ປະທານາທິບໍດີສະຫະລັດທ່ານບາຣັກໂອບາມາ ຮຽກຮ້ອງໃຫ້ສະມາຊິກຂອງພັກຣີພັບບລີກັນ
ແລະພັກເດໂມແຄຣັທ ໃນລັດຖະສະພາສະຫະລັດຕົກລົງກັນກ່ຽວກັບແຜນການທີ່ຈະເພີ່ມຂີດ ຈຳກັດໃນການເປັນໜີ້ຂອງປະເທດຂະນະທີ່ສະຫະລັດພວມຫຍັບເຂົ້າໄປຫາໄພຂົ່ມຂູ່ຈາກການ
ຜິດສັນຍາໃກ້ຂຶ້ນເລື້ອຍໆໃນສັບປະດາໜ້ານີ້.
ໃນຄຳປາໄສປະຈຳສັບປະດາຂອງທ່ານໃນວັນເສົາມື້ນີ້ປະທານາທິບໍດີໂອບາມາເວົ້າວ່າທັງສອງ
ຝ່າຍຕ້ອງໄດ້ບັນລຸການປະນີປະນອມພາຍໃນວັນອັງຄານຈະມາ ຊຶ່ງເປັນກຳນົດເສັ້ນຕາຍເພື່ອ ວ່າສະຫະລັດຈະສາມາດຈ່າຍໜີ້ສິນຕ່າງໆ ທັນກັບເວລາ. ທ່ານກ່າວວ່າ ທັງສອງຝ່າຍບໍ່ໄດ້ມີ
ຄວາມແຕກຕ່າງກັນຢ່າງໃຫຍ່ຫຼວງແຕ່ປະການໃດໃດກ່ຽວກັບບັນຫາຕ່າງໆທີ່ພົວພັນແລະເວົ້າ
ວ່າຜົນຂອງຄວາມບໍ່ສາມາດທີ່ຈະບັນລຸການຕົກລົງກັນໄດ້ນັ້ນ ແມ່ນໃຫ້ອະໄພບໍ່ໄດ້.
ຄຳປາໄສປະຈຳສັບປະດາຂອງປະທານາທິບໍດີໂອບາມາ ທີ່ຮຽກຮ້ອງໃຫ້ປານີປານອມກັນ:
ໃນມື້ວັນສຸກວານນີ້ ສະພາສູງຂອງສະຫະລັດທີ່ຄວບຄຸມໂດຍພັກເດໂມແຄຣັທ ໄດ້ຂັດຂວາງ
ຕໍ່ແຜນການຂອງພັກຣີພັບບລີກັນທີ່ຈະເພີ່ມຂີດຈຳກັດໃນການກູ້ຢືມເງິນຂອງປະເທດຂຶ້ນຈາກ
14 ພັນ 300 ຕື້ໂດລາ ສະພາຕໍ່າສະຫະລັດໄດ້ໃຫ້ການອະນຸມັດຕໍ່ຮ່າງກົດໝາຍທີ່ນຳສະເໜີ ໂດຍປະທານສະພາຕໍ່າທ່ານ John Boehner ບໍ່ເທົ່າໃດຊົ່ວໂມງກ່ອນໜ້ານັ້ນ.
ປະທານາທິບໍດີໂອບາມາເວົ້າວ່າແຜນການຂອງທ່ານ Boehner ຈະເອົາເສດຖະກິດມາເປັນ
ໂຕປະກັນທາງການເມືອງຂອງວໍຊິງຕັນອີກຄັ້ງນຶ່ງ ໂດຍບັງຄັບໃຫ້ສະຫະລັດຕ້ອງໄດ້ປະສົບ ກັບວິກິດການໜີ້ສິນຄືນອີກໃນໄລຍະບໍ່ເທົ່າໃດເດືອນຂ້າງໜ້າ.
ແຜນການທີ່ວ່ານີ້ ຮຽກຮ້ອງໃຫ້ເພີ່ມຂີດຈຳກັດ ໃນການເປັນໜີ້ຂອງສະຫະລັດຂຶ້ນຕື່ມ 900
ພັນລ້ານໂລດາໃນທັນທີ ເພື່ອເປັນການແລກປ່ຽນ ກັບການຕັດການໃຊ້ຈ່າຍຕ່າງໆລົງ 900 ພັນລ້ານໂດລາພາຍໃນໄລຍະ 10 ປີຕໍ່ໜ້າແລະນອກນັ້ນຍັງໄດ້ສະເໜີທີ່ຈະເພີ່ມຂີດຈຳກັດໃນ
ການເປັນໜີ້ຂອງສະຫະລັດຂຶ້ນຕື່ມອີກ ໃນຕົ້ນປີໜ້າ ຖ້າວໍຊິງຕັນຫາກສາມາດດຳເນີນການ
ກ່ຽວກັບການຕັດການໃຊ້ຈ່າຍເພີ່ມຕື່ມ.
ຄຳປາໄສຕອບຂອງພັກຣີພັບບລິກັນ ໂດຍສະມາຊິກສະພາສູງ Jon Kyl:
ໃນຄຳປາໄສປະຈຳສັບປະດາຂອງພັກຣີພັບບລີກັນ ໃນວັນເສົາມື້ນີ້ສະມາຊິກສະພາສູງ Jon
Kyl ກ່າວວ່າ ພັກຣີພັບບລີກັນແມ່ນມີຄວາມປຸ້ມລຸມສາມັກຄີໃນຄວາມເຊື່ອທີ່ວ່າການເພີ່ມຂີດ ຈຳກັດໃນການເປັນໜີ້ຂອງປະເທດໂດຍບໍ່ໄດ້ຕັດການໃຊ້ຈ່າຍລົງຢ່າງສຳຄັນນັ້ນ ຈະເປັນການ
ຂາດຄວາມຮັບຜິດຊອບ.
ພວກຜູ້ນຳຂອງພັກເດໂມແຄຣັທໃນສະພາສູງສະຫະລັດໄດ້ຮຽກຮ້ອງໃຫ້ສະມາຊິກສະພາຂອງ
ພັກຣີພັບບລີກັນ ໃຫ້ການສະໜັບສະໜຸນຕໍ່ແຜນການ ຂອງຜູ້ນຳສຽງສ່ວນຫຼາຍໃນສະພາສູງ
ທ່ານ Harry Reid ທີ່ຈະຕັດການໃຊ້ຈ່າຍຂອງລັດຖະບານລົງ 2 ພັນ 500 ຕື້ໂດລາແລະ
ເພີ່ມຂີດຈຳກັດໃນການກູ້ຢືມເງິນຂຶ້ນໃຫ້ພຽງພໍສຳລັບການໃຊ້ຈ່າຍຂອງລັດຖະບານໄປຈົນຮອດ
ທ້າຍປີ 2012.
ເບິ່ງວີດີໂອລາຍງານພາສາອັງກິດ ທີ່ກ່ຽວຂ້ອງກັບບັນຫາໜີ້ສິນຂອງສະຫະລັດ:
