ລາຄາຮຸ້ນໃນຕະຫຼາດຢູໂຣບສູງຂຶ້ນ ແລະລາຄາຮຸ້ນເອເຊຍກໍຖີບໂຕສູງຂຶ້ນໃນວັນຈັນມື້ນີ້
ຫລັງຈາກໄດ້ຍິນຂ່າວທີ່ວ່າ ປະທານາທິບໍດີ ບາຣັກ ໂອບາມາ ແລະຄະນະຜູ້ນໍາລັດສະພາສະຫະລັດ ໄດ້ບັນລຸຂໍ້ຕົກລົງກັນ ເພື່ອຫລີກລ່ຽງການເຮັດໃຫ້ສະຫະລັດບໍ່ສາມາດຈ່າຍໜີ້ສິນຂອງຕົນໄດ້ນັ້ນ.
ດັດຊະນີຊີ້ຮຸ້ນ Financial Times 100 ທີ່ກຸງລອນດອນ ດັດຊະນີ ຮຸ້ນ CAC-40 ທີ່ກຸງປາຣີ ແລະຮຸ້ນ DAX ທີ່ນະຄອນ Frankfurt ທັງໝົດມີລາຄາສູງຂຶ້ນປະມານນຶ່ງເປີເຊັນ ເວລາຕະຫຼາດໄຂຂຶ້ນໃນມື້ນີ້.
ລາຄາຮຸ້ນ Nikkei Index ທີ່ກຸງໂຕກຽວ ເພີ່ມຂຶ້ນ 1.3 ເປີເຊັນເວລາຕະຫຼາດອັດ ຫລັງຈາກລາຄາຕົກມາໄດ້ 3 ມື້ລຽນຕິດ.
ລາຄາຮຸ້ນທີ່ຮອງກົງ ປີດຕະຫຼາດສູງຂຶ້ນ 1 ເປີເຊັນ ແລະໃນຂະນະດຽວກັນລາຄາຕະຫຼາດຮຸ້ນໃນທົ່ວເອເຊຍ ກໍມີແນວໂນ້ມສູງຂຶ້ນ. ຄາດວ່າລາຄາຮຸ້ນໃນສະຫະລັດກໍຈະສູງຂຶ້ນຫລາຍສົມຄວນໃນວັນຈັນມື້ນີ້ ຫລັງຈາກຕົກລາຄາມາໄດ້ 1 ສັບປະດາ.
