ອົງການສະຫະປະຊາຊາດ ຫຼື UN ຈະສືບສວນສອບສວນເບິ່ງລາຍງານທີ່ກອງກຳລັງຮັກ ສາສັນຕິພາບສະຫະປະຊາຊາດໃນປະເທດຊູດານໃຕ້ ບໍ່ສາມາດໄປຊ່ວຍເຫຼືອຜູ້ຄົນ ທີ່ຖືກ ໂຈມຕີຢູ່ບໍລິເວນໂຮງແຮມແຫ່ງໜຶ່ງ ໃນນະຄອນຫຼວງ Juba ເມື່ອວັນທີ 11 ກໍລະກົດແລ້ວ ນີ້.
ພວກທະຫານ ຊູດານໃຕ້ ໄດ້ລວມກຸ່ມກັນຂົ່ມຂືນ, ທຳຮ້າຍຮ່າງກາຍ, ແລະ ໄດ້ປຸ້ນເອົາຊັບ ສິນຂອງບັນດາພະນັກງານຊ່ວຍເຫຼືອ, ເຊິ່ງແນເປົ້າໝາຍໂດຍສະເພາະເຈາະຈົງໃສ່ຊາວ ອາເມຣິກັນ ທີ່ພັກຢູ່ໂຮງແຮມ Terrain, ອີງຕາມລາຍງານ ຂອງອົງການຂ່າວເອພີ ໃນວັນ ຈັນທີ່ຜ່ານມານີ້.
ຜູ້ເຫັນເຫດການຫຼາຍຄົນ ທີ່ຖືກສຳພາດໂດຍອົງການຂ່າວໄດ້ກ່າວວ່າ ພວກທະຫານໄດ້ ທຳທ່າ ຄືກັບຈະປະຫານຊີວິດ ແລະ ໄດ້ບັງຄັບໃຫ້ຊາວຕ່າງຊາດເບິ່ງໃນຂະນະທີ່ພວກ ເຂົາຂ້ານັກຂ່າວໃນທ້ອງຖິ່ນ.
ບົດລາຍງານຂອງອົງການຂ່າວ AP ຍັງໄດ້ລະບຸວ່າ ຄົນທີ່ຢູ່ໃນບໍລິ ເວນໂຮງແຮມ Terrain ເຊິ່ງເປັນສະຖານທີ່ໆໄດ້ຮັບຄວາມນິຍົມສຳລັບຄົນຕ່າງປະເທດ ແລະ ຜູ້ນຳຂັ້ນ ສູງຂອງ ຊູດານໃຕ້, ໄດ້ຮ້ອງຂໍຄວາມຊ່ວຍເຫຼືອຫຼາຍຊົ່ວໂມງຈາກກອງກຳລັງຮັກສາສັນ ຕິພາບ UN ເຊິ່ງຕັ້ງຢູ່ຫ່າງບໍ່ເຖິງ 1 ກິໂລແມັດຈາກບ່ອນເກີດເຫດ, ແລະ ຈາກສະຖານທູດ ສະຫະລັດ.
ເອກອັກຄະລັດຖະທູດ ສະຫະລັດ ປະຈຳອົງການສະຫະປະຊາດຊາດ ທ່ານນາງ Samantha Power ໄດ້ກ່າວເຖິງຄວາມລົ້ມແຫຼວທັງຂອງ ລັດຖະບານ ຊູດານໃຕ້ ແລະ ກອງກຳລັງຮັກສາສັນຕິພາບ UN.
ທ່ານນາງ Power ໄດ້ກ່າວໃນຖະແຫຼງການສະບັບໜຶ່ງວ່າ “ຕະຫຼອດຄວາມຂັດແຍ້ງທີ່ມີ ມາ 3 ປີນີ້, ລັດຖະບານຊູດານໃຕ້ ໄດ້ອະນຸຍາດໃຫ້ມີການຂ້າຄົນ ແລະ ໃຊ້ຄວາມຮຸນ ແຮງທາງເພດໂດຍບໍ່ໄດ້ຮັບການລົງ ໂທດ ຢູ່ເປັນປະຈຳ."
ທ່ານນາງໄດ້ກ່າວວ່າ “ພວກເຮົາມີຄວາມເປັນຫ່ວງຢ່າງຍິ່ງວ່າ ກອງກຳລັງຮັກສາສັນຕິ ພາບ UN ອາດຈະບໍ່ມີຄວາມສາມາດ ຫຼືບໍ່ ກໍບໍ່ເຕັມໃຈທີ່ຈະຕອບຮັບຕໍ່ການຮຽກຮ້ອງ ຂໍຄວາມຊ່ວຍເຫຼືອນັ້ນ. ພວກເຮົາໄດ້ຂໍຮ້ອງ ແລະ ກຳລັງລໍຖ້າຄຳຕອບຈາກການສືບ ສວນສອບສວນ ໂດຍອົງການສະຫະປະຊາຊາດ ແລະ ໄດ້ຮຽກຮ້ອງໃຫ້ມີການເອົາບາດກ້າວ ແກ້ໄຂຢ່າງວ່ອງໄວ ກ່ຽວກັບເຫດເກີດຂຶ້ນນັ້ນ ຖ້າຫາກວ່າການກ່າວຫາເປັນ ຄວາມຈິງ.”
