ລັດຖະບານປະທານາທິບໍດີໂອບາມາກ່າວວ່າ ຕົນຈະນຳສະເໜີຕໍ່ລັດຖະສະພາໃຫ້ຕັດກຳລັງ
ພາກພື້ນດິນຂອງສະຫະລັດລົງ 100,000 ຄົນ ຊຶ່ງເປັນພາກສ່ວນນຶ່ງຂອງແຜນການຕັດງົບ
ປະມານລົງເກືອບ 500 ພັນລ້ານໂດລາໃນໄລຍະ 10 ປີຕໍ່ໜ້າ ແຕ່ພວກນັກຊ່ຽວຊານກ່າວ
ວ່າ ຜົນກະທົບແມ່ນຈະບໍ່ຮ້າຍແຮງໄປກວ່າທີ່ເບິ່ງຄືວ່າອາດຈະເປັນນັ້ນ.
ທ່ານ Leon Panetta ລັດຖະມົນຕີກະຊວງປ້ອງກັນປະເທດສະຫະລັດ ກ່າວຕໍ່ພວກນັກ
ຂ່າວທີ່ທຳນຽບຫ້າແຈ ໃນວັນພະຫັດວານນີ້ວ່າ ລັດຖະບານສະຫະລັດຈະຮ້ອງຂໍໃຫ້ຕັ້ງງົບ
ປະມານດ້ານປ້ອງກັນປະເທດໃນມູນຄ່າ 525 ພັນລ້ານໂດລາສຳລັບປີ 2013 ຊຶ່ງຈຳນວນ
ດັ່ງກ່າວແມ່ນ 6 ພັນລ້ານໂດລາ ແມ່ນໜ້ອຍກວ່າສົກງົບປະມານປີນີ້ທີ່ຈະສິ້ນສຸດລົງໃນວັນ
ທີ 30 ກັນຍາຈະມາ.
ແຕ່ນັກຊ່ຽວຊານ Ralph Cossa ຫົວໜ້າກຸ່ມຟໍຣຳປາຊີຟິກກ່າວວ່າ ຈຳນວນທີ່ສະເໜີໃຫ້
ມີການຕັດແມ່ນການຫຼຸດລົງໃນການໃຊ້ຈ່າຍທີ່ຄາດຄະເນວ່າຈະມີຂຶ້ນບໍ່ແມ່ນການໃຊ້
ຈ່າຍປັດຈຸບັນ.
ທ່ານ Cossa ເວົ້າວ່າ ການຕັດດັ່ງກ່າວແມ່ນໝາຍຄວາມວ່າງົບປະມານຈະເພີ່ມຂຶ້ນໜ້ອຍ
ລົງ ປີຕໍ່ປີ ກວ່າທີ່ໄດ້ວາງແຜນໄວ້ ໃນເມື່ອກ່ອນ.
ທ່ານ Panetta ກ່າວວ່າ ແຜນການທີ່ວ່ານີ້ ແມ່ນຈະເພີ່ມງົບປະມານຂອງທຳນຽບຫ້າແຈ
ຂຶ້ນເປັນ 567 ພັນລ້ານໂດລາ ພາຍໃນປີ 2017.
ທ່ານ Panetta ກ່າວໃນວັນພະຫັດວານນີ້ວ່າ ກະຊວງປ້ອງກັນປະເທດສະຫະລັດ ຍັງໄດ້
ຮ້ອງຂໍເງິນເພີ່ມຕື່ມ 88 ພັນລ້ານໂດລາສຳລັບການປະຕິບັດງານຢູ່ໃນຕ່າງປະເທດເພື່ອສືບ
ຕໍ່ໃຫ້ການສະໜັບສະໜຸນ ທະຫານອະເມຣິກັນ ຢູ່ໃນອັຟການິສຖານ. ແຜນການທີ່ວ່ານີ້ຍັງ
ຮວມທັງການປ່ຽນແປງທີ່ເພັງເລັ່ງໃສ່ເຂດເອ ເຊຍປາຊີຟິກແລະພາກຕາເວັນອອກກາງ.
ທ່ານ Cossa ແລະກຸ່ມຟໍຣຳປາຊີຟິກ ກ່າວວ່າ ການຕັດທີ່ສຳຄັນທີ່ສຸດກໍຈະແມ່ນຈຳນວນ
ຂອງກຳລັງພາກພື້ນດິນ ແຕ່ທ່ານກ່າວຕື່ມວ່າ ການຕັດບາງສ່ວນມີທ່າທາງວ່າ ຈະດຳເນີນ
ໄປ ໂດຍຜ່ານການຫຼຸດຂອງຂອງຂະໜາດ ຂະນະທີ່ພວກທະຫານ ພາກັນອອກກິນເບ້ຍບຳ
ນານຫຼືກັບຄືນໄປສູ່ຊີວິດພົນລະເຮືອນ.
