ຂະບວນລົດທະຫານ ສະຫະລັດ ຂະບວນນຶ່ງ ໄດ້ຖືກໂຈມຕີໃນວັນພຸດວານນີ້ ໂດຍນັກຮົບທະຫານບ້ານ ທີ່ສະໜັບສະໜູນລັດຖະບານ ຊີເຣຍ ໃນພາກຕາເວັນອອກສຽງເໜືອຂອງ ຊີເຣຍ, ອີງຕາມແຫຼ່ງຂ່າວໃນທ້ອງຖິ່ນ ແລະຄຳຖະແຫຼງຂອງ ບັນດາເຈົ້າໜ້າທີ່ ສະຫະລັດ.
ເຫດການດັ່ງກ່າວໄດ້ເກີດຂຶ້ນໃນບ້ານແຫ່ງນຶ່ງໃກ້ກັບເມືອງ ກາມິສລີ ທີ່ຕັ້ງຢູ່ພາກຕາເວັນອອກສຽງເໜືອນັ້ນ.
ກຳລັງປະສົມທີ່ນຳພາໂດຍ ສະຫະລັດ ທີ່ກຳລັງຕໍ່ສູ້ກັບກຸ່ມກໍ່ການຮ້າຍລັດອິສລາມໄດ້ກ່າວວ່າ ກອງທະຫານຂອງເຂົາເຈົ້າໄດ້ເລີ່ມຍິງປືນຢູ່ດ່ານກວດກາແຫ່ງນຶ່ງທີ່ຖືກຄວບຄຸມໂດຍກອງກຳລັງລັດຖະບານ ຊີເຣຍ ໃກ້ກັບເມືອງ ກາມິສລີ ຫຼັງຈາກເຂົາເຈົ້າໄດ້ຖືກໂຈມຕີດ້ວຍອາວຸດຂະໜາດນ້ອຍ.
ພັນເອກ ໄມລສ໌ ບີ ແຄກກິນສ໌ (Myles B. Caggins), ໂຄສົກຂອງກຳລັງປະສົມ ໄດ້ກ່າວໃນຖະແຫຼງການສະບັບນຶ່ງວ່າ “ໃນການປ້ອງກັນຕົນເອງນັ້ນ, ກອງທະຫານກຳລັງປະສົມໄດ້ທຳການຍິງຕອບໂຕ້. ສະຖານະການແມ່ນໄດ້ສະຫງົບລົງ ແລະ ກຳລັງຢູ່ພາຍໃຕ້ການສືບສວນສອບສວນ.” ທ່ານກ່າວຕື່ມວ່າ “ທະຫານລາດຕະເວນຂອງກຳລັງປະສົມໄດ້ກັບຄືນສູ່ຖານທັບ.”
ສື່ມວນຊົນລັດຖະບານ ແລະ ທ້ອງຖິ່ນໄດ້ກ່າວວ່າ ຄົນນຶ່ງໄດ້ເສຍຊີວິດໃນການຍິງກັນ ໃນເຫດການດັ່ງກ່າວ ແລະ ວ່າເຮືອບິນຮົບ ສະຫະລັດ ໄດ້ທຳການໂຈມຕີທາງອາກາດຢ່າງໜ້ອຍນຶ່ງຄັ້ງ ລຸນຫຼັງການຍິງກັນນັ້ນ.
ແຕ່ພັນເອກ ແຄກກິນສ ໄດ້ກ່າວວ່າ “ບໍ່ໄດ້ມີການໂຈມຕີທາງອາກາດ” ໃນຂົງເຂດນັ້ນ.
