ລິ້ງ ສຳຫລັບເຂົ້າຫາ

ວັນອັງຄານ, ໑໙ ມີນາ ໒໐໒໔

ສຫລ ຈັດໃຫ້ຈີນ ຢູ່ໃນລະດັບ ຕ່ຳສຸດ ຂອງ ປະເທດ ທີ່ຄ້າມະນຸດ


ເດັກຊາຍຊາວວີເກີ ຢືນຢູ່ຂ້າງໃນຂອງລົດຕຳຫຼວດ ຄອງ ຫອຍໂຄ່ງຂອງຈັງຫວັດ Songkhla, ໄທ. ລາວແມ່ນສ່ວນນຶ່ງ
ຂອງ 200 ຄົນ ທີ່ໄດ້ກູ້ມາໄດ້ຈາກສູນຂອງຂະບວນການຄ້າມະນຸດ.
ເດັກຊາຍຊາວວີເກີ ຢືນຢູ່ຂ້າງໃນຂອງລົດຕຳຫຼວດ ຄອງ ຫອຍໂຄ່ງຂອງຈັງຫວັດ Songkhla, ໄທ. ລາວແມ່ນສ່ວນນຶ່ງ ຂອງ 200 ຄົນ ທີ່ໄດ້ກູ້ມາໄດ້ຈາກສູນຂອງຂະບວນການຄ້າມະນຸດ.

ກະຊວງ​ການ​ຕ່າງປະ​ເທດສະຫະລັດ ​ໄດ້​ນຳ​ອອກ​ເຜີຍ​ແຜ່​ ລາຍ​ງານ​ປະຈຳ​ປີ​ຂອງ​ຕົນ
ກ່ຽວກັບ​ການ​ຄ້າ​ມະນຸດ ທີ່​ມີ​ລາຍ​ຊື່​ຂອງ 23 ປະ​ເທດ ທີ່​ຂີ້ຮ້າຍ​ທີ່​ສຸດ​ໃນເລື່ອງການລ່ວງ
ລະເມີດທີ່​ວ່າ​ນີ້ ອັນຮວມມີ ປະເທດຈີນ ທີ່​ໄດ້​ຫຼຸດລະດັບ​ຕ່ຳ​ລົງມາ ​ເທົ່າ​ທຽມ​ກັບປະ​ເທດ
ເກົາຫຼີ​ເໜືອ ​ແລະ​ຊີ​ເຣຍ. Nike Ching ນັກ​ຂ່າວ​ຂອງ VOA ປະຈຳກະຊວງ​ການ​ຕ່າງ
ປະ​ເທດ ມີ​ລາຍ​ງານເລື່ອງນີ້ ຊຶ່ງ​ວັນນະ​ສອນ ຈະສະ​ເໜີ​ລາຍ​ລະອຽດຕໍ່ທ່ານ​ໃນ​ອັນ​ດັບ​ຕໍ່​ໄປ.

ຂະ​ບວນການ​ຄ້າ​ມະນຸດ ຖື​ວ່າ ​ເປັນ​ລະບົບ​ຂ້າ​ທາດ​ສະ​ໄໝໃໝ່ ເປັນ​ອຸດສາຫະກຳ​ອາດຊະຍາກຳຫຼາຍໆ​ພັນ​ລ້ານ​ໂດ​ລ່າ ທີ່ຕັດ​ເສລີພາບ​ຂອງ​ຜູ້​ຄົນປະມານ​ 20 ລ້ານ​ຄົນ
​ໃນ​ທົ່ວ​ໂລກ ອີງ​ຕາມ​ພວກເຈົ້າ​ໜ້າ​ທີ່​ຂອງ​ສະຫະລັດ.

ສິ່ງ​ທີ່​ເປັນໜ້າສັງເກດ ຢູ່ໃນ​ລາຍ​ງານ​ກ່ຽວກັບການ​ຄ້າ​ມະນຸດລາຍ​ບຸກຄົນໃນປີ​ນີ້
ກໍແມ່ນວ່າ ​ ​ກະຊວງ​ການ​ຕ່າງປະ​ເທດ ​ໄດ້​ຫຼຸດລະດັບ​ຂອງ​ປະ​ເທດ​ຈີນ ​ໃຫ້​ຕ່ຳລົງສູ່
ລະດັບ ​ຂອງເກົາຫຼີ​ເໜືອ ​ແລະ​ຊີ​ເຣຍ.

ທ່ານ Rex Tillerson ​ລັດຖະມົນຕີ​ກະຊວງ​ການ​ຕ່າງປະ​ເທດ ກ່າວ​ວ່່າ “​ປະ​ເທດ​ຈີນ
ໄດ້​ຖືກຫຼຸດລະດັບໃຫ້​ຕ່ຳລົງ ຢູ່​ໃນ​ລາຍ​ງານ​ຂອງ​ປີ​ນີ້ ​ສ່ວນ​ນຶ່ງ ກໍ​ແມ່ນ​ວ່າ​ຈີນ ບໍ່​ໄດ້​ເອົາ​ບາດກ້າວ​ຢ່າງ​ຈິງ​ຈັງ ເພື່ອຍຸຕິການ​ຄ້າ​ມະນຸດ ຊຶ່ງ​ຮວມທັງ ການ​ບັງຄັບ​ໃຊ້ພວກຄົນ
ງານ​ຈາກ​ເກົາຫຼີ​ເໜືອ ຢູ່​ໃນ​ປະ​ເທດ​ຈີນ.”

ການ​ຕັດສິນ​ໃຈຫຼຸດລະດັບຂອງຈີນ​ລົງ ​ນີ້ ຈະເຫັນ​ໄດ້ວ່າ​ເປັນການເຕືອນ​ຢ່າງ​ໃຫຍ່​ຫຼວງ
ດ້ານ​ປະຫວັດສິດ​ທິມະນຸດ​ຂອງ​ຈີນ ​ໂດຍ​ລັດຖະບານ​ຂອງ​ທ່ານ​ທຣຳ ຊຶ່ງ​ເປັນການເຄື່ອນ
ໄຫວທີ່​ທາງ​ປັກ​ກິ່ງປະນາມ. ​

ວໍ​ຊີງ​ຕັນ ກ່າວ​ວ່າ ລາຍ​ງານ​ນີ້ ​ມີ​ຈຸດປະສົງ​ຢາກໃຫ້​ມີ​ການ​ປ່ຽນ​ແປງໃຫ້ດີ​ຂຶ້ນກວ່າເກົ່າ. ​
ໃນ​ວັນ​ອັງຄານວານ​ນີ້​ ທີ່​ໄດ້​ມີ​ການ​ເຜີຍ​ແຜ່​ລາຍ​ງານ​ດັ່ງກ່າວ ມີຜູ້ຊາຍ ແລະ​ແມ່ຍິງ 8 ຄົນ
​ຈາກ​ທົ່ວ​ໂລກ ​ໄດ້​ຮັບ​ກຽດ​ອັນ​ສູງ​ສົ່ງ ​ໃນ​ຄວາມ​ພະຍາຍາມ​ຂອງ​ພວກ​ເຂົາ​ເຈົ້າ ທີ່​ໄດ້​ສ້າງ
​ຜົນງານ​ດີ​ເດັ່ນ ​ໃນ​ການ​ຕໍ່ສູ້​ຕ້ານຂະ​ບວນການ​ຂ້າທາດສະ​ໄໝ​ໃໝ່ ໃນ​ທົ່ວ​ໂລກ ຊຶ່ງ​ຮວມມີ
ນາງ Boom Mosby ຈາກ​ປະ​ເທດ​ໄທ.

ນາງ Boom Mosby ​ເຈົ້າ​ຂອງໂຄງການ HUG ຂອງ​ປະ​ເທດ​ໄທ ກ່າວ​ວ່າ “ພວກ​ເຮົາ​ມາ​ຢູ່ບ່ອນໜີ້ ກໍຍ້ອນ​ຄວາມ​ບາກ​ບັ່ນ​ປະຕິບັດ​ງານ​ຢ່​າງ​ແຂງ​ຂັນ ​ແລະ​ການ​ປະ​ກອບ​ສ່ວນ​
ຂອງທີ​ມງານ​ທີ່​ເປັນ​ວິລະ​ບຸລຸດ​ຫຼາຍໆ​ທ່ານຮ່ວມ​ກັນ. ​ໃນ​ທີ່​ສຸດ ຕອນ​ທີ່​ປະ​ເຊີນໜ້າກັບ
ພວກຜີມານຂະ​ບວນການ​ຄ້າ​ມະນຸດ ພວກ​ເຮົາທັງ​ໝົດ ຕ້ອງ​ປະທະ​ກັບ​ມັນຊຶ່ງໆ​ໜ້າ
ດ້ວຍ​ທາງເລືອກ​ທີ່​ວ່າ: ຈະບໍ່​ເຮັດ​ຫຍັງ​ເລີຍ ຫຼືບໍ່ ກໍຕ້ອງ​ເຮັດ​ອັນ​ໃດ​ອັນ​ນຶ່ງ.”

​ພວກເຈົ້າ​ໜ້າ​ທີ່​ສະຫະລັດ ຊຶ່ງ​ຮວມທັງລູກ​ສາວ​ຂອງ​ປະທານາທິບໍດີ​ສະຫະລັດ ທ່ານນາງ
Ivanka ຊຶ່ງ​ໃນ​ວັນ​ອັງຄານ​ວານ​ນີ້ ​ໄດ້​ຮຽກຮ້ອງ​ໃຫ້​ເຈົ້າ​ໜ້າ​ທີ່​ຮັບຜິດຊອບ​ໃນ​ບັນດາ
​ປະ​ເທດ​ອື່ນໆ ບໍ່​ໃຫ້ຫຼັບຫູຫຼັບ​ຕາແບບ ບໍ່​ຮູ້​ບໍ່​ເຫັນ ​ອາດຊະ​ຍາ​ກຳ​ຂະ​ບວນການ​ຄ້າ​ມະນຸດ.

ທ່ານ​ນາງ Ivanka ກ່າວ​ວ່າ: “ລາຍ​ງານປີ​ນີ້ ​ໄດ້​ເນັ້ນ​ເຖິງ​ຄວາມ​ຮັບຜິດຊອບ​ຂອງ​ລັດ
ຖະບານ​ທັງ​ໝົດ ທີ່ຕ້ອງ​ຈັດການ ​ແລະ​ລົງ​ໂທດ​ພວກ​ທີ່​ປະກອບ​ການ​ໃນຂະ​ບວນການ​ຄ້າ​ມະນຸດ. ມັນ​ຍັງ​ເປີດ​ໂອກາດ​ໃຫ້​ຫຼາຍໆ​ປະ​ເທດ ​ໄດ້​ເຫັນ​ການ​ຕໍ່ສູ້​ວ່າເປັນ​ໄປແນວ​ໃດ
ຕໍ່ຂະ​ບວນການ​ຄ້າ​ມະນຸດ ຂອງ​ພວກອື່ນໆ ​ແລະ​ໃຫ້ຮັບ​ເອົາ​ຍຸດ​ທະ​ສາດ​ແລະ​ກົນ​ໄກ
​ທີ່​ມີ​ປະສິດທິ​ຜົນທີ່​ສຸດ ​ໃນ​ຂະນະ​ທີ່ ພະຍາຍາມ​ແກ້​ໄຂ​ແລະ​ປັບປຸງ​ບັນຫາ​ຂອງ​ຕົນ
ທີ່​ພວມປະ​ເຊີນ​ຢູ່​.”

ບັນດາ​ປະ​ເທດ​ທີ່ຢູ່​ໃນ​ລາຍ​ຊື່​ທີ່​ວ່າ​ນີ້ ​ແມ່ນ​ເປັນ​ປະ​ເທດ​ທີ່​ລ່ວງ​ລະ​ເມີດ​ທີ່​ຮ້າຍ​ແຮງ​ທີ່​ສຸດ
ທີ່​ສາມາດ​ນຳ​ມາ​ລົງ​ໂທດ ໂດຍ​ກີດ​ກັນ​ຈາ​ກການ​ປະກອບສ່ວນໃນ​ໂຄງການ​ແລກປ່ຽນຕ່າງໆ​ດ້ານວັດທະນະທຳ​ກັບ​ສະຫະລັດ.

ອ່ານ​ຂ່າວ​ນີ້​ເພີ້​ມຕື່ມ​ເປັນ​ພາສາ​ອັງກິດ

US Declares China as Among World's Worst Human Trafficking Offenders
please wait

No media source currently available

0:00 0:02:29 0:00

XS
SM
MD
LG