ທ່ານນາງຮິນລາຣີ ຄລິນຕັນ ລັດຖະມຸນຕີການຕ່າງປະເທດສະຫະລັດມີໝາຍກໍານົດ ທີ່ຈະໄປຢ້ຽມຢາມເມັກຊິໂກ ເພື່ອທໍາການໂອ້ລົມສົນທະນາກັນກ່ຽວກັບບັນຫາຫລາຍເລື້ອງກັບລັດຖະມຸນຕີການຕ່າງປະເທດເມັກຊິໂກ.
ກະຊວງການຕ່າງປະເທດສະຫະລັດກ່າວວ່າ ທ່ານນາງຄລິນຕັນຈະພົບປະກັບທ່ານນາງ Patricia Espinosa ຄູ່ຕໍາແໜ່ງຈາກເມັກຊິໂກ ທີ່ເມືອງ Guanajuato ໃນວັນຈັນມື້ນີ້.
ຄາດວ່າການພົບປະຫາລືກັນນີ້ ຈະກວມເອົາເລື້ອງການຮ່ວມໄມ້ຮ່ວມມືກັນໃນການຕໍ່ຕ້ານອາຊະຍາກໍາ ສົ່ງເສີມການແຂ່ງຂັນໃນດ້ານເສດຖະກິດຂອງທັງສອງປະເທດໃຫ້ມີຄວາມແຂງແຮງຍິ່ງຂຶ້ນ ແລະປັບປຸງເຂດຊາຍແດນລະຫວ່າງສອງປະເທດໃຫ້ທັນສະໄໝ. ນອກນັ້ນ ທັງສອງລັດຖະມຸນຕີຍັງຈະໂອ້ລົມສົນທະນາກັນເລື້ອງການປ່ຽນແປງຂອງດິນຟ້າອາກາດນໍາເຊ່ນກັນ.
ການຢ້ຽມຢາມດັ່ງກ່າວມີຂຶ້ນ ໃນຂະນະທີ່ຄວາມຮຸນແຮງທີ່ພົວພັນກັບພວກແກ໊ງຄ້າຢາເສບຕິດ ສືບຕໍ່ໍສົ່ງຜົນກະທົບຕໍ່ເມັກຊິໂກ ຮວມທັງໃນບໍລິເວນເລາະຕາມຊາຍແດນຕິດກັບສະຫະລັດນັ້ນ.
