ທ່ານ Harry Reid ຜູ້ນໍາສຽງສ່ວນຫລາຍຂອງສະພາສູງສະຫະລັດ ໄດ້ກ່າວຫາພວກ ສະມາຊິກສະພາພັກຣີພັບບລິກັນວ່າ ກໍາລັງຜັກດັນໃຫ້ສະຫະລັດຕົກຢູ່ໃນສະພາບໃກ້ຈະຜິດ ສັນຍາຊໍາລະໜີ້ ໂດຍການຕ້ານຢັນການປານີປານອມ ໃນການເຈລະຈາກັນເລຶ່ອງ ງົບປະມານ ທີ່ມີເດີມພັນສູງນັ້ນ.
ໃນຖະແຫລງການສະບັບນຶ່ງ ຫລັງຈາກກອງປະຊຸມສຸກເສີນເມື່ອຕອນແລງວັນເສົາວານນີ້ ກັບ ພວກຜູ້ນໍາລັດຖະສະພານັ້ນ ທ່ານ Reid ກ່າວວ່າ ທ່ານຈະຮັບເອົາແຕ່ພຽງຂໍ້ຕົກລົງທີ່ຈະຍົກ ລະດັບໜີ້ສິນຂອງສະຫະລັດ ຈໍາ ນວນ 14.3 ຕື້ໂດລາ ໄປຈົນເຖິງປີ 2012 ເທົ່ານັ້ນ ແລະຈະບໍ່ສະໜັບ ສະໜຸນການເພີ່ມຂຶ້ນ ໃນໄລຍະສັ້ນ.
ເວລານີ້ ຍັງບໍ່ປາກົດມີການຕອບໂຕ້ໂດຍທັນທີຈາກພວກຜູ້ນໍາຣີພັບບລິກັນ ໃນລັດຖະສະພາ ຊຶ່ງກໍຄືທ່ານ Mitch McConnell ຜູ້ນໍາສຽງຂ້າງນ້ອຍໃນສະພາສູງ ແລະໂຄສົກສະພາຕໍ່າ ທ່ານ ຈອນ ເບນເນີ ນັ້ນເທື່ອ.
ແຫລ່ງຂ່າວສະພາຄອງແກຣສ ກ່າວວ່າ ພວກສະມາຊິກສະພາສູງຫວັງທີ່ຈະສະແດງໃຫ້ເຫັນ ຄວາມກ້າວໜ້າ ກ່ຽວກັບແຜນການທີ່ຈະເພີ່ມລະດັບໜີ້ ສິນຂຶ້ນນັ້ນພາຍໃນເວລາບ່າຍ 4 ໂມງ ຂອງວັນອາທິດມື້ນີ້ ຄືອີກປະມານ 8 ຊົ່ວໂມງຂ້າງໜ້ານີ້ ຕາມເວລາທ້ອງຖິ່ນໃນວໍຊິງຕັນ ບໍ່ດົນກ່ອນພວກຕະຫລາດການເງິນເອເຊຍເປີດ.
ຝ່າຍພັກຣີພັບບລິກັນປະຕິເສດການເພີ່ມລະດັບໜີ້ສິນຂຶ້ນ ຖ້າບໍ່ມີການລົດ ຜ່ອນການຂາດດຸນ ງົບປະມານລົງຢ່າງຫລວງຫລາຍ. ຝ່າຍຣີພັບບລິກັນ ຢາກໃຫ້ບັນລຸຜົນໃນເລື່ອງນີ້ໂດຍການ ຕັດງົບປະມານລົງ ແຕ່ຝ່າຍເດໂມແຄຣທ ຢາກໃຫ້ເພີ່ມພາສີລາຍໄດ້ຂຶ້ນ ຊຶ່ງຝ່າຍຣີພັບລິກັນ ບໍ່ຍອມ.
ສະຫະລັດຈະຕ້ອງເພີ່ມລະດັບໜີ້ສິນຂຶ້ນ ໃຫ້ທັນວັນທີ່ 2 ສິງຫາເດືອນໜ້ານີ້ ເພື່ອອໍານວຍ ໃຫ້ລັດຖະບານສາມາດສືບຕໍ່ຢືມເງິນ ເພື່ອປະຕິບັດພັນທະດ້ານການເງິນຂອງຕົນນັ້ນ.
ກ່ອນໜ້ານັ້ນ ໃນຕອນເຊົ້າວັນເສົາ ປະທານາທິບໍດີ ບາຣັກ ໂອບາມາ ກໍໄດ້ມີປະຊຸມສຸກ ເສີນເລື້ອງ ວິກິດການໜີ້ສິນນີ້ ທີ່ທໍານຽບຂາວ ກັບທ່ານ ຣີດ ທ່ານ McConnell ທ່ານ ເບນເນີ ແລະທ່ານນາງ ແນນຊີ ເປໂລຊີ ຜູ້ນໍາສຽງຂ້າງນ້ອຍໃນສະພາຕໍ່າ.
