ສະພາສູງສະຫະລັດຈະລົງມະຕິໃນວັນອັງຄານມື້ນີ້ ກ່ຽວກັບຮ່າງກົດໝາຍປານີປາ
ນອມກັນສະບັບນຶ່ງເພື່ອຕັດລາຍຈ່າຍຂອງລັດຖະບານລົງແລະໃຫ້ລັດຖະບານກູ້ຢືມ
ເງິນເພີ່ມຂຶ້ນໄດ້ ຊຶ່ງມີທ່າທາງວ່າຈະເຮັດໃຫ້ຄວາມຢ້ານກົວ ທີ່ມີມາເປັນເວລາຫລາຍ
ສັບປະດາຍຸດຕິລົງ ກ່ຽວກັບວ່າສະຫະລັດຈະບໍ່ສາມາດຈ່າຍໜີ້ສິນຂອງຕົນໄດ້ນັ້ນ.
ຄາດວ່າສະພາສູງຈະລົງມະຕິກັນໃນເວລາທ່ຽງວັນ ມື້ນີ້ ຕາມເວລາໃນທ້ອງຖິ່ນ ຫລືອີກປະມານ 3 ຊົ່ວໂມງເຄິ່ງໃນເມືອງລາວ ຊຶ່ງເປັນເວລາພຽງ 12 ຊົ່ວໂມງ ກ່ອນທີ່ລັດຖະບານຈະກ່າວວ່າຕົນຈະໝົດເງິນທີ່ຈະຈ່າຍໜີ້ສິນຂອງຕົນ.
ໃນແລງວັນຈັນວານນີ້ ຮ່າງຍັດຕິດັ່ງກ່າວໄດ້ຜ່ານການທົດສອບຄັ້ງຍິ່ງໃຫຍ່ທີ່ສຸດ ເວລາສະພາຕໍ່າພາຍໃຕ້ການນໍາພາຂອງພັກ Republican ໄດ້ຮັບຜ່ານເອົາດ້ວຍຄະແນນສຽງເຫັນດີ 269 ຕໍ່ 161 ສຽງຄັດຄ້ານ.
ຖ້າຮ່າງຍັດຕິດັ່ງກ່າວໄດ້ຖືກຮັບຜ່ານໃນສະພາສູງໃນວັນອັງຄານມື້ນີ້ ກໍຈະຖືກສົ່ງຕໍ່ໄປຍັງປະທານາທິບໍດີບາຣັກ ໂອບາມາ ທີ່ໄດ້ເວົ້າວ່າ ທ່ານມີຄວາມກະຕືລືລົ້ນທີ່ຈະໄດ້ລົງນາມໃນຮ່າງຍັດຕິດັ່ງກ່າວ ເພື່ອໃຫ້ເປັນກົດໝາຍມີຜົນບັງຄັບໃຊ້ໄດ້ນັ້ນ.
ຂໍ້ຕົກລົງກັນດັ່ງກ່າວນີ້ຈະອະນຸຍາດໃຫ້ລັດຖະບານສືບຕໍ່ກູ້ຢືມເງິນໄດ້ເຖິງປີ 2012
ເພື່ອແລກປ່ຽນກັບການຕັດລາຍຈ່າຍລົງເກືອບ 1 ພັນຕື້ໂດລາໃນລະຍະ 10 ປີຕໍ່ໜ້າ.
ນອກນັ້ນ ຂໍ້ຕົກລົງດັ່ງກ່າວຍັງຈະຈັດຕັ້ງຄະນະກໍາມະການຮ່າງງົບປະມານທີ່ມີ 2 ພັກ
ເຂົ້າຮ່ວມນໍາ ຊຶ່ງຈະມີພາລະກິດໃນການຫາທາງຕັດຄ່າໃຊ້ຈ່າຍຂອງລັດຖະບານລົງ
ຕື່ມອີກ 1500 ຕື້ໂດລາ. ຖ້າຄະນະກໍາມະການດັ່ງກ່າວບໍ່ສາມາດຕົກລົງກັນໃນເລື້ອງ
ນີ້ໄດ້ ລັດຖະບານກໍຈະຕ້ອງໄດ້ຫາທາງຕັດຄ່າໃຊ້ຈ່າຍຕ່າງໆລົງຕື່ມອີກ.
