ຈີນ ຊຶ່ງເປັນເຈົ້າໜີ້ລາຍໃຫຍ່ທີ່ສຸດຂອງອາເມຣິກາ ສະແດງຄວາມບໍ່ດີໃຈຢ່າງເລິກເຊິ່ງກ່ຽວ
ກັບຂໍ້ຕົກລົງເພີ່ມລະດັບໜີ້ສິນຂອງສະຫະລັດຂຶ້ນ ແລະວິທີການບັນລຸຂໍ້ຕົກລົງກັນນັ້ນ.
ອົງການໃຫ້ຄະແນນສິນເຊື່ອຂອງຈີນອົງການນຶ່ງ ໄດ້ລົດລະດັບຄວາມໜ້າເຊື່ອຖືດ້ານໜີ້
ສິນຂອງສະຫະລັດລົງໃນວັນພຸດມື້ນີ້ ໂດຍກ່າວວ່າ ຂໍ້ຕົກລົງດັ່ງກ່າວບໍ່ໄດ້ແກ້ໄຂບັນຫາ
ຕ່າງໆທີ່ເປັນຕົ້ນເຫດນັ້ນເລີຍ ແລະອົງການຂ່າວຊິນຫົວຂອງທາງການຈີນກໍບໍ່ໃຫ້ຄວາມ
ສໍາຄັນແກ່ຂັ້ນຕອນການເຈລະຈາທີ່ພາໃຫ້ມີການບັນລຸຂໍ້ຕົກລົງກັນນັ້ນ ໂດຍກ່າວວ່າ ເປັນ
ການຫລີ້ນລະຄອນສະແດງຄວາມສາມາດຕົບຕາຜູ້ຄົນຊື່ໆ.
ທ່ານ Zhou Xiaochuan ຜູ້ອໍານວຍການທະນາຄານແຫ່ງຊາດຈີນ ໄດ້ໃຊ້ພາສາທີ່ຍັບຍັ້ງ
ລະມັດລະວັງຫລາຍກວ່າໃນການອອກຄວາມເຫັນໃນທໍານອງຄ້າຍຄືກັນ. ແລະທ່ານໄດ້
ຮຽກຮ້ອງໃຫ້ລັດຖະບານກຸງວໍຊິງຕັນເອົາບາດກ້າວທີ່ເປັນຮູບປະທໍາແລະມີຄວາມຮັບຜິດ
ຊອບເພື່ອກູ້ເອົາຄວາມໝັ້ນໃຈໃນພັນທະບັດຂອງກະຊວງການເງິນຂອງສະຫະລັດຄືນມາ
ໂດຍກ່າວວ່າ ຄວາມບໍ່ແນ່ນ່ອນເປັນໄພຂົ່ມຂູ່ອັນນຶ່ງຕໍ່ການຟື້ນໂຕຄືນຂອງເສດຖະກິດໂລກ
ນັ້ນ.
ທ່ານ Zhou ໄດ້ສະແດງຄວາມຍິນດີນໍາຂໍ້ຕົກລົງກັນໃນວັນອັງຄານວານນີ້ ແຕ່ກ່າວວ່າ
ທ່ານຈະຕິດຕາມເບິ່ງຢ່າງໃກ້ຊິດວ່າຈະມີການຈັດຕັ້ງປະຕິບັດກັນໄປແບບໃດນັ້ນ. ທ່ານ
ຍັງກ່າວເຊ່ນກັນວ່າ ຈີນຈະສືບຕໍ່ກະຈາຍການລົງທຶນຂອງຕົນອອກໄປ ເພື່ອໃຫ້ມີຄວາມ
ຫລາກຫລາຍ.
