ກະຊວງການຄ້າສະຫະລັດປະກາດໃນວັນພະຫັດວານນີ້ວ່າ ວໍຊິງຕັນ ແລະປັກກິ່ງໄດ້
ເຊັນສັນຍາການຄ້ານໍາກັນ ທີ່ກວມເອົາໝົດທຸກຢ່າງນັບແຕ່ ດ້ານການທະນາຄານ
ຕະຫລອດຮອດຊີ້ນງົວ.
ທ່ານ Wilbur Ross, ລັດຖະມົນຕີກະຊວງການຄ້າສະຫະລັດເວົ້າວ່າ "ສັນຍານີ້ ນັບ
ວ່າເປັນຜົນສໍາເລັດທີ່ໄດ້ມາດ້ວຍຄວາມຍາກລໍາບາກຫລາຍກວ່າຈະຕົກລົງກັນໄດ້.
ຜົນສໍາເລັດນີ້ແມ່ນຫຼາຍກວ່າເທົ່າທີ່ເຄີຍໄດ້ເຮັດມາໃນປະຫວັດສາດຂອງການພົວພັນ
ການຄ້າລະຫວ່າງ ສະຫະລັດກັບຈີນ."
ການບັນລຸຂໍ້ຕົກລົງນີ້ໄດ້ ແມ່ນເປັນຜົນເນື່ອງມາຈາກສັນຍາທີ່ເຊັນກັນລະຫວ່າງປະ
ທານາທິບໍດີສະຫະລັດ ທ່ານ ດໍໂນລ ທຣໍາ ແລະປະທານປະເທດຈີນ ທ່ານ ຊີ ຈິິ້ນຜີງ
ຢູ່ໃນກອງປະຊຸມ ທີ່ບ້ານພັກຕາກອາກາດ Mar-a-Lago ຂອງທ່ານທຣໍາ ຢູ່ເມືອງ
Palm Beach, ລັດ Florida ໃນວັນທີ 6 ເມສາທີ່ຜ່ານມາ.
ທ່ານ Ross ເວົ້າວ່າ ນັບແຕ່ນັ້ນມາ ທ່ານທຣໍາ “ກໍໄດ້ຟັງລາຍງານຫຍໍ້ ບໍ່ຫລາຍກໍໜ້ອຍ
ກ່ຽວກັບຄວາມຄືບໜ້າຂອງການເຈລະຈາ ໃນແຕ່ລະມື້.”
ທ່ານຍັງໄດ້ກ່າວຕໍ່ນັກຂ່າວທີ່ທໍານຽບຂາວວ່າ ຫລັງຈາກການ "ປຶກສາຫາລືກັນທາງ
ດ້ານເຕັກ ນິກ" ທີ່ສອດຄ່ອງກັບມາດຕະຖານສາກົນກ່ຽວກັບຄວາມປອດໄພດ້ານອາ
ຫານ ແລະສັດ ອີກນຶ່ງຮອບ ຈີນກໍຈະຕົກລົງໃຫ້ມີການນໍາຊີ້ນງົວເຂົ້າຈີນໄດ້ ບໍ່ເກີນ
ວັນທີ 16 ກໍລະກົດທີ່ຈະມາເຖິງນີ້.
ສະມາຄົມຄົນລ້ຽງງົວຂອງສະຫະລັດ ໄດ້ຍ້ອງຍໍຕໍ່ສັນຍາດັ່ງກ່າວ ໂດຍໄດ້ກ່າວວ່າ
ການເຂົ້າຫາຕະຫລາດຈີນໄດ້ ແມ່ນສໍາຄັນຫລາຍສໍາລັບສະມາຊິກຂອງສະມາຄົມ.
ທ່ານ Kenny Graner ປະທານສະມາຄົມດັ່ງກ່າວ ໄດ້ບອກກັບນັກຂ່າວ VOA ວ່າ
"ຜົນສໍາເລັດໃນຂົງເຂດນີ້ ຈະພັກດັນໃຫ້ຕະຫລາດຊີ້ນງົວຂອງສະຫະລັດຂະຫຍາຍ
ຕົວ ແລະເຮັດໃຫ້ຄວາມຕ້ອງການຊີ້ນງົວ" ໃນຕະຫລາດຈີນເພີ້ມຂຶ້ນ.
ອີງຕາມກະຊວງການຄ້າສະຫະລັດ ເພື່ອເປັນການແລກປ່ຽນກັນ ວໍຊິງຕັນ ແລະປັກ
ກິ່ງຍັງຈະໄດ້ແກ້ໄຂບັນຫາທີ່ຄ້າງຄານໍາກັນ ທີ່ຈະອຳນວຍໃຫ້ມີການນໍາເອົາສັດປີກ
ທີ່ສຸກແລ້ວຈາກຈີນ ເຂົ້າມາໃນສະຫະລັດ ໂດຍ "ໄວເທົ່າທີ່ຈະໄວໄດ້."
