ລັດຖະມົນຕີການຕ່າງປະເທດສະຫະລັດ ທ່ານນາງ Hillary Clinton ໄດ້ເລີ້ມອອກເດີນ
ທາງໄປຢ້ຽມຢາມສອງປະເທດເອເຊຍແລ້ວ ໃນນັ້ນລວມມີ ມຽນມາ ຊຶ່ງຈະເປັນປະເທດທີ່ ລັດຖະມົນຕີການຕ່າງປະເທດສະຫະລັດໄປຢ້ຽມຢາມເທື່ອທຳອິດ ໃນຮອບ 50 ປີ.
ທ່ານນາງ Clinton ຈະໄປແຫວະຢ້ຽມຢາມເກົາຫລີໃຕ້ ກ່ອນຈະເດີນທາງໄປເຖິງມຽນມາ.
ສ່ວນການຢ້ຽມຢາມປະເທດທີ່ ຢູ່ໂດດດ່ຽວຄືມຽນມານັ້ນ ຈະເລີ້ມຕົ້ນຂຶ້ນໃນວັນພຸດມື້ອື່ນນີ້.
ປະທານາທິບໍດີສະຫະລັດ ທ່ານ ບາຣັກ ໂອບາມາ ກ່າວໃນຕົ້ນເດືອນນີ້ວ່າ ທ່ານສົ່ງ ທ່ານ
ນາງ Clinton ໄປຢ້ຽມຢາມມຽນມາ ກໍເພື່ອເປັນການຕອບສະໜອງຕໍ່ອັນທີ່ທ່ານເອີ້ນວ່າ
“ຄວາມກ້າວໜ້າຢ່າງວ່ອງໄວຊົ່ວຄາວຈຳນວນນຶ່ງ” ມາຈາກຝ່າຍລັດຖະບານມຽນມາ ຊຶ່ງເຮັດ
ໃຫ້ການປົກຄອງໂດຍກົງຂອງພວກທະຫານເປັນເວລາຫຼາຍໆທົດສະວັດສິ້ນສຸດລົງ ໃນເດືອນ
ມີນາຜ່ານມາ ເວລາປະເທດດັ່ງກ່າວ ໄດ້ນໍາເອົາລັດຖະບານພົນລະເຮືອນແບບ ມີສະພາພຽງ
ແຕ່ໃນນາມ ເຂົ້າມາປົກຄອງປະເທດນັ້ນ.
ທ່ານ ໂອບາມາ ໄດ້ກ່າວອ້າງເຖິງການດໍາເນີນບາດກ້າວຕ່າງໆຂອງມຽນມາ ທີ່ໄດ້ມີການເປີດ
ການສົນທະນາໂອ້ລົມກັນກັບຜູ້ນໍາຝ່າຍຄ້ານ ທ່ານນາງ ອອງ ຊານ ຊູຈີ, ການປ່ອຍຕົວ
ພວກນັກໂທດການເມືອງຈໍານວນນຶ່ງ ແລະການເປີດກວ້າງສະພາບແວດລ້ອມທາງການ
ເມືອງ.
ທ່ານ ໂອບາມາຍັງໄດ້ກ່າວເພີ້ມອີກວ່າ ທ່ານນາງ Clinton ຈະໄປຄົ້ນຄວ້າເບິ່ງວ່າ ສະ
ຫະລັດຈະສາມາດເຮັດຫຍັງໄດ້ແດ່ ເພື່ອສະໜັບສະໜຸນຄວາມກ້າວໜ້າ ໃນການປະຕິຮູບ
ທາງການເມືອງ, ດ້ານສິດທິມະນຸດ ແລະການສ້າງຄວາມຖືກຕ້ອງປອງດອງ ຊາດໃນມຽນມາ.
