເປັນທາງການຕໍ່ ສະຫະລັດ ກ່ຽວກັບ ການຕັດສິນໃຈຂອງທ່ານທີ່ຈະຍົກເລີກຂໍ້ຕົກລົງກອງກຳລັງປະຈຳການໃນຕ່າງປະເທດ ໃນຕອນແລງວັນອັງຄານທີ່ຜ່ານມາ ຫຼັງຈາກໄດ້ຂົ່ມຂູ່ຢ່າງຊ້ຳແລ້ວຊ້ຳອີກ ວ່າຈະຫຼຸດລະດັບການເປັນພັນທະມິດທາງທະຫານຂອງສອງປະເທດນັ້ນ. ຂໍ້ຕົກລົງປີ 1998 ດັ່ງກ່າວ ໄດ້ສະໜອງການອະນຸຍາດທາງກົດໝາຍ ສຳລັບກອງທະຫານ ສະຫະລັດ ຫຼາຍພັນຄົນ ຜູ້ທີ່ຖືກສັບປ່ຽນໄປປະເທດ ຟີລິບປິນ ສຳລັບການຝຶກຊ້ອມທາງທະຫານ ແລະ ການຊ່ວຍເຫຼືອດ້ານມະນຸດສະທຳ ໃນແຕ່ລະປີ.
ທ່ານ ເອັສເປີ ໄດ້ກ່າວຕໍ່ບັນດານັກຂ່າວໃນລະຫວ່າງການເດີນທາງໄປເຂົ້າຮ່ວມກອງປະຊຸມ ອົງການ NATO ໃນນະຄອນຫຼວງ ບຣັສໂຊລສ໌ ປະເທດ ແບລຈຽມ ວ່າ “ພວກເຮົາຫາກໍ່ໄດ້ຮັບແຈ້ງການໃນຕອນເດິກຂອງຄືນວານນີ້. ພວກເຮົາຕ້ອງໄດ້ທຳຄວາມເຂົ້າໃຈກັບມັນ.”
ທ່ານລັດຖະມົນຕີປ້ອງກັນປະເທດໄດ້ກ່າວວ່າ ການເຄື່ອນໄຫວດັ່ງກ່າວ, ມີກຳນົດຖືກບັງຄັບໃຊ້ພາຍໃນ 180 ວັນ, ເປັນການຂັດແຍ້ງຕໍ່ຄວາມພະຍາຍາມສອງຝ່າຍກັບ ຟີລິບປິນ ແລະ ຄວາມພະຍາຍາມໂດຍລວມກັບບັນດາພັນທະມິດໃນພາກພື້ນ ເພື່ອຜັກດັນໃຫ້ ຈີນ ຍຶດຖືລະບຽບການສາກົນໃນພາກພື້ນດັ່ງກ່າວ.
ທ່ານ ເອັສເປີ ໄດ້ກ່າວວ່າ “ໃນຂະນະທີ່ພວກເຮົາພະຍາຍາມເສີມຂະຫຍາຍການມີໜ້າຂອງພວກເຮົາ ແລະ ແຂ່ງຂັນກັບ ຈີນ ໃນຍຸກແຫ່ງການແຂ່ງຂັນເພື່ອອຳນາດສູງສຸດນີ້, ຂ້າພະເຈົ້າຄິດວ່າມັນເປັນການເຄື່ອນໄຫວໃນທາງທີ່ຜິດ, ແລະ ເພື່ອສາຍພົວພັນທີ່ມີມາຍາວນານ ທີ່ພວກເຮົາມີກັບ ຟີລິບປິນ, ສຳລັບສະຖານທີ່ຍຸດທະສາດຂອງເຂົາເຈົ້າ, ສຳລັບສາຍພົວພັນລະຫວ່າງປະຊາຊົນຂອງພວກເຮົາ ແລະ ປະເທດຂອງພວກເຮົາ.”
ເຈົ້າໜ້າທີ່ອາວຸໂສຂອງລັດຖະບານທ່ານ ທຣຳ ກໍໄດ້ກ່າວຢ້ຳຄຳເຫັນຂອງທ່ານ ເອັສເປີ ເຊັ່ນກັນ.
ເຈົ້າໜ້າທີ່ຄົນດັ່ງກ່າວໄດ້ເວົ້າໃນຖະແຫຼງການສະບັບນຶ່ງ ໃນວັນອັງຄານວານນີ້ວ່າ “ພວກເຮົາຜິດຫວັງກັບການຕັດສິນໃຈຂອງລັດຖະບານ ຟີລິບປິນ.”
ລາວໄດ້ກ່າວຕື່ມວ່າ “ສະຫະລັດ ໄດ້ມີປະຫວັດທີ່ຍາວນານກັບລັດຖະບານ ແລະ ປະຊາຊົນຂອງ ຟີລິບປິນ ແລະ ໄດ້ຮັບຮູ້ວ່າຄວາມປອດໄພໃນພາກພື້ນ ແລະ ທົ່ວໂລກແມ່ນຈະມີການຕອບສະໜອງຫຼາຍທີ່ສຸດ ຜ່ານການເປັນຄູ່ຮ່ວມທີ່ໄດ້ຮັບຖືກມອບສິດໃຫ້ໂດຍຂໍ້ຕົກລົງ ກອງກຳລັງປະຈຳການໃນຕ່າງປະເທດ.” ທ່ານໄດ້ກ່າວຕື່ມວ່າ “ພວກເຮົາຈະສືບຕໍ່ເຮັດວຽກກັບ ຄູ່ຮ່ວມລັດຖະບານ ຟີລິບປິນ ຂອງພວກເຮົາ ເພື່ອເສີມຂະຫຍາຍສາຍພົວພັນນີ້ ໃນວິທີທີ່ເປັນຜົນປະໂຫຍດຕໍ່ສອງປະເທດຂອງພວກເຮົາ.”
