ພວກຜູ້ນຳຂອງພັກຣີພັບບລິກັນ ໃນສະພາຕໍ່າສະຫະລັດກ່າວວ່າ ພວກເຂົາມີແຜນການຈະ
ລົງຄະແນນສຽງໃນວັນອັງຄານມື້ນີ້ ກ່ຽວກັບແຜນການຂອງສະພາສູງ ທີ່ຈະຕໍ່ອາຍຸການ
ຕັດພາສີເງິນເດືອນອອກໄປອີກສອງເດືອນນັ້ນ. ເປັນທີ່ຄາດກັນຢ່າງກວ້າງຂວາງວ່າ ການ
ລົງຄະແນນສຽງຂອງສະພາຕໍ່າ ແມ່ນຈະປະຕິເສດຕໍ່ການຕໍ່ອາຍຸໄລຍະສັ້ນ ຊຶ່ງມີທາງເປັນໄປ
ໄດ້ວ່າ ພວກ ຄົນງານອາດຈະເຫັນເງິນເດືອນທີ່ພວກເຂົາເຈົ້າໄດ້ຮັບແທ້ໆນັ້ນຫຼຸດລົງໃນ
ວັນທີນຶ່ງມັງກອນຈະມານີ້ກໍໄດ້.
ພວກພັກຣີພັບບລິກັນຕ້ອງການໃຫ້ຕໍ່ອາຍຸເປັນເວລານຶ່ງປີແທນທີ່ຈະເປັນພຽງສອງເດືອນ.
ທ່ານ Eric Cantor ຜູ້ນໍາສຽງສ່ວນຫລາຍພັກຣີພັບບລິກັນໃນສະພາຕໍ່າ ກ່າວຕໍ່ພວກຜູ້ສື່
ຂ່າວເມື່ອຕອນບ່າຍວັນຈັນວານນີ້ວ່າ ການຕໍ່ອາຍຸອອກໄປອີກສອງເດືອນນັ້ນ ເປັນວິທີການ
ແກ້ໄຂບັນຫາທີ່ໃຊ້ການບໍ່ໄດ້ ແລະທ່ານໄດ້ປະຕິຍານວ່າ ຈະຜັກດັນຕໍ່ອາຍຸໃຫ້ໄດ້ນຶ່ງປີ.
ໃນຕອນເຊົ້າວັນຈັນວານນີ້ ທ່ານ ຈອນ ເບນເນີ ປະທານສະພາຕໍ່າສະຫະລັດສັງກັດພັກຣີພັບ
ບລິກັນ ບອກຜູ້ສື່ຂ່າວວ່າ ຄວາມເຫັນແຕກຕ່າງກັນລະຫວ່າງສະພາສູງ ແລະສະພາຕໍ່ານັ້ນ
ຕ້ອງຫາທາງຕົກລົງກັນໄດ້ໃນການປະຊຸມລະຫວ່າງສະພາທັງສອງ. ແຕ່ແນວໃດກໍຕາມ
ພວກຜູ້ນຳໃນສະພາສູງກ່າວວ່າ ຕົນບໍ່ມີແຜນການທີ່ຈະທຳການເຈລະຈາຂໍ້ຕົກລົງສະບັບໃໝ່
ກ່ອນທ້າຍປີນີ້.
ເມື່ອວັນເສົາຜ່ານມານີ້ ສະພາສູງໄດ້ອະນຸມັດດ້ວຍສຽງຖ້ວມລົ້ນໃຫ້ຕໍ່ອາຍຸ ການຕັດພາສີເງິນ
ເດືອນອອກໄປສອງເດືອນສໍາລັບຊາວອະເມຣິກັນ 160 ລ້ານຄົນ. ປະທານາທິບໍດີບາຣັກ
ໂອບາມາ ກ່າວວ່າ ທ່ານພູມໃຈຫລາຍ ກັນຂໍ້ຕົກລົງກັນນັ້ນ ເຖິງແມ່ນຄວາມຈິງແລ້ວ ທ່ານ
ກໍຢາກໃຫ້ຕໍ່ໄປອີກນຶ່ງປີນັ້ນກໍຕາມ.