ລິ້ງ ສຳຫລັບເຂົ້າຫາ

ສະພາຕໍ່າສະຫະລັດ ລົງຄະແນນສຽງ ກ່ຽວກັບຮ່າງກົດໝາຍ ໜີ້ສິນຂອງປະເທດ

  • ໄພສານ ວໍຣະຈັກ

ປະທານສະພາຕໍ່າສະຫະລັດ ທ່ານ John Beohner (26 ກໍລະກົດ 2011)

ລັດຖະສະພາຈະລົງຄະແນນສຽງ ກ່ຽວ​ກັບແຜນການຂອງພັກຣີພັບບລີກັນເພື່ອແກ້ໄຂວິກິດ
ການໜີ້ສິນຂອງສະຫະລັດໃນວັນພະຫັດມື້ນີ້ ຊຶ່ງມີເວລາຍັງເຫຼືອບໍ່ຮອດນຶ່ງອາທິດກ່ອນທີ່ປະ
ເທດຈະໝົດເງິນສຳລັບຈ່າຍໜີ້ສິນຕ່າງໆ.

ພວກສະມາຊິກຂອງສະພາຕໍ່າສະຫະລັດທີ່ຄວບຄຸມໂດຍພັກຣີພັບບລີກັນຈະລົງຄະແນນສຽງ
ກ່ຽວກັບຮ່າງກົດໝາຍ ທີ່ນຳສະເໜີໂດຍທ່ານ John Boehner ປະທານສະພາຕໍ່າ ຊຶ່ງຈະ
ເພີ່ມຂີດຈຳກັດໃນການກູ້ຢືມເງິນຂອງປະເທດຂຶ້ນຈາກ 14 ພັນ 300 ຕື້ໂດລາເພື່ອເປັນການ
ແລກປ່ຽນກັບການຕັດການໃຊ້ຈ່າຍລົງຫຼາຍໆພັນລ້ານໂດລາ.

ປະທານາທິບໍດີບາຣັກໂອບາມາຂູ່ວ່າ ຈະໃຊ້ສິດຢັບຢັ້ງຫຼືວີໂຕ້ຮ່າງກົດໝາຍສະບັບນີ້ທີ່ໄດ້ຮັບ
ການຄັດຄ້ານ​ເຊ່ນ​ກັນຈາກ​ເພື່ອ​ນສະມາຊິກພັກເດໂມແຄຣັທຂອງປະທານາທິບໍດີຢູ່ໃນສະພາ
ສູງຕະຫຼອດທັງສະມາຊິກຂອງພັກຣີພັບບລີກັນທີ່ສັງກັດຢູ່ໃນຂະບວນການ Tea Party ທີ່
ນິຍົມແນວທາງເດີມຈັດນັ້ນ.

ໃນມື້ວັນພຸດວານນີ້ ທ່ານ Boehner ໄດ້ທຳການຮຽກຮ້ອງແບບບໍ່ມີຄາລົມຄົມຄາຍໃຫ້ສະ
ມາຊິກສະພາຂອງພັກຣີພັບບລີກັນສະໜັບສະໜຸນແຜນການດັ່ງກ່າວ.

ປະທານາທິບໍດີໂອບາມາໃຫ້ການສະໜັບສະໜຸນ ຕໍ່ແຜນການຄູ່ແຂ່ງທີ່ນຳສະເໜີໂດຍຜູ້ນຳ
ສຽງສ່ວນຫຼາຍໃນສະພາສູງສະຫະລັດທ່ານ Harry Reid ສັງກັດພັກເດໂມແຄຣັທທີ່ຈະເພີ່ມ
ຂີດຈຳກັດສໍາລັບການກູ້ຢືມເງິນຂອງປະເທດຂຶ້ນຫຼາຍກວ່ານັ້ນ.

ຖ້າຫາກບໍ່ມີການຮັບຮອງເອົາຮ່າງກົດໝາຍໃດນຶ່ງ ພາຍໃນວັນທີ 2 ສິງຫາຊຶ່ງເປັນເສັ້ນຕາຍ
ແລ້ວນັ້ນສະຫະລັດກໍອາດຈະບໍ່ສາມາດປະຕິບັດຕາມພັນທະທາງດ້ານການເງິນ ໃນການຊໍາ
ລະໜີ້ສິນບາງຢ່າງຂອງຕົນໄດ້.

ທັງກະຊວງການເງິນຂອງສະຫະລັດ ທະນາຄານກາງ ແລະທຳນຽບຂາວຕ່າງກໍໄດ້ເຕືອນວ່າ
ການຜິດສັນຍາທີ່ວ່ານີ້ຈະມີຜົນກະທົບທີ່ຕິດຕາມມາຢ່າງຮ້າຍແຮງຕໍ່ເສດຖະກິດ. ພວກນັກ
ເສດຖະສາດເວົ້າວ່າ ການຜິດສັນຍານີ້ຍັງຈະມີຜົນກະທົບໃນທາງລົບຢ່າງຮ້າຍແຮງຕໍ່ເສດຖະ
ກິດຂອງໂລກນຳດ້ວຍ.

XS
SM
MD
LG