ຄະນະກຳມະການ ຂອງສະພາ ໄດ້ອອກໝາຍຮຽກຕົວ ສະບັບໃໝ່ ຕໍ່ທ່ານ Michael
Flynn ໃນຄວາມພະຍາຍາມເພື່ອບັງຄັບໃຫ້ທ່ານມອບເອກກະສານຕ່າງໆ ແລະ ມາ
ໃຫ້ປາກຄຳກ່ຽວກັບການຮັບຕຳແໜ່ງເປັນທີ່ປຶກສາດ້ານຄວາມໝັ້ນຄົງຜູ້ທຳອິດໄລຍະ
ສັ້ນໆ ຂອງທ່ານປະທານາທິບໍດີ ດໍໂນລ ທຣຳ.
ທ່ານຟລິນ ບໍ່ໄດ້ເອົາຫົວຊາ ຕໍ່ຄະນະກຳມະການ ສືບລັບຂອງສະພາສູງ ເມື່ອຕົ້ນ
ສັບປະດານີ້ ໂດຍໄດ້ປະຕິເສດທີ່ຈະມອບຂໍ້ມູນທີ່ຄະນະກຳມະການ ໄດ້ຮ້ອງຂໍ
ກ່ຽວກັບໄລຍະ 24 ວັນ ທີ່ທ່ານໄດ້ເຂົ້າຮັບຕຳແໜ່ງສຳຄັນຢູ່ທີ່ທຳນຽບຂາວ ໃນສອງ
ສັບປະດາທຳອິດ ຂອງຄະນະລັດຖະບານ ທ່ານທຣຳ ນັ້ນ. ທ່ານທຣຳ ໄດ້ປົດທ່ານ
ຟລິນ ຍ້ອນບໍ່ໄດ້ເວົ້າຄວາມຈິງ ຕໍ່ຮອງປະທານາທິບໍດີ ທ່ານ Mike Pence ກ່ຽວກັບ
ການຕິດຕໍ່ກັບເອກອັກຄະລັດຖະທູດຣັດເຊຍ ປະຈຳສະຫະລັດ ໃນສອງສາມ
ສັບປະດາ ກ່ອນທີ່ທ່ານທຣຳ ຈະເຂົ້າກຳອຳນາດ.
ແຕ່ຄະນະກຳມະການສືບລັບຂອງສະພາສູງ ແລະຄະນະກຳມະການສືບລັບຂອງ ສະພາຕ່ຳກ່າວວ່າ ພວກເພິ່ນ ຈະອອກໝາຍຮຽກຕົວ ສະບັບໃໝ່ ຕໍ່ທ່ານຟລິນ. ທ່ານ
ຟລິນ ເປັນນາຍພົນກອງທັບບົກ ທີ່ໄດ້ກະສຽນແລ້ວ ຜູ້ທີ່ເປັນຕົວແທນດ້ານການເມືອງ
ທີ່ສຳຄັນຄົນນຶ່ງ ຂອງທ່ານທຣຳ ໃນລະຫວ່າງການໂຄສະນາຫາສຽງ ເມື່ອປີກາຍນີ້.
ທ່ານ Adam Schiff ສະມາຊິກຄົນສຳຄັນຂອງພັກເດໂມແຄຣັດ ປະຈຳຄະນະ
ກຳມະການສືບລັບຂອງສະພາຕ່ຳ ໄດ້ບອກບັນດານັກຂ່າວ ໃນວັນພຸດວານນີ້ວ່າ
“ໃນເບື້ອງຕົ້ນພວກເຮົາໄດ້ຮ້ອງຂໍໃຫ້ທ່ານຟລິນເຂົ້າມາ ປະກອບສ່ວນດ້ວຍ
ຄວາມ ສະໝັກໃຈ. ເພິ່ນໄດ້ປະຕິເສດ. ພວກເຮົາກໍຈະອອກໝາຍຮຽກຕົວ
ໃຫ້ຜູ້ກ່ຽວເຂົ້າມາ.”
ໃນການປະຕິເສດທີ່ຈະມອບເອກກະສານຕ່າງໆ ໃຫ້ແກ່ຄະນະກຳມະການ ຂອງ
ສະພາສູງນັ້ນ ທ່ານຟລິນໄດ້ໃຊ້ສິດພາຍໃຕ້ກົດໝາຍລັດຖະທຳມະນູນມາດຕາ
5ຂອງສະຫະລັດ ວ່າດ້ວຍການກະທຳ ທີ່ອາດເຮັດໃຫ້ຕົນຕ້ອງຮັບຜິດທາງອາຍາ.
ບັນດານັກຊ່ຽວຊານດ້ານກົດໝາຍ ກ່າວວ່າ ຖ້າທ່ານຟລິນ ມອບຂໍ້ມູນໃຫ້ແກ່
ຄະນະສືບສວນຂອງສະພາແລ້ວທ່ານກໍຈະສ່ຽງຕໍ່ການບໍ່ສາມາດອ້າງເອົາສິດທິ ພິເສດແບບດຽວກັນນັ້ນແລະການປະຕິເສດທີ່ຈະໃຫ້ປາກຄຳຕໍ່ຄະນະກຳມະ
ການສະພາ ທີ່ສືບສວນ ກ່ຽວກັບວ່າ ຣັດເຊຍແຊກແຊງເຂົ້າໃນການເລືອກຕັ້ງ
ສະຫະລັດເມື່ອ ປີກາຍນີ້ ວິທີໃດ ແລະ ອາດເປັນໄປໄດ້ວ່າ ມີການສົມຮູ້ຮ່ວມຄິດ
ລະຫວ່າງບັນ ດາຜູ້ຊ່ວຍໃນຄະນະໂຄສະນາຫາສຽງຂອງທ່ານທຣຳ ແລະບັນດາ
ເຈົ້າໜ້າທີ່ຂອງ ຣັດເຊຍ ເພື່ອຊ່ວຍໃຫ້ທ່ານທຣຳ ຊະນະການເລືອກຕັ້ງ.
